Pathen Lenggam Machal, Chorei khat Baptize Changta

Karimganj a Sibargool hi sopi Chorei-Kuki kho ahi. Christian khatcha umlou. Pathen thu midangin anasei vanguva khatcha nomlou. Kum masa vel chun “Nasopi kahiuve School neihung bolpeh’un” tin KCC Assam Synod ahung ngeh’uve.

Synod lamkai ho lungsunga Pathen in “Mecedonia hunggalkaiyunlang nei hung kithopiuvin” tibangin ajahsah in pan alataove. A khoa Haosapu’n School bolna ding mun gam eipeuvin, insah ahitai. Lamkai hon agathensouve ningkum in, alim le athu kana sotai.

School kipat masangin Executive Secretary KCC Assam Synod Rev.H.Haolai le Pro-Pastor Doulien Hengna to ningkum Christmas chu kagamanguve. In kachonun, doiphung ahou houjong lim kalai. Nilhah ann nedin katemun, phabep ahunguve. Donbosco a kai chapang thum le amuna Missionary Pastor-te inko lenkhom chomcha kabolpiuve. Jan in Cinema kavetsah’uve.  

Jingkah in Pastor ho koma,”Seipeh hi eiho kin ahin, atahsan le atahsan loudiu Pathen kin ahi. Ajtahsan vahlou manin, natong ho oimo poute. Kamudolin vang Pathen ahin kisan loidiu ahi” kati. Hitia ngampela kaseina jehchu, Pathen koma kataonaova kalunga tahsanna nasatah ahung um in; chule, kappa mission natohna-to akibahna tampi kamui. Katahsanna chu moh in Pathen in akoipoi. Kum lhun masang lha masapeh chun missionary pastor hon gollhang khat ahinpiyun Rev. H.Haolai khut in baptize ahung changtai. Loupina Pakai chang tahen.

Pan hinlathei aumle, lem ahijinge. Ningkum le tu kuma thil le dangka toh tampi aumtai. Nangin jong jakhat cha hijongle napan nomle Synod office hetsah thei ahijinge. Chorei hohi ‘Chorei-Kuki’ akitiuve. I-pauvu 75% kibang ahi. Achonnau vang abona kibang ahi. Assam solkal ahi any-Kuki tribe sunga ahiuvin, Caste Certificate hi Kuki hi’na a aneiyu ahi. Nasopi hingjing Pathen heloulai ho hetsahna dia themcha beh napan nomlou ham?

Pathen in panpi jingtan.