Gollhang Mantam

Gollhang John Mark thua hin kihilna phatah, achomjep kamudoh aume. Ama hi tulaiya ‘Journalist, photographer’ ho dan dan hidin kagelji. Theology hon ‘Kipana Thupha’ (Gospel) Li ho lah a, akisun masapen hi ‘Mark sut Kipana Thupha’ hi ahi tin aseiyuve. Aseidanu :- ‘Mark’ sunpa hi John Mark ahi. Ama hi Magdalene akon Mary sopipa ahi. Jesu le aseijuite chu amau ina hin apansa jiuve. Hijeh chun, gollhang ‘John Mark hin Jesu hi ana juiji ahi. Ja-an nukhah amannau jong amau in hi ahijeh in, Gethsemane ajot un jong ajuiyin, Mat a aum jong chun ajuiye tivang, John Mark tah in aseiye. Simute :

“Mar 14:43 Jesun thu asei nalaiyin, som le ni lah a khat, Judas chu Thempu pipu ho le Danthu themhoa kona, chemjam le moltum thoa hung miho chutoh ahung paitai. Ape-doh pan miho melchihna ahil masan, “Kachop pen pen chu Ama ahi, manun lang kitup keichan kai mang tauvin,” ati.
Judas ahung lhunin Jesu ajon paiyin, “Rabbi,” tin achoptai. Mihon achung’ah khut alhauvin amantauve. Akoma ding ho khat chun chemjam asatdoh-in Thempu-len sohpa asat jeng leh abilkol asat lhai.
Hichun Jesun ajah-uvah, “Gucha michom man ding banga, Kei man dia chemjam le moltum thoa hungkon nahiu ong? Niseh a Houina thu kahil chunla neiman pouvin. Amavang Pathen lekha- bua kiseisa thu guilhung hiya hi,” ati.Chutah-in aloiten adalhauvin ajamtauve.
(14:51) Tupat ponnem khatseh sil gollhang khat Jesu nungjui ahin, ama hi amat’u leh, (14:52) tupat ponnem chu dalhan asagoh keovin ajam mangtai.” (Mark 14: 43-52)

Hiche chang 51,52 a kisei gollhangpa hi, asunpa, John Mark kitipa hi ahi tin aseiyuve.

John Mark hi seijui som le niho lah a pang ahipoi. Hinla, a-u numeiteni Jesu jenlea apanjing jaluva, Jesu juijing anahi. Jesu thijouva, seijuite ho Solchah ahung kiti nunguva jong anajuijing ahi. Solchah Paul le Barnaba jong anajuiye. Thusei themtah le Miho tilkoujing Barnaba jong hi Mary Madalene insungmi ahin aseiyuve. Hijeh ahi, Barnaba hin John Mark hi ana puiji ahi. Missionary kholjinna masa chun Paul le Barnaba hi John Mark in ana dalhan ahile, Paul alunghang in, kholjin niveichanna in Paul le Barnaba akikhel lotai. Ajehchu, Barnaba hin John Mark hi manthei ahi ahei. Hijehchun, Paul jui talouvin, Barnaba chun John Mark ana kivoppitai. John Mark hin Peter jong ana juijing hinte.

Hitichun, lekhabua semdia, Pakai Jesu hinkho le Anatoh, athigei thu hi, ana sun masapenin, gollhang mantam John Mark hin anasun tai. Ama sutna akona hi adang hohin alah’uva asutbebeu ahi, tin akiseitai.

Golte, kaseinom khat aume. Houbung lamkai, Pastor le Solchah hi angaideh poi. Christa nungjui nahi’na achun, ipi natong hijong leuhen, Pathen natong phatah ihithei jinguve. John Mark bang hin, koiman eihe hih jongleur, nitinin, Jesu Christa nung hi jui jingute – nitina Bible simin, tao jingute. Houbung mite lah a pangjingin, Hou-in kaina lhapoute. Pastor hole Houbung lamkai dang ho panpiute. Natoh, tolom peh, kikhopna hoa thei sunin pangute. Bible isimhou midang seipeh nan mang jingute. Na FB in nitinin Bible chang khat beh koi jingin.

Pathen alunglhai-le, John Mark banga Pathen kin loupitah khat a panlahna ei neisah jengtheiyu ahi.

Pathen in panpi jingtan.