Tuesday, 27 January 2015

PHAT KICHAI KON AHITAI KIGOSAN UMIN

Phat kichaiding naithu Bible in eiseipeh jinguve.
“Vannoi leiset le athil ngaichat lunggul abeikon ahitan, Pathen lungdei lam bol’a vang chu tonsot’a um jing ding ahi.” (1John 2:17)
“Chapangte, nidan nukhah ahitan, Christa doupa hung ding najah banguvin, tun Christa douho tampi asohdoh tauve; hichea kon hin nidan nukhah ahi ihetauve” (1 John 2:18)
Phat kichai ding anaitai. Christa tahsa tah a hung kit kah tilouva tutua jong nang le kei dia phat kichai jingthei ahi. Nitin le nidan tina mihem tahtah dia phat kichai jing  ahi jong iheuve. 

 Nang phat nai dehset thei ahi. Nitinin mihem athi jinge. Tukhang deh in khantouna asangin, kisuhkhah, kisukha-to atamtai. Mihem in asem manchah hoa kona kisukha a thi apung in, natna jong atam cheh cheh in, natna kidang, jendammo apunge.
Tuan a hoina,hatna, chihna, thepna hole, na in, nagou, chule, na thuneina le na dei,du, gut, thanopna, kipana le leiset a na ijakai jouse nathiteng apanna beitading ahi.
Ipia naki losetpi ham? Ipi nakisahlelpi val jenga na Pakai lungdei gelphalou le kisahlelpi manlou leuva na umji ham?
Athupipen, Pathen le alungdei hol bou hi ahi. Adang jouse hi bei paiding ahitai. Pathen le Athu, aloupina le alalna vang tonsot a manglou ding ahi.
Amato nakikhutjopna jouse chu tonsot a manglou ding, alunglhaina naboljouse kipaman tonsot adia namu ding ahi.
Hijehchun, amang loiding na kisahlelpina chu sulhom in lang, tonsot adding ho joh chu kisahlelpi tamcheh cheh in. Hichu, tonsot a na na hinpi (enjoy) ding ahijoi.
Hijehchun, Christa tahsanlou le aminmaiya tahsan, atah hilou ho bangin umpoute.
“ Amaho hi ilah-uva kona potdoh ahiuvin, eiho lah a vang apang pouve; eiho lah a pang hileu ium-khom jing diu ahi; ilah-uva apan louvu akiphondoh theina dia potdoh ahitauve.
Nang ho vang Athengpa thaonu changkha nahiuvin, hijeh chun ijakai nahesoh keiyui.
Thu-tah nahet loujeh-uva nahenguva kahinsut ahipon, hiche nahet’uva, thujou ho hi thutah a kon ahilou nahet jeh-uva kahinsut ahibouve.
Jesu chu Christa hisah louva seileppa jousei ahiloule koi dangba hiding ham ?
Chapa seilep jousen Pa aneilou ahin, Chapa phongdoh jousen vang Pa anei ahi.
Nang hon semtil’a pat najah-sau chu nasunguva um jing hen; semtil’a pat najahsau nasunguva aum vang le, nang ho jong Chapa le Pa sunga um jing nahiuve. Amatah-in eitep’u athutep chu tonsot’a hinna hi ahi.Hicheng hi nang ho lhem lhaji ho thudol’a kahinsut ahitai.
Nang hon vang ama thaonu chu nakisan’uva, nasunguva aum jeh-in, nahil diu midang koima na-ngaicha pouve; amaa kona naneiyu thaonu chu thutah hiya, jousei ahilou-jeh-in, ijakai thudol nahilsoh nau-ve. Hijeh chun aman nahil bangun amasunga um jinguvin.
Chule tun chate, ama ahung kilah teng kisonna ineiyuva, ahungkit tengle maimohna inei louna diuvin, ama sunga um jing jenguvin. Ama chu adihje nahet’ule, adih bol jouse hi amaa kona pengdoh ahidol jong nahet diu ahi.” ( 1 John 2:19-29)
Athu hethema, nit a le mangcha hithei din Pathen in napanpi henlang, hinkho sunga jong ‘hingjing hinkho’ maga le leiset hinkho kichaini jongle tonsot geiya Amato changkhom thei din Christa Lhagaovin na panpi jing ta hen.


No comments:

Post a Comment