AKHONNABEI PATHEN

AKBP-1 : Tuchung Sibergool a kache chun Pathen thiljouse sempa hi ‘AKHONNABEI PATHEN’ ahi hi kamuchentai.

‘AKHONNABEI PATHEN’ kati hi English a ‘Infinite’ akiti.

‘Pathen hi thiljouse sempa ahi’ tia tahsan ding hi mihem dia thupitah ahi. Chule, ‘thiljouse asem, asemthei’ ahile, aumlou jouse umsah theiya le aum jouse subeithei ahi nahei.

Achutile, Pathen tahsana, Ama a kingai nahile imacha lungkhampi ding aumpoi. “Lungkham hih un, Pathen natahsanui, Kei jong neitahsanun” tia John 14;1 muna seiya chu Jesu Christa ahi. Ama, Jesu Christa hi Pakai le Huhhingpua nakisan tah-le Pathen cha (Jesu jala ‘cha’ hina chang, ‘cha’ dia kisem thu, lamthu cha) nahitai. Acha dinga ipi a-it em? Imacha a-it poi. Mihem a nasemle, nangaichat jouse napeh ding ‘cha’ dia nakipom ahitai.

Napa chun  nadeidei napenome. Hinla, nangin nangdia pha natijouse, napan penom ponate. Nang dia pha dia ahet hobou napeh ding ahi. Chule, nadei tah jong chu apet pet’a napeh louding ahi. Na lekha simkhoh pet in, nadeitah ‘Football’ chu pelechun, na lekhasim lhasamthei ahi. Exam nachaiteng napeh nom thou ahinai. Apetpet a napeh lou mana chu, napa chun nalungset lou le napeh nomlou ahipoi. Nang dia pha ahenai.

Na hatu nakita nat in, nalel lheh jenge. Adamna baipen chu, na hatu bodoh ding chu ahi. Hinla, hatu beiya na umle namel asset ding adeilou jeh a, hanta chu nathohsah a, ol ola damding lama nakoi joh thei ahi. Na hanta adamvahna ding nabolpehlou mana chu napa chun nangailutlou ahipoi. Nadinga phapen chu ahenai.

Vana um napa jong chute ahi. Nangailut jeh a nangma dia aphapen chu nabolpeh nom ahi. Hinla, itih phat a napehle nangdia phapen ham ahenai. Namuvahlou le nathoh genthei dep manin lung lhaloi hih in “Kadinga pha ahenai” tin Ama vaihop ngah in, tao jingin, lungmong le kipah in um jingin; Bible  sim jingin, tao jing jengin, nadinga phapen chu napeh teiding ahi, Ama a nakingai jingle.

Pathen in panpi jing tan.