Thokitna thuguh

Jesu Christa thokitna jalin Pathen in phattheikim napeh ding kakinem’e. Hichehi, Christa nungjuijouse dia Pathen thahat channa ahi. Pathen in panpi jingtan.

Jesu thinia pat athokitni gei, hapta khat (lungdonna hapta) sunga melchih thei hochu:

Ninga (Thursday) jan, lheplhah a aumjan tah chun kitepna an eipeuve.

Nigup (Friday) nin, mihemte chonsetman sahlhahna’n ,thohgentheina le thina atoh e.

Nisagi (Saturday) nin mithigama kumlhan, damun kot agaphai.

Thokitni (Sunday) nin thahatna nasatah neiyin athoudoh kit in, Pa lunglhaina le kipaman chu asangtai.  

Athini hi nitding,man ding mong ahi. Cross chunga athi hin itobang mi ahi– chonset neilou Pathen Chapa ahi, chule, Pathen Kelngoinou vannoi chonset pomangpa ahi chu aphondoh ahitai.

Jesu Christa’n cross chunga jona anei tobang hi koima dang in aneijouthei ding ahipoi. Kithoina chamkim ajotheina hi Pathen mihema hung peng ahijal ahi. Kithoina anei hi mijouse chonset thoina ahin, munjousea le phat jousea dia abol ahitai.

Athi chu kichehtah a ‘khatveiya thi’,’mijousedia khatveiya thi’( Once, For all) ahitai. Avela thi ngaitalou, khatveiya achai ahitai.

Christian tamtah in agelbanga, chonset thoidamna dia athi keu hi lah’a, ahinkho le athuhil hohi donselouva i-koikhah’ule, anatoh hi lhatdohna kin keu bola i-koi diu; anatoh hi kimlouva ihetdiuva um ahi. Achutile, hiche tahsa thijou tenga dinga bou Huhhingna kin abola i-koi diu ahi. Ainkho le Athuhil jouse hi eiho dia kihilna le Ama i-juitheinau ahi.

THOKITNA THUGUH chu :

1.Athokitni lele dinga Lhan chu ahondoh ahipoi. Ama nungjuite jouse dinga jong ahon ahitai.

2.Athodohkit chu Ama ding lelea thoukit ahipoi. Anung juite jouse dinga jong Van-gam kot chu ahon ahitai.

3.Athodoh nia chu Jesu’n Van - naobu chu ahon le aphutvang ahitai.Ama banga Ama nungjuijouse chunga kona pengthahkit ahitauve.

Jesu Lhana kona ahungdoh chu, mihem thisa thoukit’a hinnathah nei ahitai. Hiche nia chu, thokitna hinna chu Jesu’a chu uma ahitai. Hichu, Ama keu hilouva, Ama tahsana anungjuite jouse jong ichuti diu ahitai ti Pathenthu’n eihilun ahi :

 “Jesu thina’akona kaithoupa Lhagao chu nanghoa achenle, Christa thina’akona kaithouPa chun natahsau thitheiya chu Ama Lhagao, nanghoa chenga kona chu, hinna napeh diu ahi.” (Roman 8:11)

Hichelai Bible chang hin asei chu, tahsa thinunga lhagao thokitnakeu hilouva, Jesu Christa thokitna thahat chu tua eihoa natongjing ahidol hi asei ahi. Jesu chu leiya ahinkho keu mai chu  i-vetkah diu hilouva, tua mihem achenpi mite hinna’a anatoh jeng jong hi vetkah le juithei ahi. Athodoh kitna thahat chu Achate jouse hinkhoa hi mutheiya na atoh jing ahi. Bolthu, akitho thu maimai ahipoi. Jesu’n Van-naobu chu ahon ahitan, atahsante jousen Vana nunchan chu leiset’a hi ahinpohlhah (ajuitheiyu, anunuva athdoh theiyu) thei cheh’u ahitai.  Chunglama kona peng jouse chun, Van DNA (nun,mije, thisan) chu aneicheh’u ahi.

Vana kona peng masapen chu Jesu ahin. Abana, Ama tahsana anung jui jouse hi ihiuve. Thia akona thokitna dia thahatna keu hilouvin, Aleng-gam kin bolna dia jong thahatna eipehthau ahitai.

Amathu hatchet theina hi Bible thu kihilthem le kichuhthem,simhat le them vang ahipoi, Lhagao Theng thilpeh joh abou hetthem thei ahi. Hetthem le muchettheina chu  i-chantengule, Pathen cha ihinauva hin thilthah le kidang aumjitai – umdanthah, thilthahthah umdohna le mopohna thah ho ahung umjitan. ALenggama tohjingtheina lampi eihonpeh jiving; Vana kon kithopina chomchom ahung kisunglhajitai. Jesu’n Pathen thua anuntheina dia Lhagao Theng a akingai bangin eiho jong Ama banga iumtheina diuvin Lhagao Theng chu eihin solpeh’uve.  Thilkidang tahtah le Ama hi’na photchetna din jong Lhagao Theng chunga akingaiyin; tunjong eiho ichuti theina diuvin Lhagao Theng eihin solpeh’uve.

Tahbeh in, Jesu chu eiho chonsetna akona ei huhhing diuva hunga ahi. Chule, eiho jong Ama banga Pathen lungdei hinkho imantheina diuva thahatna eipeuva hunga jong ahi. Hiche thahatna chu, Athokitnia chu Lhana kona chu ahinphutjala hung kikhodoh ahitai. Vannoi pumpia mite seijuiya sem dinga eingansenau hi , hiche Thokitna thahatna tailouva chu umtheilou ahi.  Jesu seijuite’n Thokitna thahat achanuva chu iti-ipi abolu ham ti chu Solchahho Thilbol (Acts) hin  eihiluve.

Thokitni hi iti naman em? Ole, hiche Thokitna thahatna chu changlou nahi jeng em?

Ole, Jesu mithiho lah’a kona le lhana kona kaithoupa thahatna thilpeh chu changlouva, miluihon anabol’u juina’a mang nahimai jeng em?

Nachantahle kipa aume. Hiche hi, miho hilnan mangin.

Chang loulai nahile, tutah hin Jesu Christa chu taonan kouvin. Taovin –

“Pakai, hitihchan nangma Leng le Huhhingpu dia kana kouloulai le kachonset na anga kaphonloulai jeh in ngaidam kathume. Chonse kahi neingaidamin. Chonset thaneina noiya hingjing kahi jong kihetlou kahi. Nei huhhing in. Ka dinga Cross chunga nathoh a nathi jalin kakipah e. keima chonset lhatdohna dia nathia, kachonsetna ho neisopthengpeh tah jalin naming kathangvah e. Thina le chonset thahatna jouse jousoh a,  Loupitah a nathokit a Vankot neihonpeh a Pa-to chamna neisempeh tah’a Pathen cha hitheina neipeh tah jalin kakipah e. Ka Leng le Huhhingpu nahi. Tuhin, kalungsung, kahinkhoa hin hung Leng changing. Kahinna le ka lhagao nakhut a kakoiye. Na lungdei hinkho chu nei mansah in. Na cha hitheina hinkho kamantheina dia eipui, eihil, eilhamon din Lhagao Theng chu kasunga chensah in, nei lamkai jingin. Jesu minin, Amen.”

Jesu thia a kona athodoh jouchun, numei ho le seijuite’n, agaholnauva, Jesu long umtalouvin, lhan chu akeu, agohkeuvin agamu’ve.

Hiche, ‘Lhan-gohkeu’ chun ‘Vankot’ ‘Van jotna lampi’ Lei le Van kah a ajopmat ahitai– hicheni ding, Jesu ding keuva chu hilouva, niseh’a, mijousedia vanjotna  lampi chu ahonjing ahi.

Gol, nangla, hiche lampi chu najot nah em?

Najotle ‘Amen’ jih in. Najot loulai jongle, jotna dia Jesu koma ngehna in ‘Amen’ jih in. Pathen in Jesu Christa minin Lhagao Theng thahatnan umpi jing tan.