JESUN LHATNA KIN ACHAISA AHITAI, KISAN IN

Chonset in mihem jouse hi khat cheh a hi ‘soh banga’ ahena, athua anunsah ahi. Jesu Christa hin, hiche chonset-soh a kona hi eilhatdohnau kin chu achaisa ahitai. Hinla, mimal tin hin eima ding cheh’a kisan ngaiya ahi.  Chule, hiche Jesu tohga chu santheina dia ‘achang thei dingdol chu hithei (lhin) ngaiya ahi’.

Vetsahnan, Solkal in natohna ding mun (post) chu akoitai. Adeh a tribal dinga koitum ahi. Hinla, achang dia lhing nahi ngaiya ahi. Tribal jouse chanthei ahipoi. Busom najoa, najona lekha dihtah nanei ding, tribal nahiding tribal hina hetpina napedingdol hon phatecha lekha asemu chu nanei ngaiya ahi, agamsungmi hi’na lekha naneiding ngaiya ahi. Chubana, hitobangmi tamtah lah a chu lhendoh nahiya, tohmun chu nachannadia themvetna khat ngai kit’a ahi. Hichu, jihthoa le kama kidohna ho ham dihtah a nadonbut thei ngai nalai. Aban kit a, napeding ho deichomthei mi, ama mel-het, party mi, insungmi, ahiloule, seiphat chang nahi ngai nalaiya ahi.

Kaden! Moh mumaimai thei ahipoi. Lhai kitet jong ngai maithei nalaiya ahi.

Hitiho jouse chu nalhin jouhel tengle vang, tohmun chu namchan jeng ding ahitai. Hijeh achu, Bible in,

“Lungheiyunlang,nachonsetnau chengse suhmanga aumnadin Pathen lam’a kiheiyin, chutile, Pakaiya kona kisuhhalna chu nanei thei diu ahi”(Acts 3:19) ati ahi.

Mi konkhat in “eiho chonset jeh hilouva, Adam le Eve chonset jeh a Jesu hungthia ahi” atiuve.

Pathen thu Bible in “Mijouse chonse ahitai”(Rome 3:23) ati. Pathen thu ijousah diu hitam?

Leng David in, “Chonsesa kijil’a themmosa hungpeng kahi!” (Psalms 51:5) tia Pathen koma “Neisop lechun theng tange” atia atao khu iheuve. Chule, hitia atikhu Pathen in adeilhen jouva “Ama khu kalungdei mihem ahi” tia Themgao Samuel koma aseisa. Lenga apansahsa ahitai. Hinla, achonset athenlou jeh achu, chonset abolkit ahi. Ama a chonset tha-hatna aumjing ahet kichet mongmong phat achu, Pakaiyin asoptheng loule itih ajong chonset aboljingthei ahi akihet chet mong mong ahitai. Hijeh achu, achonset, ama a chonset um chu, “Pakai, kachonset neingaidamin, keiya um chonset tha-hatna hi neisoptheng peh in” tia taova ahi.

Solchah John in “Eiho chonset neilouva ikiseiyule, eiho le eiho kilhem ihiuvin, thutah chu eihoa umlou ahi” ati (1John 1:8) abana, “i-chonsetnau chengseu iphondoh vangule, chonsetna jouseua kona ei ngaidam diu le thenlouna jousea kona ei sutheng diuva Ama chu tahsan umtah le kidihtah ahi” (1John 1:9) tia asei hi imuve.

Chonset phongloulai le Christa kisanloulai nahi-le tut ah hin Jesu hi kouvin,tuni geiya nakouloulai nasuhkhel ahichuto, chonse nahi chu ngaidam thumin, Ama a hinna chu thumin. Nahinkho Ama deilama apuidin akhut a pedoh in, napui jingdin temin. Nabolsa, achangsa nahitah-le, midang hon jong asan diuvin seipeh in.

Lhagao lama khantou jingna din niseh in Bible simin, tao jing jengin.

Pathen in panpi jingtan.