Ka hinkhoa kamudoh thilkhat

  -  Mijousen kipahtah le lolhing tah a hinkho man anom cheh’e. Min phat ding jong anom cheh’e.Mihem koima aphamo-nom aumpoi. Mitin hin  phat ding,minphat, mi seiphat, mi pachat le miho dei le ngailut hiding anom cheh e. Hinla, koima adei le atup bang ahijoupoi! Ahinkhova ato le achan hahsatna le vangsetna ho jeh a  phat boljou, mipha hijoulou, minphat nei-joulou, mi seiphat hijoulou, mi-dei le ngailut’a umjoulou le mujoulou ahibouv’uve! Lungset umtah i-hiuve, mihem-te hi!

            Judon, loune, le adang thilphalou bol-hokhu  moh oimo hih in! Thanom’a abol’u ahikhelpoi!  Anu-apa ngailut’a umnoma, hijoulou, MISUMOPA chun asuhmouva, abolsah’u ahibouve!      Chule, mihem’in thanoma abolsung koiman amudoh jipoi. Miho mudoh-louvin, kiselin abolji. Kisel-jou-talouva, miho mua aboltengle, ama deiya bol ahitapoi! ‘ABOLA’, ‘ABOLSAH A’ uma ahitai! Abol’achun athua anunsah a, ada-achamlou, jasan-javom dontheitalouva, abolji ahi ahibouve.

            Hechenlechun, nalungset a, napanhu nom ding ahi.  Ajehchu,  ‘ABOLpau’, misumo-jipa - Vannoiya vaihompa, MUTHIM LENGPA, AGILOUPA kiti SATAN chu ajolouvu ahi. Ajoutheiya chu, Pathen bou ahi. Hiche, agiloupa thaneina’ akona hi Pathenin, koitobang hijongle ahuhdoh thei ahi. Judon-loune, tolthat,Gucha, mijong, phatlouna tinchenga kona jong Pakaiyin, michu ahuhdoh thei ahi.

            Aumlouva kona thiljouse umsahpa chun aphamo pen jong aphapen asothei ahi.    Na nunchan phalou (bad habit) jouse jong napaisah thei ahi. Athikon jong ahuhdoh thei. Min thadinga nagot pet jong na-huhdoh thei, Nat jeh a nathi kon jong nahuhdoh thei ahi.

            Tulaiya nat gimneipen itiu ‘AIDS, Cancer’ le adanga kona jong ahuhdohthei ahi. A umlouva kona thilsem jouse umsahpa chun aumlou aumsah thei banga aumjouse jong abeisah thei ahi. Natahsan em? Natahsan-loule hiche lekhabu hi nangdia kiging ahipoi. Midang petan!

            Natahsan-le, tuhin, hiche nasimlai lekhabu hi khup inlang, khodah in chunglam venlang, ahiloule, dilsunlang, taovin. :-         

            “Vana um ka Pau,chonse kahi, neingaidamin. Chonset thaneina noiya uma, namel mulouva mahthah ding kahitai. Ka chonset neingaidamin, nei huhhing in tia hung tao kahi. Nei ngailut jala ka Pakai Jesu hungthia kachonset neingaidam jalin namin kathang vah e. Tuhin, ka Pakai Jesu chu ka Pakai le ka Huhhingpu din kasang’e. Kahinkho le ka hitheina jouse nakhut a kapedoh e. Na deilam hinkho mang dingin, Lhagao Theng in nei pampi jingin tin, ei Huhhingpu ka Pakai Jesu Christa minin ka taove, Amen.”

            Hitia chu nataole, Pathen in na huhhing ding, hinkhthah, Lhagaova penthahna chu napeh ding ahitai. Jesu Christa tahsan a Pathen cha nahitai. Chonset-gal najopeh ding ahi. Aban hi sim peh in. 

  Pathen in hiche lekhabu nasima konin phatthei naboh jing tahen.                                                        *******