Lei le van le asunga thil-kisem umjouse hi Pathen sem ahi
tihi Bible in hin kichentah in eiseipeh’un ahi (Genesis 1:1-25 ven). Pathen in
Mihem tailou, Athilsem dang hohi “umhen” atile hung um jeng ahi. Mihem vang
hi akhuttah a, Ama limlo’a anasem ahi
(Genesis 1:27). Deichomtah le ngailutna neitah a asem ahijehchun, kho-hetna le
thaneina, deilhentheina jong anapehthai. Vangset umtah chu, hiche deichom
achanna, chamlhatna achan chu mihem in amangkhel in, ‘bol-loudia’ Pathen in
asei chu bol’in gentheina le hasatna aki-loikhumin, tonsot’a dia gentheina, ka
le lhisona, thinagei akilamdoh lotai.
Pathen in asemsa mihem chu, ama banga hinna-nei, thunei
ding le vaihom dinga akoi nom jehchun, ama limloa asem ahi. Chule, Athilsem
dang ho chu, Ama thalhenga veching ding le achunga thunei-vaihom dia ananganse
ahi. Hitia, thiljouse asemjou chun, Pathen in ave in ahile pha asalheh in
ahi.(Genesis 1:31).
Mihem hi thilsem dang ho sanga achomna hi, Pathen in asem
jouse chu Genesis bung khatna hin asei chaitai. Hinla, mihem kisemdan vang hi
avel in Genesis bungni lama hin ahilchenbekit’e.Genesis 2:7 ahin “Mihem
hi Pathen in leiset akon in asemin, anahhom sunga ‘hinna’ chu ahailutle,
‘mihem’ chu ‘Mihing’ ahungsoh tai” tia Bible hin kichentah le deichomtah a
kisem ahina avelsei ahi. Hichun, mihem hi ‘hinna neiya’ kisem, chule ‘Pathen
hinna nei’ ahi aseina ahi. Mihem mai hilouva ‘Mihing’ ahina hi thildang
kiseinato akikhetna ahin, chule, hiche ‘hinna’ pea chu Pathen ahi.
No comments:
Post a Comment