Jesu Christa a Kipana Thupha Pehson

“Pathen chapa Jesu Christaa Kipana Thupha chu hitia kipan ahi. Isaiah Themgao lekhabua kisun “Ven keiman kasolle chu namasang’ah kasol’e, Aman nalampi semtohsa akoi ding ahi.” (Mark 1:1-2)

Mark sunpa John Mark hin alekhabu ‘Mark’ sunga asut jouse hi ‘Jesu Christa a Kipana Thupha’ ahi. Chule, hiche ‘Jesu Christa a Kipana Thupha’ hi masangpeh a Themgao hon ana seipat sau ahitai.

‘Jesu Christa a Kipana Thupha’ kipatna chu ‘Pakai Lampi semtoh dia Lhacha Themgao kisol’ hi ahi. Tuni geiya jong, aheloulai ho hetsah hi Christiante kin ahin, hiche hetsahna chu, ahelouai kihetsah ho dinga chu akipatna ahi. Masanga Themgao hon hichu ana sei jingsau ahin, Kitepna Thahkhanga din Themgao John Baptist in, Pakai Jesu hung kipat masang jep in aseikit e.

Jesu thi nungin Seijuite le Sollchah ho, chule, adang Pathen in ahin manchah hon ahinsei peh un; tuhin eihon jong ijauvin, ikisan taove. Aban seisonpeh ding hi eiho kin ahi.

‘Jesu Christa a Kipana Thupha’ hi nakisana Huhhingna chang nahitah-le, aheloulai ho hetsah in kipan in. Asei phong dan :

1.    Nanun Christa nun, athuhil bang hisah in. Chutile, tahsan lou hon, Christa mije nei nahiya, tahsanlou hoto nun le nangma nunchan chu adanglamna muvintin, ‘Jesu Christa a Kipana Thupha’ hi akisan thei diu ahi.

2.    ‘Jesu Christa a Kipana Thupha’ hi naloi legol, natohkhompi le adang ho seipeh in. Ipi tohna nei jong lechun nabolthei ahi. Facebook le Social Media dang jouse hoa seiphongin. Tahsanmi adang ho jong seikhompin, amah on jong aseiphongna diuvin seipehjin.

3.    Ahitheile, nangma tah aseiphong din kipethengin. Naseitheina din Bible themjilna neiyin. Themjilna nanei jouloule, Bible them Pasotor le adang ho lamkaina noiyin tongin, seiphongin.

4.    Nangma tah aseiphong dia kipetheng theilou nahija, naneiyin ato nahnah-le, aseiphong ding Missionary goiyin, asumsan ding tohdoh in, Houbung ho khut a, asumsan ding chu pelut in, amahon amakaiyuva, ahiljinguva, avettupna le kithopina dang ho aboltheina diuvin, nasum chu HB khut a koiyin. Chutile, nangma kisah-lelna le lungjinna ding umlou ding, sum nato bou chu hiding. Hichu, nangma ‘Jesu Christa a Kipana Thupha’ seiphonga pang nahiding, Pathen phatthei bohna, kipaman nasan ding ahi.

5.    Mimal tinin Missionary akigoi joupoi. Pankhoma, nei tokhoma solthei ahi. Chule, Houbunga Missionary tolom thei kham kham tojing jong hi panlahna khat ahi.

6.    Houbung a tolom tojing jong hi aseiphonga panna khat ahi. Adeh a, eiho lah a Houbung lamkai hon ajapenu, thildanga aman ngam behseh lou penu ‘Soma Khat’ jong hi todia phapen in kahei. Hiche hi, Pastor, Solchah le lhacha dang, Pathen thupha seiphong ho sumsanna kipe ahipene. Hichu natole ‘Jesu Christa a Kipana Thupha’ seiphonga pang nahi jing ahi. Bible ‘Kitepna Thah ‘ in asei le aseilou boipi angaipoi, Soma Khat le GMS tolom hi adanga kimanglou, ‘Jesu Christa a Kipana Thupha’ seiphong ho kipepen ahijeh a, atoh jouse aseiphonga panna ahipenin ahi.

7.    Genthei hahsa hijongle chun, ‘Jesu Christa a Kipana Thupha’ seiphong ho din taona nei jing lechun, aseiphonga pang nahi jing ahi. Mohmaimai taona hilou ding, anngola taona man jiji ding. Ahitheile, Thokit jingkah sehle ham, anngolin, naneh khel chun Anchang chakhon kehkhat ham, sum chengsom ham GMS tolomin pejin, gunchutah in tahsan louten tahsanna ahinneina diuvin taojingin.

Pathen in panpi jingtan.