Pathen helou din lhepna um angaipoi. Jesu Christa hi na Pakai le Huhhingpu dia natem nia pat in, lhepna hi ahung hatji.
Na nunlui nopsahna ho nangaisah ding, na houlou kisamvaiyin nahin hounom ding. Na daichavai ding tam ding. Na kivoppi nom, na hounom, napanpi nom hung tam ding. Deichat ding, thil napenom, nanehsah-nadonsah nom tam ding.
Chingtheiyin. Na kamcheng khat a jong nakipalsah thei, themcha khat a naloilhuh jeng thei ahi.
Hejingin. Lhepna hi ‘Aki-neiya, vom dehduh a hung ding ahipoi. Kichat um le thet uma hung ding ahipoi.
Onem heu. O ngeikei. Ahoi le dei-uma hungji ahi. Nagoldei, nathildei, nangai le nadu ho in hunginte.
Pathen in Adam le Eve chu Eden hon ngah dia akoi ahi. Chule, athilsem jouse – ju le va le adang jouse ching ding le achunguva vaihom dia akoi ahi.
‘Gul’ ahung tai. Gul chu Adam le Eve dinga agancha, avah’u ganhing, achin jingu gan hing ahi. Uicha, mengcha eihon ina ivah’uva i-dei mongmongu tobanga, Eve dinga ‘Gul’ chu ama gancha khat hidingdol ahi. Hiche chun ‘thingga’ chu atuidan le aphatdan aseipeh jeh a Eve in aneh ahi.
Guhthimcha lung naheiya, taona a Jesu Christa nakou chu naloi le nagol hochun hepouvinte. Hinla, guhthima hea aume --- Agiloupa, na Dougal, Satan chun guhthima nabol le nagel, nalunghei chu ahet ahi.
Hijehchun, ahetlou kah un, naloi, nagol, nah eng-nakom, natohkhompi, na insungmi ho ahin manchah thei ahi. Hijong chu, nang gut le dei, thanopna le lunggel tongkhathei lama nahin bolding ahi. Nalung-hansah, nalunglhaisah thei. Hichea kona chu Christa lam nagelna, nasanna lung chu nalahpeh thei ahi. Chingtheiyin.
Lhepna hohin nitinin eibomun,chonset eibolsah jing’uve. Hitia lhepna kitoh-gempen hohi – lunghan, khat chunga lungnopmo, mikhat houset a pho le gihsal, tohding dol toh nomlouva phatdanga dia vohchon, thaset, jousei, mi jouva lhep (apha hile kilomtah, alunghan le lhaset diu noplou jeh a i-ngailuttah iji, icha, i-gol jong thu neocha cha lhep a lunghang lou le lhaselouva koi) – hiti hohi kitoh jing ahi.
Chunga kisei lhepna, mihem geldia neocha cha, hohin asuhset pen chu ‘eima’ akihiji – ‘eima kipana’ eilahpeh’a, i-hidingdol ki-hitheiji talou. Mi kipah-louvin tohdoh pha anei theilou iheuve. Agiloupa dei chu mi suhmo hi ahi. Suhmo’a kona nalah-mangpeh jichu – na insungmite le nagolte chunga nalunglhaina ho, natohna a nakipa le kinepna, na-gunchu’na le tomngaina, nachanchunga lunglhaina, thilpha nabolnomna, le adang ahin – hicheho jouse nasuhmo’a kona chu Pakai chunga nakipa le kinepna chu nalahpehgotji ahipen’e. Lunglhai lou le kinemlouva na-umtengle Bible simnom talou, tao nomtalou, houin kainom talou; chule, nanu-napa, na sopi, naji-nacha, naheng le kom,chule midang ho dia thilpha bolnomna umjitalou ahi. Hichu, na lhempa lungtup le kipana ahi.
Bible in, “Gotsa demin umun(lung neng le limgeh in), chingtheiyin, phat jousen kiging jinguvin; na kidoupiu, Agiloupa chu, Sakei gilkel banga, koi kaval lhum the idem tia vah-le ahi.”( 1 Peter 5:8)
Pakaiyin eideiyu chu “Soh (chonset soh) ihi louna diuva Christan eilhatdoh’u ahitai; dingdet jing’un, soh namkola chun kihen ohkit tahih un” (Galatians 5:1)
Pakai Jesu Ama tah in “Vannoiya hin hahsatna natoh’ui, hinla, lungmong’un, Keiman vannoi kajoutai” tia asei ahi(John 16:33).
Hijehchun, ajousohpa Pakai Jesu chu i-Lengpau le Huhhingpu ahi’n, Ama koma tao jouse chu, chonset akona ahuhhing banga nitin lhepna akona jong ahuhhing jing ahi.
Tao’vute : “Pakai, hatlou le lhinglou kahi; nei umpi jingin, lhepna kato jouse hohi Lhagao Theng thahat in neijopeh jingin, nanga kakipana hi nei-honbitpeh jing jeng’in, chule, nadeilam hinkho chu nei mansah in tia ka Pakai Jesu namina katao ahi, Amen.”
Hiche taona hi taona naneile ‘Amen’ jih in.
Pathen in panpi jingtan.
No comments:
Post a Comment