Friday, 19 September 2014

Khat le Khat Kitaopeh Ding

“Nalah-uva adammo um am? Ama chun Houbung upate kouhen, amahon ama chu Pakai minin thao nu’hen, taopeh-u hen.
15 Chutile tahsan jal’a taona chun adammopa chu ahuhdoh a, Pakaiyin ama akaithou ding, chonsetna abol khah jongle hichu ngaidam chang ding ahi.
16 Hijeh chun nadam theina dingun khat’in khat koma nachonset phongun lang, khat le khat kitaopeh to’uvin. Midih mitao-peh na chu nasatah a natong thei ahi.” -
James (Jacob) 5:14

Taona tha-hat dan hetding. Chule, Houbung lamkaiya kilhengdoh hi manlutah ahi het angaiye. Lhendoh a na-umle kipah in, na mopohna chu ngaisah in, phatechan tongin.Mipi kingaina khat nahi jala, milham sanga, Pathen panpina tampi nachan thei ahi. Hijeh achu, Solchah Paul in Houbung lah a lamkaiya pangnom chu thilpha tup a asei ahi. Hinla, na lamkaina chu mangkhel hih in, milham sanga nachungthu kitanna nasajo ding ahi kihet in.

Houbung miten hetding chu, Houbung lamkaiya kilhengsa chu Pathen lhena sanding ahi. Ama chu ima behseh hihih jongle, Lamkai ahina mina Pathen kin abolna chu jading, sonding le tahsan ding ahi.
Vetsahnan, HB Upa khat chu Hou-in kai nom behseh lou, achatvaina kisei jing ham  hijongle, HB Upa ahina mina HB thalhenga kinkhat abol, taona ham aman chu lutah le  ja-umtah ahi. Ajehchu, Ama mimal le ahitheina’a bol hilouva, HB Upa ahina jala chu ataona chu athenga le ja-um ahi. Ama mije le anun phalou chuto HB Upa ahina mina athilbol chu vetbeh louding ahi. 
Hiche kaseilona hi : tulai hin, natna kidangdom ham aumtengle, HB lamkai mandan helouva, tahsanlou ho Thempu bela i-um sausauvun kahei.
Christian nahija taona a nakison joulou chu, na Pathen tahsanna chu ipi hija ham?
Houbung lamkaipa chu natahsa jal hilouva, Pathen natahsan jala, taona chu nason ding ngaiya ahi.
Hiche hi, Bible thusei kasei ahi: 
James (Jacob) 5:14 “Nalah-uva adammo um am? Ama chun Houbung upate kouhen, amahon ama chu Pakai minin thao nu’hen, taopeh-u hen.
15 Chutile tahsan jal’a taona chun adammopa chu ahuhdoh a, Pakaiyin ama akaithou ding, chonsetna abol khah jongle hichu ngaidam chang ding ahi.
16 Hijeh chun nadam theina dingun khat’in khat koma nachonset phongun lang, khat le khat kitaopeh to’uvin. Midih mitao-peh na chu nasatah a natong thei ahi.”

Hiche hi, Houbung miten i-boldiu kanomin, katem nahiuve. HB Upa khel hihih jongle, Pastor, Evangelist, Deacon, chule, HB lamkai dang le Pathen thua kimangdom jong man ding ahi. Hicheho jong chu aumlounau mun ahitah-le, Christian khat, nagol hihen adang hijongle kitaosah in, nang jong taovin. Chutile, taona chu ‘natahsan jala Pathen in asan ding ahi. Tahsanlou bel louding ahi. Tahsanlou nabela, nadoh le nakijensah-le apathen’u chu nabel ahi kihet in.
Nanatna ham, nathil-gupa ham chu nahet ngaiyam?
Nadam ding, nathil namukit ding bou chu nangaichat hilou ham?
Keivang dammo jeh a kataoteng “Pakai, natna hi lamangin, damna neipen. Natna min le hoilaitah dammo ham het kangaipoi. Hejongleng ipi kalo deh ding ham? Damna bou kathum ahi” katiji.

TAHSAN kiti umje hi ‘Kingaina aneijou, ngansejou, ngansena lhingset neijou’ kiseina ahi.
Vetsahnan : Chapang chun apa atahsanna lhingset ahijeh in, “Hepa, changlhah neihin choh peh in” atile, ahinchoh teitei dinga atahsan jeng ahi. Adang jong aholbe tapon, koima dang koma jong “Nei choh peh in, ahiloule, janteng kaneh ding umloudi ahi” atitapoi. Midangin, “Changlhah kachohpeh di?” ati jongle, chapang konkhat vang chun “Ngailou, nilhah teng kapan ahinchoh ding ahi”atin, midang choh nehsangin, apatah in ahinchoh ding chu anomjoi. Apa chun, changlhah chohna ding sum anei le aneilou himhim agelpoi. Apan achoh ding ahi chu atahsan jeng ahi. Hoiya alahdi ham jong agelpoi. Nilhah kal angahlel in, nilhah ahitengle, changlhah aneh ding bou chu agelin ahi. Nilhah ahitengle adelin “Hepa, changlhah chu neipen” atin akhut asangji. Apa jong, michavai ahilou nahnah-le, achoteiteiji.

Hijeh achu, Pakai Jesu’n “Chapang tobang hiuvin” ati ahi. Chule, “Nathumu chu amusan kigel’un” ati ahi. Hichu, chapang umdan, Pakaiyin adei chu ahi.

Chule, HB lamkai jong hakibola, mi tahsan jou hiding angaiye. Chule, hiche bible changsei hi tahsanna lhingset neiya boldia katem nahiuve. Ahelou, houbung mite jong hetsah ding, tahsansah teiding tup ding ahi.
Hitia nabola, nataoteng chule, hitin taovin :
“Pakai, nalhacha dia lhinglou kahi, hinla, neingailutna jala nacha dia neisema, nalhacha dia neipansah jalin naming kathangvah e. Chule, nalhacha hinajala, nathua kamu banga, tahsanna lhinglou hijongleng, nathu hin aseibangin nakoma kahung taove. Keima neivelouvin, nangailutna jal le nathubu Bible thucheng jal in, kataona hi neisanpeh in. Hiche, nacha (Amin seidoh in) hi anatna jouse lahmangpeh inlang, nanga um damnakim chu hinpen, atahsa le alhagao hi damsah in, ka Pakai Jesu minin, Amen.”
Tao joutengle, adammopa/nu chu chibai bolin. Natna thudol chun houlimsot dantan. Nadalhah loiya, lung agela, pathen agel ding aphai. Umpi angai nahlai-le, thudang seipin.


No comments:

Post a Comment