Pathen in Anatoh Loupi Amusah Hohin Van Kipana Aneiji :

Kahinkhoa Pathen in anatoh loupi eimusah bang hin nang jong namusah tei ding kanom lheh jenge. Ajehchu, kipana tahbeh, Van kipana eineisahji.

Pakai Lhacha ho jui hi Ama kijui jing ahibouve.

Christmas 2012 le Christmas 2013 chu Christa tahsanlou ho lah, Sibergool le Bodrogool khoa Pastor H.Haolai-to kaman ahi. Christa tahsan khatcha umlou ahin; kacheu chun, amuna um Missionary Pastor L.Chorei-to kavah leuvin, in kachonun, chule, a Pathen hounau in lhan tobanga inneocha kisong jong kagaveuve. Hiche in sunga chu koima lut phallou ahi. Pathen jalin kei din lampi khat aume. Thuso bolmi kahi aheuvin, Lim kalah lele jalchun kaluttheiye. Koima kaseipeh poi. Camera choiyin asunga kalut in Lim kalan, chule, chomcha taona kaneiye.

Kataona chu hitobang hi ahi : “Pakai, van le leiset le asunga ijakai Sempa, eisempau Pathen tah khatseh, chonset akona ei huhdohpau nahina hi hichelai mun, kho le khosung mite koma hin phongdoh in. Hiche in hi suthengin, nachenna sosah in. Nakoma kathum jing ‘India gam adeh in keiho chenna NE gam hi na Lenggam sosah in, na Lenggam naso neimusah in katijing bangin, tuhin hichelai mun hi na lenggam sosah inlang, nasosah jong neimusah in, ka Pakai Jesu naminin, Amen” ti tobang in kana taove.

Pastor le Hou lhacha jong kahipoi. Hinla, Pathen in eiumipi jing le eimanchah jing bangin, phatpha eipen Pastorpu lungsunga na atongin eipuileji. Hichu, ‘chance’ pha ahin, theisunin, mihetlouvin Pakaiyin pan eilahsahji.

Ima vang katohdoh kahepoi. Bible le track phabep vang kumthum – kumli sungin eihopdoh sah in, Pastor le Hou natong hogei jong eipehsah in, manchah in aneiyuve. Keima panlah koiman ahepon, kalahna jong seithei le hetthei kham ahipon, guhthima kibol hi Pakai tailouvin ahepon, phatthei boh kham jong hiponte. Hinla, mission ahung lolhin hi keima din kipana ahin, koima hetpeh louvin kipana sangtah kaneiyin, ‘nunnopna’ eipeh in kamuji.

2012 Christmas chun mihem khatcha Christa tahsan umlou ahi. Hinla, kalungsunga chun tahsanna le kinepna lentah Pakaiyin eipen ahi. Thil umdan hole houlimna kaneipi ho lung kalahna hoa kamu dol chun eitilkhou lheh jengin ahi. Sibergool khoa Teacher khat lele aneipau, mijouse ja-a koma kaseichu :

“Ven, milui nahiuvin, nanghon Bangla nasimun, nang beh in teacher mun namunai. Nachate houhin Bangla simuntin, iti thep jongleur apao neite tetlha pouvintin, ima ahin mat-loudiu ahi” kati chun alu bongdehdeh in asutai. Hichu phaje kasan, kahoulim betai: “Chi le namkhat ihiuve. Napao namangin kenvang abonin kahei. Nangin keipao hi akehkhatbeh kahei. Chi le nam chule chonna sema jong hi eiho eisemuva, van le leiset sempa Pathen khatseh chu ahi. Nangma Pathen, keima Pathen ti achom aumpoi. Pathen chom ineilai seuva Pathen khatseh chu kihoukhaloilai ahi.

Pathen tah khatseh hin ijakai abolthei ahi. Mijouse asemsa achate ihiuve. Hinla, chi khat- namkhat hohi chengkhoma kinaiya chenga pangkhom ding, khangtou khom dia eisemu ahi. Nasopite kahiuvin, keihon, tukhanga vannoi pumpi jui le chonna Chistian hinkho kajuiyu ahitai. Hungin, hung ven.

Pathen khatseh chu keihon kamuva, kahetu ahitai. Chule, Ama hi kahouvu ahitai. Ama hi Pathen dihtah khatseh chu ahin, Ngailutna a dim Pathen ahi. Ama kahoujaluva, nang ho jong, sopi khat ihinauva ngailutna jala kahung vilu nahiuve.

Nachateu English simsah un, chutile, midang ho banga khantouna nanei diu ahi. Bangla nasimu hin India pumpi a manthei jong hilou pao neo ahi. Nachateu chu Delhi, Mumbai, Chennai, chule Guwahati jeng jong lhat hahsa asah diu ahi. Iti midang hoto ‘Competition’ aboltheidiu, iti midang hoto hinkhomthei diu ham?

English ahet’ule vannoi pumpi chihna le hetna aneithei diu, jat jouseto kihouthei diu, cheng khoma, kitet thei diu ahi” kati chun, aman “Hichu adihtah ahi, keiho dia phapen ahi. Nei panpiuvin” ahintitai.

Hichun, “Ven tua hi Englidh simna ding School kaphu diu ahi. Nachateu hinsolun. Bible jong simun. Christian hin jop un. Hichu tahsa le lhagaova phatna, Pathen phattheiboh channa ahi. Kei ho jong Christian hikha hih leuvang hichan kaphah lou diu, nang ho jong kahungvil theilou diu ahi” katile dih asan akipah lheh jenge.

Housa le upa le lamkai dang ho kahoulimpina olle hin songe.

 Pathen jalin, amuna natong ho Pakaiyin hatna apen tanglou helin na atongun, mission alolhing pantai.

2013 sungin tahsa thah baptize chang insung khat ahung umin; tukum 2014 sungin insung ni aumkit tai.Tu Pathen ni (December 14, 2014) velchun insungkhat baptize achang tauve.   Loupina Pakai chang jing tahen.

Keima ima in pang hih jongleng, Alhacha ho nung kajuina mission lolhinna mun avillah a pangkha theiya eikoipa Pa Pathen, Chapa Pathen le Lhagao Theng Pathen, Pathen dihtah khatseh chu Amin ka thangvah in ahi.

Hichelai mun le gamthim danga gamankit kanom lheh e. Hinla, tukum beh hi eima Houbung mite le insung mite to mankhom ding kanom e. Ajehchu, Hou-in jolouva kum kuo ana um chu tukumin Pathen jalin, akisalui chu akehkhat suse in, athah mong mong banga sah phat le jona uma thenso thei ahitai. Thensona kin jong gontup ahitai. Tua lamkai ho Pathen in apanpin, Houbung mite jong pankhomna thei eipeuvin, Amin thangvah khom ding hi ngah-lela kium ahitai. Inmuna kin hoitah man jong hi aveltoma tahsalou ho mudia Pathen Christa phondohna ahi. Chule, chapang neo ho seipehna le vetsahna jong ahi.

Pathen Hou-in kisahna a, keima ima hihih jongleng, asaho lah a pangkha theiya eikoipa Pathen hi Amin ka thangvah in ahi.

Nang jong, Pathen in panpinlang, Alenggama pan lahna hoa hi misimkham hihih jongle ana pangkha thei beh in Pathen in napanpi jing ding kataona ahi. Ajehchu, hitia pankhah jeng jong hi, koiman eihetpeh kham hihih jongle, eima sunggila ‘Van Kipana’ channa ahi.

Pathen in umpi jingtan.