JESU PENNA MIHO PATHEN IN APANPIJI

Themgao Isaiah in, Jesu Christa penna miho Pathen in apanpi dan hi Pathen kom’a aseiye,

 “Nangin anamkoljonu navoh boh peh-in, Ajepnau tenggol jong naheh bongtai.

 Midian sepaite nasuhgam bangin, Namite bolgima kichepna nei nam mite najoutai.” (Isaiah 9:4)

‘Jesu penna mi’ tihi ‘Jesu Christa Huhhingpu le Pakaiya kisan ho’ ahiuve.

‘Midian sepaite’ chun Israelte ana bolgenteiyu ahi’n. Hinla, Jesu Christa ahintahsan jouse vang Pathen in Abolgenthei ho jouse khut’a kona ahuhdohji ahi.

Nangla, ipin nabolgenthei em? Ipi ham nalunggimpi? Ipi ham na dammosah a? Na tahsa, na lunggel le na lhagao bolgentheiya, hinkho kipah’a namansah theilouva chu ipi, ipipi ham?

Hicheho jousea kona na huhdoh din, Jesu Christa hi kouvin. Taovin. Ngeh in.

Leiset chunga eiho hahsatna, gentheina, lungjinna, natna le boina jouse hi ‘vannoiya muthima vaihompa, chonset bulpi, Satan’ hi ahi. Satan in, mimasapen Adam le Eve alhep lhah a kona achilhah jouseu chunga hi thu aneiya ei bolgimu ahi. Hijehchun, Jesu Christa koma hi chonset-soh ihiu, chonsetna nei, chonse ihiu hi kiphonna, hiche chonset akona hi ei Huhhing dia kikou ding ahi. Ama hi Huhhingpu le Pakai dia kitem ding, kisanna hi kamchenga, taona’a phondoh ding, lunga tahsanna lhingset a Ama’a kingap ding ahi. Chule, tahsa, lunggel le lhagaova hahsatna jouse jong ei jopeh dia ngeh ding ahi. Chule, nangma hatna le chihna’a imatih’a chonset le lhepna, hahsatna, natna hohi najolou ding ahi kihet inlang, Aman najopeh din ngeh in. Na hinkho Aman achintup’a, Adei lama napui din pedoh in. Chutengle, Jesu Christa hin na hahsatna jouse abanbana najopeh ding. Nikho chomcha sunga hinkho nakhelpeh ding, kidang nasah ding ahi.

Hitia, na kilhana, Jesu nakisan nia pat chun, lha louvin, nitinin Bible sim teiteiyin; chule, tao jing jengin. Hitia hi nabolle, ana ven – na kikhel hel jeng ding ahi. Kipana simjoulou nanei ding ahi.

Pathen in panpi jingtan.