Leng David Bangin Taojiute

 “ O Pakai, lung phamo jongle chun nei-engboldan, Lung hang jongle chun talen neimatsah hih-in! Abeipai ding kahitai, neikhoton Pakai! Kagu kachangin eichip’e, neidamsah-in!

Kapumpin kana behseh jenge, Kithopi louva itih chan neikoi nah lai ding ham?
Hungin neihuhhingin Pakai, Neikhoton thinaa konin neihuhdoh loiyin!
 Mithi gama nangma geldoh jong aumpon, Navahchoi theiya jong aumpouve.
Kaha nat behseh jeh-in beipai ding kahitan, Janseh a kaka kanan ka-ulsan kajalkhun alhop jin, Kalukhap jeng jong Kamit lhin akotsoh jitai.
Kamelmaten eikasah sah nauva konin Kamit athimlon, kho kamuchen theipoi.

Pakaiyin kataona asangtai, Kakoma konin migiloute potdoh jengun!
Panpi ngaicha kakouna ajatan, Kataona asan ding ahitai.
Kamelmaten thina khop’a jum le ja athoh diu, Kinloi tah a kisudonguva, Pathenin adelmang diu ahi.” (Psalms/ Labu 6:1-10)

Leng David, Pathen lhacha, Pathen in Lenga atun le Alhacha deilhen bon hitia, kipetheng le chonset ngaidam thuma ataova, themmo le hatmo akisah-le; nang le kei vang imacha ihipouve. Hinla, Pathen in eingailut’u ahi.  Chonset ngaidam thuma, hatmona le lhinlelna phonga, Akoma itaovule, eisang diuva kigo sadem ahi, I-Pakaiyu hi.

Nang le keidia, ‘Melma’ hi ‘gentheina, lolhinlouna, natna, vangsetna dang, chule, hahsatna dang jong hithei ahi. Ipi hitale, na lungimsah a, hahsatna napea chu nang dia ‘Melma’ ahi. Hiche ho jouse chu, nataona in Pathen koma phongdoh in.

Chule, Pathen lungdei nato joulouna, na hatmona, na lhinlelna, na chonsetna le adang Pathen dei naboljou louna jouse jong phongdoh in. Ngaidam thumin, nangma hatna a Alung natojoulou ding jong seiyinlang, napanpi din Lhagao Theng thum jingin.

Hijehchun, David bang hin phattinin tao jingute.

Pathen in nataona jouse nasanpeh jing tahen.