CHAPA VAHMANGPA BANGIN CHINGIN

Pathen in na ngailut a, na phatna le kipana ding abolnom jing ahi. Na khohsah a nachin jing ahi. Hichu kihet inlang nang in jong Ama ngailu’n. Chule, Aman phatthei nabohna hohi kipapinlang, chang jingin. Hichu Pathen lungdei ahi. Angailutna hi nahetthem loule, Aphattheibohna nachan jong hethem ponatin, kipaje jong nahet louding, chan jong nachan theilou ding ahi.

Chapa vangmangpa thusim Pakai Jesu’n asei hi phate chan ven (Luke 15: 11-31). Eiho lah a thusei hon, aneijopa kijet iseijiuve. Vahmanga hung kilekit thu hi asei jinguve. Alenjpa, a-upa thu hi sei le gelin ineiji pouve.

Aneojopa hi avangphajo ahi. Chule, apa gou lutje hejo ahi. Apa gou manlutje ahe;n, achan theina din, apa koma ‘Gou’ chu ama chanding doles  chu athumin ahile, apan apetai. Hinla, chihna neilou, gimnomlou, nopsahna hol ahijeh in apa gou hochu nom tah in amang in (enjoy abole); kipahtah in amang e. Chomkah louvin, apa gou chu amangchaitai. Hichun, agentheitai. Apa angaikittai. Apa koma kilea, apa gou ganei kit ding anomtai. Jachat- kiphatlamna lentah le kichatna jong aneiye.

Hinla, ajachat le tijatna hosing chun apa le apa ‘gou’ angaichatna chu alenjotai. Hiche jachat, kiphatlamna le kichatna hochu kituhsah luvin apa kom ahin jon kittai. Alim-amel jong kikhelgam ahitai. Phat sotpi apa gelphalouva mahthah ahi. Inlam ahin jotkit chu, apa chun, seipeh ngailuvin, apa angaichat jeh a hungkit a ahi ahetai. Hijehchun, apan kipah tah in anasangin, vonpha le chanpha apen, golvah loupe asemtai.

Chapa lenjopa hi apa koma aumin, apa nei le gou jouse achenpin, adeideiyin amangtheiye. Hinla, apa gou hochu ama’a ahi le anei ahi akihetpoi. Apa koma aum chu apa soh-natongin bou akigele. Hijehchun, kipana hinkho amang theipoi.

Alenjopa banga hi, Pathen in phattheina napeh ho chu nakihetloule kipaje heponatin, mube jong neiponate. Tua hi ipi nanei em? Hinna nanei, tahsa nanei, neh ding, donding, damna, hoina, thepna, mit, khut, keng, le adang ho nanei em? Nasema Pathen ahi. Hiche nanei ho chu Pathen in napeh hilou ham? Hiche ho jeh achu Pathen chunga kipana nanei em? Kipa thu nalhutji nah em?

Kipa-je helouva Pathen in phatthei aboh nompoi. Na peh chunga kipaje nahet’a, kipathu nalhut jingle, abana nangaichat hojong napehbe jing ding ahi.

Chule, Pathen Chapa, Jesu Christa vannoiya hung chu nangma Pathen cha nahitheina kin bola hunga ahi. Na kipah em? Pathen cha hi chu lei le van’a dia thupipen le aphapen hilou ham? Pathen cha nahi nom lou ham? Pathen cha nahitheina dia Jesu hung chu nakipa nah em? Hiche jeh a chu Pathen koma kipathu nalhut ji nah em?

Jesu Christa cross chunga thi chu nangma Pathen cha nahitheina ding ahi. Hiche jeh achu nakipa nah em? Jesu thi jala nakipa thu Pathen koma nalhutji nah em?

Jesu chu Pathen Chapa, Pathen ahi. Chonset neilou Pathen Chapa Jesu chun, nangma chonset chu ama chunga aumtheina dia namgma lim (mihem lim) a hungpenga ahi. Mihem ahi’na achu nachonsetna chu atahsa’a apoh a, hiche chonsetpo tahsa chu, michonsepen kithana dia kisem cross chunga chu akhetbeh thasah ahitai. Chonsetpo tahsa chu cross chunga atha’a, atijouva lhan( mithi umna mun) a avui sah a, Ama (Jesu) vang chu lim-le-mel (vou) loupe neiya lhagao (Pathen) ahi’na a thoukit a ahitai.

Hitia, Jesu nachonset khela athi chu ‘kachonset ei jopeh/ eithapeh tai tia natahsana, nakipah a, kipathu Pathen koma nalhut-le, Pathen in, Achapa Jesu thi chu nang thiding khela thi-a nasanpeh a, nangma chonset jouse chu nangaidam’a ‘Acha (Pathen cha) dia nakisan ding ahi. Kipaje nahetloule, chapa lenjopa dana, Jesu ‘Huhhingna natoh’ chu nanga nahisah lou le nachan loulai ahi.

Jesu’n mihemte (mijouse) chonset chu apaohmang ahitai. Hinla, nang in nangma chonset jong chu  Akoma na-ga-selhah ngaiya ahi.

Iti na lelhah ding ham? Bible in aseibanga, na kama naphondoh ding, nalunga natahsan ding ahi.

“ Nangma Jesu hi ‘Pakai’ tia nakama naphondoh a, Pathen in thia akonin akaithouve ti nalunga natahsanle huhhinga na um ding ahi’ (Romans 10:9)

Hijehchun, taovin, Jesu kouvin, chonset ngaidam thumin, na Pakai le Huhhingpu din kisan in. Na kilhanna nakam in phong in, Ama na sanna jong nakamin phongdoh in. Chule, naphondoh jala Huhhingna nachan jong tahsan in. Mihom ipi sei jongleur, natahsanna chu tuhdet in. Pathen ajou ngaipoi. Athusei, Bible a um hi tahsanin. Pathen tahsan kiti hi aseiho tahsa hi ahi.

Taona a kilhanje nahetlou jeng-le, ka thu jihsa holah ahin, kilhanna taodan uminte; khatpen hi mangin taonan kilhanin. Natao themvang le naseidih vang ahipoi. Natahsan jala bou huhhinga um nahi kihet in. Seikimlou le seithemlou tah a natao jongle akhoh poi. Bible in phondoh ding ati jalin, nathei bangbangin phong jengin. Hichu, na ngailupenpa, vana um na-Pa, ipau Pathen in, ngailutna jala eisanpeh jiu ahi.

Nakilhantah kal, Pathen cha nahi chu kihet in. Chapa neojopan, apa ‘gou’ achan le apa koma aum ahet letjeng bangin, Pathen cha nahi, Pathen ‘gou’ (huhhingna, lhagao penthahna, tonsot hinna’ chu Pathen in nachansah ahi chu kihet in. Hitichun, Pathen chate hindolin, hinkho mangin. Nitinin Bible sim teiteiyin, Bible aumlouna a naum jongle, Bible thu kijihna lekhabu le internet ho, face book hoa beh hi sim teiteiyin. Chule, tao jing jengin.

Hitia chu nataole, Pathen kom lhutnan ‘Amen’ jih in.

Pathen in phattheina lhingset nachan jing tahen.