NGAILUTNA THAHATNA

Pathen in eingailut banguva, miho ngailut theina ding le Jesu Christa thu hettohsah a pantheina dinga Lhagao Theng in thahatna eipeh diuvin Bible in eihil’un ahi.

Jesu’n hitin aseiye, “Lhagao Theng chu nanghoa ahung tengle thahatna nanei diu ahu; chutengle, Keima thu hettohsah’a Jerusalem, Judea gam le Samaria gam, chujongle, leiset chung gam jousea napan diu ahi,”  (Acts 1:8).

Ngailutna sangpen chu Lhagao ngailutna hi ahi. Mihem, Pathen’a lhagao hinna neilou chu, ipi-itobang thilpha pejong lechun, phatchomkhat joutengle, lunglhai louna neipai tante. Pathen’a hinna nei vang chu itobang hijongle, thohjouna, thoh hanta aneiyin, ahinkho kipah le lunglhaiya hindan le toh ding dol tohdan ahejin ahi.

Mi nangailuttah chu, alhagao ding gelpeh masan. Chutile, ama ding le nang dinga phapen hiding, Pakai kipana le phatthei bohna nachan ding ahi.

Na ngailuttah nu ham pa ham chun hinkho hi lungmonna le kipana neilouvin manghen, a lhagao jeng jong damuna cheding hile nanom dem? Pathen’a lhagao hinna neilou jousen kipana tahbeh le hinkho nom amangthei poi. Lunglhaina le monna tahbeh hi Pathen Lhagao Theng neina akona bou kineithei ahi.

Hijeh achun ngailut-Pakai Jesu Christa chun, “Keiman ka ngailut bangun, nangho khat le khat kingailuvin” ; “Nangma na kingailut bangin, naheng nakom ngailu’n” tia eihilu ahi.

Ngailutna neilou chu iti ngailu jong lechun, nangailut chu hetheem ponte. Hiche banga chu, ngailutna sangpen Pathen ngailutna neilou chun midang ngailutna dihtah jong aneijipoi.

Hijehchun, Pathen ngailutna thu hi miho seipeh in. Chutile, amahon Pathen ngailutna aneiyuva, nang jong nangailut diu, Pathen in phattheina kim napeh ding ahi.

Ngailutna thahatna eipeuva Lhagao Theng chu nitinin, Pathen koma thumin, Jesu Christa mina nahin solpeh ding ahi. Chule, Lhagao Theng chu Jesu Christa Leng le Huhhingpua kisan jouse Pathen in apehji ahi.

Hiche thu hi natahsan’a Lhagao Theng chu Pathen  koma nathumle ‘Amen’ jih in. Pathen in a Lhagao Theng in na umpi jingtan.