Chihna Thusei Ngaiyin Chihna Kisanin

Ngaiyun chihnan mi akouvin, Hetna achamtah-in akiphongtai.Chihna chu lamlen kom molvum, Lamsom dunga adinge! Khopi jot lutna, Kulpi kelkot dunga ahinkouvin;

 “Ka-ngeh nahiuve mihemte, Leiset’a cheng jouse kakouvui!: Lung bulhing lou nahiule bulhin gouvin, Ngol’a nahiule chih ding lung gel’un! Kasei ngeitah tah hi ngaiyun, Adih cheh kaseipeh nahiuve! Kasei hi thutah ahin, Jou kisei kahoi! Adih jeng kaseiyin, Adih loule hetkhel ding kaseipoi! Thugil hepa din akichensoh-in, Ima hethempa din akiselpoi!  Dangka sangin kahilna kisan’un, Sana thengsel sangin hetna kisan’un!  Kei hi chihna kahin, sana jempah sanga phajo kahi; Imachatoh neite theipouvin nate!  Chihna kahin, kahegil’e! Kahen kathutan akitup’e!  Pakai jabol dingan thilse thet ding, Kiletsah, hoitho, thilse lam le jousei kahoi! Thil kagon bangin kamolson, Kahet themjeh-in kahat loi!  Lengte vai kapoh hun, Vaihomte danpha kasempi!  Leiset vaihom jouse, vaipote, Mihatten keijal’a abol theiyu ahi. Eingailu jouse kalungset’in; Eihol’an eimu thei cheh ahi. Mi hoppeh din haona, jabolna, Khantouna le lolhinna kaneiye. Keiya namu chu sana thengsel le Dangka thengsel sangin aphajoi!  Lamdih kajot jingin, Thudih lampi kajui jinge!  Eingailute kahaosah-in, A-in jouseu neile gou kadippeh tai!  Pakaiyin kei eisem masapenin, Tonlaiya atohsa lah a masapen kahi!  Vannoi kipat masangpeh, Amasapen semtil’a eina kisem masapen kahi!  Twisam put masangpeh, Twikhanglen jouse sanga peng masa kahi!  Molle lhang kigoldoh masang, Molsang jouse  masanga peng kahitai!: Pathenin Leiset le agamsung asem masang, Leivui khutdim jeng jong aum masang,
 Vanthamjol ajamdoh a Twikhanglen aveitohsah masang,:28 Vanthamjol’a meilhang ajamsah a, Twikhanglen a twisam aputsah masang;29 Twikhanglen twipi let-lha lou dia Aseipeh masanga umsa kahitai! Leiset bulpi khom aphudoh masanga Keima umsa jing kahi! Thil semthemtah bangin akoma ka-umin, A-angsunga niseh a akipana kahi jinge! Asemsa vannoi kakipa pin, Mihem namkim chunga kalung lhaisel’e! Tunjong gollhang hon kasei ngaiyun, Kahil bangin bolleu chun kipah-un nate! Nakihil’u ngaiyun, Chingtheiyun, nahsah mon boldauvin! Kasei ngaiyan nom santin, Niseh a kakotphunga ding, Ka-in a lut ding go jing Mihem chu nun nom ding ahi! Keima eimudoh chu hinna kimu ahin, Pakaiyin lung lhaiyinte! Eimudoh lou chu ama kisumang ahin, Eihotbol’an athilo tei ding ahi,” ati. (Proverbs 8:1-36)