Pathen Lenggam Kisanin

     

Jesu Christa leiya ahung chun Pathen Lenggam thu ahung lhangsam in ahi (Mk.1:14-15). Athuhil hi tukhanga mite hin hetthem hahsa jongle, hiche khang mite dinga vang chu het-hahsalou tah ahi. Ajehchu, masanga gamsung kivaipohna chu ‘Leng’ khat vaihopna noiya um ahicheh e. Hiche ‘Leng’ thaneina le vaihopna gam khat chu ‘Lenggam’ ahi. Gamsunga mijouse le thiljouse chu ‘Lengpa’ thuthu ahi.

Lengphalou hon midang thil jong anople alahpeh jengji ahi. Aneipa chun apehnomlou jongle, a sepai ho agoiya, hunama, alahpeh jengji ahi. Lengphalou tampin, gamsunga mi jong anop nop amatsah a, a pathen’u lhaina a jong atha jengji ahi. Chule, Lengpa douna a pang jouse vang songkula akhuma, tha jong atha jengji ahi. Migam le nei legou dang jong alahpeh jengji ahi.

Lengpha hon vang ngailutnan vai ahomin, agam sunga lungmonna aumin, mipi akipahji.

Pakai Jesu sei ‘Pathen Lenggam’ hi ‘Vana Lenggam’ jong kiti. Ajehchu, Jesu lhangsap ‘Lenggam’ hi leiset lenggam banga ‘gambung’ vaihopna le Mihem banga Leng umna thu ahipoi. ‘Pathen Lenggam’ chu - Pathenin vana hihen vannoiya hijongle thil ijakai, mihem le ganhing, ju le va jouse chunga athaneina le avaihopna hi ahi. Hichu mihem khat’in ahettoh theina dinga Jesu Christa tahsanna dihtah neiya mithah soh ding, Pathen vaihomna noi le asunga bulhingset’a akipehlut ding angaiye.

        Pathen Lenggam hidan chu Pathen leiset’a hung kumlha-a athaneina le aloupina phondoh-a, agiloupa le apet’a leiset gitlouna akheldoh hi ahipen’e.

 Hetbaina ding chu –

Pathen Cha le ALenggam Mi Nahi nah em?

1.    Tunin, khat ‘Tupet a Vai ahopna’ seiyute. Tupet’a leiya Pathen Lenggam chu Jesu Christa leiya ahung’a leiset’a amite lungsung le amite lah-a Lhagaova vai ahopna hi ahi. (Jn.14:23; 20:22).

Hitobang mite lah achu napan hinam?

 Nahinkho kimanna, nanun le na khosahna, anneh le don, natoh-na thilgon hoa chu Pathen in vai ahopnah em? Pathen lungdeidol hinam? Jesu Christa thuhil-to kitoh’a nachon nah em? Ole, nangma thuthu le nangma deideiya kipo nahi jeng em?

Na hinkhoa chu Jesu’n mun aneida jeng em?

Ole, Pathen Lenggam a umlouva, nangma lenggama uma nahi jeng em?

Lhagao hinkhoa hin Lenggam ni bou aume:

(1) Pathen Lenggam a umin               , (2) Satan Lenggam aume.

Pathen thuneina, vaihopna, athua nunna, alungdei kibolna mun chu Pathen Lenggam ahin. Athua nung ho chu Alenggam mite ahiuve.

Pathen Lenggam hilou jouse chu ‘Satan Lenggam’ ahijenge. Mihem mitmu le hetdola ase le aphalou kiti ho keu hi Satan vaihopna ahipoi. Pathen lungdei umlouna jouse chu ‘Pathen a hilou, Satan a’ ahi jenge.

Pathen lungdei chu ipi ham?

Pathen lungdei chu, Ama tonsot a hingjing ahibanga, mijousen ‘tonsot-hinna’ anei diu hi ahi.

‘Tonsot-hinna’ chu ipi ham?

Ama, Pathen tah khatseh le ahinsol Jesu Christa tahsan hi ‘tonsot-hinna’ ahi. Bible’a Jesu’n Pa koma ataona in aseidoh’e :

 “Pathen tah khatseh Nang le nahinsol Jesu Christa ahet diu hi tonsot hinna ahi.” (John 17:3)

Pathen Lenggam a hi nakisana chengthei dia ‘tonsot-hinna’ chu nachan tah ding kakineme. Ijemtia kisan loulai nahile, tuhin kisan jengin. Jesu Christa hi taonan kouvin. Na dinga athi chu kipathu seiyin. Chule, na hinkhoa thunei le vaihoma, athuthua napui din kipethengin. Na Lengpa hijinga, na chunga vai hom jing din temin.

Pathen in panpi jingtan.