Ngailut Pathen in Ama Ngailute Lheplhah a Umding Aphalpoi

Nadeitah nagol khat jong chu Milhempun ahin manchah jingthei ahi. Chingtheiyin. Na dongma to nakhenthei. Naji to nakhenthei. Nanu-napa to nakhenthei. Na simmun phalaiya kona napui chatvaithei. Natohna phalai nasuhsetpeh thei jing ahi.

Namel-hoina, mideichom nahina, nanunchan phalai nasuhsetpeh jing thei ahi.

KIDOUNA SEMA JESU HUNGA AHINA

Apen masangpeh in Themgao hon, ahung peng ding Jesu chu ‘Chamna Lengchapa’ (Prince of Peace) tin anaseiyuve. Ama (Jesu) aseina ahin vang ‘Chamna hilouva, kidouna sema hung’ in akiseiye. 

Jesu’n aseiye “Leiset chunga chambol’a hungin neigel dauvin, chambolma lah chemjama kidouna dinga hung kahibouve.”  

“Ajeh chu pa le chapa kidousah a, nu le chanu kidousah ding, tehpi leh mounu kidousah dinga hung kahibouve. Mihem dia amelma khohpen tahchu a-insung mi ma ma hiding ahi.” (Matthew 10:34-36)

Ahile, hoi joh chu dih ding hitam?

Jesu hi Pathen ahi ( Chapa Pathen ahi). Pathen in jou asei ngaipoi.

Themgao ho chu Pathen lhacha ahiuvin, seidia Pathen in aseipeh chacha bou aseijiu ahi.  Themgao kama kisei ho chu Pathen sei ahi. Pathen in jou asei ngaipoi. Themgao hon jong jou seipouvinte. 

Achutile, Pathen thusei chu akikala hitam?

TAHSA LE LHAGAO DAMNA DIA JESU VET JING DING AHI

Leiset hi anom le ahahsa umhal jingna ahi. Jesu vet jing bou dam jingna le phattou jingna ahi.

Dam jingna din ‘Damtheina dan’ jui angaiyin, kipana din ‘Kipana dan’, ‘Haona din ‘haona dan’, ‘chihna dan’ ‘ Thepna dan’, ‘hatna dan’ aum cheh e.  ‘Dan pha’ jouse juikina pen’ chu ‘Pathen lungdeiya um’ ahi.

PHAT KICHAI KON AHITAI KIGOSAN UMIN

Phat kichaiding naithu Bible in eiseipeh jinguve.

“Vannoi leiset le athil ngaichat lunggul abeikon ahitan, Pathen lungdei lam bol’a vang chu tonsot’a um jing ding ahi.” (1John 2:17)

“Chapangte, nidan nukhah ahitan, Christa doupa hung ding najah banguvin, tun Christa douho tampi asohdoh tauve; hichea kon hin nidan nukhah ahi ihetauve” (1 John 2:18)

Phat kichai ding anaitai. Christa tahsa tah a hung kit kah tilouva tutua jong nang le kei dia phat kichai jingthei ahi. Nitin le nidan tina mihem tahtah dia phat kichai jing  ahi jong iheuve. 

Lungdong Louvin Pakaiya Kingai Jengin

“Bol gentheiya umtedia Pakai hi kiselna kulpi ahin, hesoh genthei pet’a hoidohna mun ahi.” (Psalms 9:9) - 

Ipi’n nabolgentheiyem? Lunggimna ham?

 Insung,loi le gol kah, Lekhasimna, natohna, Lhagao lam, Tahsa chunga hahsatna umam?

Pakaiya kingaiyin,hahsatna jouse Ama kom lhut in, pedoh in, kinem in, amusan kigelin, selmo,suhbeimo,suhdammo, semphatmo  aneipoi, Ama nasonjoule abona asela, alahmang ding- na chonsetna, pohgih,hahsat-gentheina. 

HOUIN KAI HI NGAIKHOH AHI

Houin kai jingin – nadamna ding, naphattouna ding, nakipana ding ahi.

Houin kai hi moh maimai thu ahipoi. Ajehchu, Pathen houna le kouna mun ahi. Houin kai jing jouse  aphai tina ahipoi. Hinla, houin kai jingthei chu tahsanna neiya le Pathen ngaicha jing, anun chingtup nom ahi.

NATNA GIHSA NANEI JENG EM?

Navangset le nasuhkhel jeh a dammo hilouva Pathen loupi kiphonna ding, Jesu Christa a Pathen loupina kilahdohna dia dammo nahi maithei ahi.

Jesu leiya alenlaiyin, dammo kidang khat avetsah un, ipi asuhkhel jeh a dammo ham adong un ahi. Aseiyu chu , “Jesun ajah phat in, “Hiche natna (dammona) hi thina ding ahipoi; Pathen loupina ding, Pathen Chapa choi-at a aumna ding joh ahijoi” tin aseitai.( John 11:4)

Hiche aseijou chun, Jesun adammona jouse aboldam peh tai.

Hijehchun, nang jong, ijemtia 'natna nei' nahi jengle, moh lunggim louvin, gunchu tah in taovin Jesu Christa kou jon.

JESUN LHATNA KIN ACHAISA AHITAI, KISAN IN

Chonset in mihem jouse hi khat cheh a hi ‘soh banga’ ahena, athua anunsah ahi. Jesu Christa hin, hiche chonset-soh a kona hi eilhatdohnau kin chu achaisa ahitai. Hinla, mimal tin hin eima ding cheh’a kisan ngaiya ahi.  Chule, hiche Jesu tohga chu santheina dia ‘achang thei dingdol chu hithei (lhin) ngaiya ahi’.

AKOM BEL JOUSE PATHEN IN APANPIJI

Thupha choiya, Akom jonjouse Pathen in achonsetna jouse angaidamji.

Bible in jong aseisa ahi- Eihon i-chonsetna chengseu (Pathen koma) i-phondoh’ule,  Ama (Pathen) hi tahsan umtah ahin, chule, i-chonsetna jouseu kidihtah a eingaidam’uva, i-suhkhelna jouseu jong asoptheng ding ahi (1 John 1:9 simin).  

Michonse nahi nakihet a, kisih a lung naheiya, chonset chu nadalhah (haisan) noma, Pathen koma ngaidam nathuma, panpina nathumle; Pathen in nachonsetna jouse angaidam ding, napanpi ding, chonset Jona le bolkit-tahlouna dia tha-hatna Lhagao Theng napeh ding ahi. Na hinkho, nanun-le-khan, na lim le namel nakhelpeh ding; nunthah- le-pha, lim le melt hah, hinkho-thah napeh ding ahi. Chutengle, nasuhkhel jouse nangaidam-to kilhona  nachunga lunghang miho jong nangaidamsah ding ahitai, nanunthah le na kisemphat amutengule.

Hinkho-thah achu kipana le hatna thah nanei ding, na lung mongjing ding, hinkho kipah a namantheiding ahitai.

Sepai Phatah Hin

Keima tahsan theiya eigel’a lhacha eipansah, thahat eipea i-Pakaiyu Jesu chunga kakipah lheh jenge.
Masang chun ataitom le abolse chule pumhat jengin kana-pangin, ahinla hiti ho chu atahsan lou kahijeh a hetoh louva kabol ahijeh-in Pathenin eihepin,
Jesu Christa jal’in i-Pakaiyu milungset chu tahsan le ngailut pumin keidin alet lha jengin ahi.
Chonsete huh-hing dinga Jesu Christa vannoiya ahung hi tahsan dinga lhingset thu ahi; chonset ho lah a keima akhoh pen kahin,
Ama hintahsan’a tonsot hinna nei ding ho vetkah a pang dia Jesu Christan thoh hatna chengse chu amasapen’a kei chunga phot-chetna abol nom jeh a hitia chu eihepi lheh jeng ahi.
Tonsot Leng-pa, thitih neilou, mutheilou Pathen khatseh chu jabolna le loupina ton-sot tonsot’in chang jing hen: Amen.

Achonsepen Aminphapen Sosahpan Nangjong Napanpi Nom e

Saul kitipa chu michonsepen tithei ahi. Christiante mana le amatsah a pang, Christiante that ho phatsahpi ana hi. Hinla, Pathen in achonset angaidamin, Amin akhelpeh in, ‘Paul’ asah in, Christa a mithah le thahattah aso in, ‘Solchah Paul’ tin akihetai. Pathen thusei jouse lah a nasapen, Jesu Christa manchah pipen ahung hitai.

Aman jong aseiye,

Pathen-to Kijopmatna ahi Tahsan Hi Thupipen Khat Ahi

Abram in Pathen atahsanin, Pathen phattheina achangin, Pathenin Amin jong akhelpeh in ‘Abraham’ asah tai.

Pathen in Amin Akhelpeh jouse hi thil kidang abolpehji.

Abraham chu ‘Mijouse phattheiboh channa’ ahisah tai. Hichu, akipatna in ‘chapa Isaac’ apen, tupa Jacob apeh. Jacob chu amin akhelpeh in ‘Israel’ asah tai.

Israel chu nam lentah ason, asunga ‘Juda’ chu alhengdoh kit in, Juda sunga konin ‘Huhhingpu’ Jesu Christa ahung peng tai.

Hiche ‘Jesu Christa’ hi Abraham sunga kona hungpeng ahin, Abraham mijouse phatthei channa ahung hina chu ‘Jesu Christa’ hin ahung guilhung (tahchang) tai.

Jesu Christa tahsan jalin kei jong kamin Pathen in  eikhelpeh in ‘Christian’ eisah tai.

Kei banga Jesu Christa tahsan jouse min akhelpeh in ‘Christian’ (Pathen Chate – John 1:12) eihisah cheh tauve.