HOUIN KAI HI NGAIKHOH AHI

Houin kai jingin – nadamna ding, naphattouna ding, nakipana ding ahi.

Houin kai hi moh maimai thu ahipoi. Ajehchu, Pathen houna le kouna mun ahi. Houin kai jing jouse  aphai tina ahipoi. Hinla, houin kai jingthei chu tahsanna neiya le Pathen ngaicha jing, anun chingtup nom ahi.

Houin kai jing hochu Pathen jajing le gingjing, chule, phantom, phattou ding deimi ahiteiye. Chule, Pathen panpina jong achang teiye.

Mitamtah in ‘mipha chu lunghang lou dingmi phoh nomlou ding’ nati thei ahi. Hinla, nangin apha dana nagel le aphalou dana nagel chu Pathen gelbang hilou maithei ahi. Pathen jong alunghang jin, mi jong aphoh in, adengji. Ase chu thet ding, pho ding le den ding jong ahi. Aphalou chunga lunghan ding ahi. Nang naphatloule, mipha chun na phatlou chu adeilou jeh le naphat ding, apha nahetna dina napho ding adol ahi.

Houin kaijing mi chu, apet in pha joujai hih jongle, phatna, phattouna ahin neiteiye. Pathen in asempha teiji. Hijeh achu, Houin kai hi ngaisah tei ding ahi.

Bible in Houin kaiya, tahsan mi adang hoto Pathen houkhom ding le athu kichuh khom din eideiyuve. Hichu, Pathen lungdeiya tahsa le lhagaova phattouna ahi.

Houbungmi masa hojong akaikhomun, Solchah ho thuhil akihil khomun, Pakai anjon ( changlhah le lengpitui ) chankhomna, tao khomna le Pathen thangvah khomna aneijiuve(Acts 2:42, 46). Eihon jong amaho thilpha bol chu ijuidiu ahi. Amah on Houin ananei pouve. Hinla, mi in khat ham in akikhom jiuvin,  aki loikhomun, Pathen thu akihil un, taokhomna le pankhomna anei jiuve.

Hinla, Houbung kipattil jong chun kikhopkhomna ngaisahlou jong ana umuve. Bible in, hitobang miho banga chu umlouva, kaikhoma, kitilkhouto din eitemuve(Hebrews 10:25)

Houin kiti hi tahsante –

khat le khat kingailutto khomna mun ahi (1 John 4:12),

khat in khat atilkhouna mun ahi (Hebrews 3:13),

khat in khat angailutna avetsahna mun le thilpha kibolpeh-tona mun ahi (Hebrews 10:24),

Khat le khat kijentona, ki sasahtona mun ahi (Galatians 5:13),

Khat in khat ahilna mun ahi (Romans 15:14),

Kijatona mun ahi (Romans 12:10), chule,

Khat in adang khat alungset le khotona mun ahi (Ephesians 4:32).

Min Huhhing channa dia Jesu Christa hi tahsana akisan tengle ama chu Christa tipum (Houbung) mi  khat ( tibah lah a khat) hunghija ahitai (1 Corinthians 12:27). Tipumpi chun thil aboltheina dia tibah jouse chu aum le apan ngaiya ahi(1 Corinthians 12:14–20). Hiche banga chu, eiho jong Houin ikai diu, chule, moh kaimaimai hilouva, houkhomna, tokhomna, tohkhomna hoa pan tei ding; lhagao thilpeh le bolthei, Pathen in hitheina inei hou tokhom ding ahi (Ephesians 4:11–13).

Tahsanmi khat chu midang to pangkhom louvin apilhing theipoi. Mijousen midang panpina angaicha cheh e (1 Corinthians 12:21–26).

Hijeh chun, Houin kai le pan lahkhom hi gunchu tah a bolding ahi. Hapta she hama beh bolteitei jeng ding ahi. Na Kipana le nahet hochu miteto changkhomin, chule, midang ho hetna le kipana jong chu chankhompin. Pathen thu naseithei ho seiyin, midang ho sei jong gunchu tah in ngaiyin.

Jesu hi Houbung dia ‘inning khompipen’ ahi (1 Peter 2:6). Eiho jong song hing jing tobanga Lhagao in khat’a kisadoh a Thempu thengloi hiding, Jesu Christa jal’a Pathen santhei dol’a kilhaina Lhagao thilto toh ding i-hiuve.(1 Peter 2:5).

Hijehchun, hoiai muna um jong lechun, tahsanmi hoto gunchu tah in Houin kaikhomin, pang khom jingin.

Houin nakaina akonin Pathen in phatthei naboh jing tahen.