Leiset Boina Peldoh in

Bible seibangin, leiset hi aboiye. Tijat umtahtah asoh jinge. Mitamtah lungnatah le lunggimin aumin, kinepna neilouva thidehdeh, chule athi jong atame. Natna jatchomchom adimset in, jendammo atame. Adeh a, natna tijat-umpen ‘Setna, Chonset’ kiti hin mijouse adammo sah cheh in ahi(Ecclesiastes 7:20; Romans 3:10-18,23). Hiche ‘Setna’ natna hin mijouse aphah jeh in, eiho jouse i-kilhemtovin, khat in khat atha atame. Chule, hiche Natna ‘Setna’ jeh hin, khat natna le thohna ding tampi boldohna aumin, eima tah thohna, gimna, natna ding kiboldoh akidimin ahi(Romans 1:29-32). 

Chonset natna jeh hin, mihem jouse le thilsem dang jouse jong hahsatna toh in aumjingtai (Genesis 2:16-17; 3:1-24; Romans 5:12; 8:19-22).

Setna hivei jeh hin, eingailupenuva, eisempau Pathen to chengkhom, hingkhom theilouvin i-um gamtaove (Psalm 51:4; Ephesians 2:12).

Setna hivei hin aphahlou koima aumpoi (Romans 3:10-12).

Bible inla, setna hivei neijouse thiteitei ding ahi kichehtah in aseiye (Ezekiel 18:4). Achutile, mijouse hila setna hivei neicheh ihiuvin, thohgimna, gotna, thina chu i-tocheh diu ahin; tonsot Damun (Meidil) “Athan-la thilou, Meikong-la mit-lou” (Mark 9:48) kiti chu ichan teidiuva um ahitai.

Hinla, kinepna i-neiyuve. Huhhingpu a umnai. 

Bible in eihiluve. Huhhingpu,Jesu Christa chu Muthim-soh le lhagao-natna, chule tonsot-thina akona mihemte lha-ong dia hunga ahi. Ama hi Pathen Chapa ahi – atahbeh in Ama Pathen ahi(John 1:1-17). Ama chu muntheng chungnung, Setna hivei (Chonset) kiti umlouna vana kona hunga ahi (Psalm 84:1-2). Ama Athenga ahijalin, koima mihem in aboltheilou ho boltheina tha-hat neiya ahi. Hijehchun, kithoina theng hidin Amatah ahung kiphalin akipetai (Isaiah 53:5; Hebrews 9:22). Ama atheng, setna neilou ahijala, Pathen ‘Dan’ thupeh chu abulhitsahthei ahi (Dan juikim thei Ama bou ahi) jala chonset thoidamna chu abolthei ahi (Leviticus 16:30; Exodus 12:5; 1 Peter 1:19). Amachamtah a kipethengin, chonset thoidaman ahinna apen, chonset jeh a ithidiuva um (i-bat’u chu) ahung salhatai. Athina chu eiho thiding khela hungthi, eiho thiding khela man pehdingdol chu asahlhah ahitai (Romans 5:6-8). Hichu, Ama le ngailutna jala lhatdohna kin atoh tahsana sangjouse chu tonsot a hinna neiding ahitaove (John 3:16). Ama tahsan jouse chu Ama thenna achu kivon a, Pathen-to kiguijop ahitaove(Romans 5:18).

Jesu Christa jala Pathen-to kiguijopna neijouse chu ‘boina jouse’ peldoh a, thina akona hinna a galkai ahitaove.

Nang jong nahitah ding kakineme. Nachan loulai-le, tutah hin, Jesu chu kouvin. Taonan kouvin, sangin. Tonsot a Pathen-to chengkhom din kisanin.