CHONSET THANEINA AKONA HUHDOH A UM CHU ‘HUHHINGNA’ CHANG AHI

Numei khat in “Kajipa, Pathen thu hung hilin, Counselling hung bolin, hung taopeh in” eiti.

Ken, “Ipi din em?” katile. “A kham kham jenge” ati.

Hichun, ken, “Hungnang’e. Jingkah nidan 6 apat nidan 7 gei, nani lhona napan lhonding. Lhakhat sung” katile, akal asei tapoi !

Ama geldan chu, ajipa chu phoh henlang, hilchah-le eiti ahi. Ama pan ding chu angaina ahepon, adat theilou jong hinte. Chule, amanu dei chu nilhah, ajipa hung kham laile hungle eiti ahi.

Numei dang khat in “Kajipa, akham kham jengin Crusade hung bol peh’uo. Tun jong kikhopna beh hung semin” ati. Avel vel in aseijingin, khatvei kachetai.

Kagalhunle, ajipa chu akhama lum ahitai. Kache chu asepeh-le, alima bang tah in, ahung thouvin, ei houvin, “Kidang tah a ka ina nahung chu kakipah behseh jeng’e. Ipi thu hitam?” eiti.

Ken, “Nadam dam’u hinam, khatvei beh taona mang khom leuhen tia kahung ahi” katile, anom mang poi. Hinla, ada ngamlou jeh chun, khamma akham val jeh chun, thipbeh in, bu akithuh in, anetai.

Kanga kah chun, ajinu chu aoimon, “ipi dia, mi nanopnop nahinpui ham?” ati.

Chomkhat jouvin, ahung touvin,kikhopna kasemtai. Judon johsah (addicted) ho umdan kaseiyin, ajinu chu phatechan kahiltai.

“Akham puma ahungtengle, ana house hih in. Phatechan ana houvin, ana lemin. Bu nehsah inlang, lupsah in. Chutengle, taopeh in. Ju hi agiloupan amanchah ahin, Pathen in alhoh (geltheina) pha apeh hi suhchatvai peh ding ati ahi. Aman haiding agotvanga haitheilou ahitai. Lungset umtah ahi. Panpi ngaicha ahi. Pathen jenin, lungset bolin. Ama jong hin adonnom val tapoi. Hinla, alha theilou ahitai. Abola hin ajo ahitai. Pathen tailou, Jesu Christa galjona tailouva haithei ahitapoi. Moh oimo hih in. Taopeh peh jengin. Jesu Christa akikouva, nasa mongmonga akoutengle bou ahuhhing ding ahi. Chuteng chule, a chonset angaidama, ahuhhing ding ahi. A lhagao ahuhhing tengle, atahsa jong adamsah ding ahi. I-Pakaiyu Jesu Christa hin tahsa le lhagao akop goma ahuhhing, asuhdamji ahi. Chuteng chule, a Judon jong ahaisah ding, atahsa le a lhagao adamsah ding ahi. Hiche tokah chu, phatechan jenjing in” kati peh tai.

Chule, ajipa jong chu, “Ka sei hi dih nasah em? Na tahsan em?” tia kadoh-le “adih e” ati.

Hichun, “Na hainom em?” katile, “Sot a kahainom, ahaina dia taona jong mi kakineisahsah jeng ahi. Lou jong tampi kabol ahitai. Athikhel matchet kahitai. Hinla, hai kagot seh-le kathi ding bangin aumji. Kakichajin, kadonkit jitai. Ka haithei louding ahi kahetai!” eiti peh’e.

Hichun, ajinu chu amit alum jeng tai. Akichatan, ahai ding chu, ajinu jong akicha leutai. Ajehchu, ajipa thile ainsung iti um ding ham? Ipi aneh diu, iti achate school kaidiu hitam? Ajinu chun, kasei masah ho jouse chu ahechentai. Ajipa judon haisah ding tup jingnu chun, ahaiding akichatai!

Christa jala ka insungmite ho, thu hi mohseisei kahipoi. Seidan kathem lou bou ahi. Pakaiyin hetna eipeh hohi, ka im le kasel tobang atamjo ahi. Ajehchu, kiphatlamna a dim kahi.

‘Chonset thahatna’ tia kaseiji hi nahetthem tah em?

Chule, ‘Huhhing’ kiti hi ipi kiseina ham?

“Huhhing, Huhdoh’ kiti chu, mihem khat, khatcha ham khat hahsatna, gentheina, thina atodinga kona, michomkhat in ahuhdoh, ahuhhing’ kiseina ahi.

Mihem ho Jesu’n ahuhhing kiti chu, ‘chonset thaneina, thina akon ahuhdoh, ahuhhing’ tina ahi.

‘Chonset’ hi nachama nabol ahisanga ‘chonset hi nanga um’ , ‘Chonset thaneina’(satan thaneina) in nabolsah ahijoi. ‘Chonset, Satan, Agiloupa ‘tha hatna’ chu nanga um ahi. Hiche, Agiloupa hin, i-neh le i-don hou jenga jong hi khut ahinlhah ji ahi.

Christian hilou judon don jeng sanga, Christian hija judon hohin aleljouve. Christian louvin Ju hi niseh in hai lenkhat don hen, Christian khat in Haineo khat niseh in donle, adonlhomjo Christianpa chun leljonte.

Ajeh nahet em?

Ajehchu, ‘ju’ chunga chu ‘tha-neina’ (power) dang khat hung panbe ahi. Hichu, agiloupa, i-kidoupi jing’u, Christiante jouse doupa chu hungpang ji-a ahi.

Christianpa melsetna ding hola, johsahna apeh’a, lhaso theilouna apeh ahi. Hichu, atahsa hatmosah a, alhohbuh suhsetpeh a Pathen geldoh theilou dia akoigot, alhagao thina ding agelpeh ahi. Judona, jukham jinga uma Pathen thu hetheilouva uma thisah ding, a lhagao chu damun meidil’a,umsah ding atupji ahi.

Hitichan pha hohi, lou le aiyin ajouji tapoi. Oimo, pho le den in aphachomji tapoi. Asunga chengpa Satan chu mihem pho le den in achat poi. Ama chu apotdoh loule, ju, lou, khamnathei dang ho chu iti alhaso ding ham? Asunga chengpa chun adu le angaichat jing ahi.

Agiloupa (Satan) potdohsah theiya chu Jesu Christa bou ahi.

Jesu Christa hi Pathen ahi. Semtila pat’a Apa Pathen-to umkhoma, thilsem jouse sempa ahi (John 1:1-3) Pathen ahi’na dalhah’a leiset’a , mihemte Satan in athaneina noiya sohbanga ahenna’a kona huhhing dinga, mihem’a hungpenga ahi.(John 1:9-12, 3:16)

Mihem’a ahung pen jeng vang chun Pathen ahi’na aumjing thouve. Ajehchun Lhagao Theng in aumpi jing ahi. Satan in, mihem dang banga lhep lhah thei ham ti gelin, analhem in, hinla, ajoupoi.(Matthew 4:1-11)

Jesu chu Satan lhepna joupa ahitai. Satan lhep joulou ahibanin, Satan thaneina (chonset thaneina) mihem’a um chu Ama tahsa chunga apon, atahsa pumin cross’ a akhenbeh tai. Chonset-po tahsa chu lhana avuiyin, Ama vang Pathen (Lhagao) ahi’na in athou kittai.Tahsa lim pu-in thou jongle vouchom, chonset in atohkhah theilou, vou-loupi, thi-theilou vou aput ahitai. Chonset thahat (thina) chun atuh jou poi.

Hijeh achu, ‘chonset thaneina’ mihem’a um hi mihem jothei ahipoi. ‘Chonset thaneina’ jousohpa, Jesu Christa tailouvin, mihem koiman ajoutheipoi.

Nang jong, na insungmi jong ‘chonset thaneina’ in ahen nahlaile, Jesu Christa kouvin. Ama thu, Pathen thu, Bible sunga kisun ho bangin, taonan kouvin. Nachonset, chonset thaneinan chonset nabolsah le chonse nahisahna, najolou thaneina akona chu na ‘Huhhing’ din, tahbeh mong mongin, nasatah in, Jesu Christa hi avel velin kouvin, taovin, ngeh in.

Chonset puma natahsa jong thi-a, na lhagao jong Damun meidila acheding nanop loule, tuhin kouvin, Aman na ‘Huhhing’ ding ahi.

 Na noploule, ka thu sut ji hohi sim hih in. Bible jong sim hih in. Pathen thu Bible le Bible thudol hi moh sim ding, kichepna ding, moh khola adih le adihlou holna ding ahipoi. History, Philosophy, Science, le mipha le mihem mudia apha hinkho manna ding maiya kihilna ahipoi. Lhagao thu ahi.

Pathen thu hi ahe le athem jong kihisah hih in. Chengkhat kisei hin, seidoh le vetsah (meaning) tampi anei ahi. Hiche jong chu Pathen (lhagao) thudol aseina ahicheh e. Bible them konkhat in Bible sunga hin Pathen thu aume (The Bible contains the word of god) ati bangbep in gel hih in. Abona hi Pathen thu, Pathen thusei kijet ahi. Moh dai hih in. Ajoule totnan mang khanate. Old Testament hi New Testament in akheldoh in jong gel hih in. NT hin OT apilhinsah ahijoi. Agoma hi Pathen thu theng ahi. Pathen in hetna apeh a lamkai masa, Bible them ho ana lhentohsah ahi.

Chonset thaneinan nabol, na insungmi abol chu Jesu Christa’n ajoding tahsan nahi jala hiche hi nasim ahi kahei. Chunga kasei hohi, mi hitobang hoa kona chu nadinjouna ding le na kininthemna ding, chule, nadindet na dia tahtah a kasei ahi.

Pathen cha nahi kihet in. Pathen lhen nahi. Phatthei naboh nom ahi. Kisanin. Midang jong napanpi theina din, alhingset in kisan in. Jesu Christa kouvin. Pakai le Huhhingpu-a nakisan chu taonan nakamtah in phongin. Avel velin phongin. Niseh in phong jingin.

Nitina ngaidam kithum, kilhandoh hi kithah lahna, tha-hat kisanna ahi. Mi konkhat in “Jesu’n, Pathen in eingaidamta. Ngaidam kithum thum ding angaitapoi” ti jongle, nang vang hiteho sei chu ngai hih in. Pathen thu tahsan in, asei nit in.

“Eiho chonset neilouva ikisei vangule, eiho le eiho kilhem lhaa, thutah chu isunguva um lou ahi. Eihon ichonsetna jouseu iphondoh vangule, ichonsetna jouse ngaidam ding le then louna jousea kona eisutheng diuva, ama chu tahsan umtah le dihtah ahi.Eiho chonse louva ikiseiyule, ama chu ijoubol’-uva, athu eiho sunga umlou ahi.” ( 1 John 1:8-10)

Pathen thu hi phatechan-gelin, “eiho” ati hin, 1 John lekhathot jihpa John jong ahomtha ahi. Hiche lekha hi ajih’a chu John hi ‘apengthah’ loulai, Huhhingna’ chang loulai ham?

“Apengthahsa, ngaidamna changsa hon ‘chonse kahi’ titah louding ahi” tia seiho hi na kilheplhahsah ding ham? Ole, adihcheh ahet’ule,kahepoi. I-dih jal’uva Jesu’n ei huhhing’u, Pathen in eingaidam’u ahipoi.

Adihlou ahisangin, eihon vang, hiche Bible change hi pansa’n, nitinin chonset ngaidam thum’ute. Bible suna bon pangthei John in bon ama jong ‘chonse nalai’ akisah-le, nang le kei ipi ihiu ham? Pathen in eingaidam’u bou ahin, michonse ihiu ahi. Mihem tahsa hi ineilai sung’uva michonse ihiu ahi

Hiche, Jesu Christa’a pathen thahatna chu Lhagao Theng in eihoa hi aphondoh jing ahin, aphondohna thahat, ajona thahat chu nitina ihet jing theina diu, igeldoh, ison jing theina diuva, chonset ngaidam thum jing ding apha ahi. Hichu, kithah lahna ahiji.

Pathen in nataona jouse sang henlang, phattheina tincheng nape jing tahen.