Khantouna din tongin

Lekha simlai le degree sangtah a jo-manin, mihem hi mantheitah akihibehseh poi. Na nahintoh a, nakichuh chu nahinmanchah tengle bou nahung thepcheh cheh ahi.

Lamjot dan itobanga mithem jih hijongle sim in lungchinin neijongle chun, lam chu najot tokahsen, lamjotdan them ponate.

‘Huhhingna’ kisanin, nakisandan iti nasahenlang, miho sanga nasa le kichenin Jesu Christa kimupi jongle chun, athu hi nasei patloule them ponate. Chule, nasei le natohpat loule tahsanna lama jong khangtou ponate. 

Eiho lah a deimo umpen khat chu, houbung lamkai konkhat in, houbung mite hi ‘Muh hup a thilpha bolsah ding’ eitiu hi adih poi. Achesa Pathen-ni nilhah houina kathuseina achun, pastor tampi, le houbung lamkai tamtah umna a kasei chu :

“Lamkai ho, ngaise hih un, miho ‘muh-hup a, thilpha bolsah ding, nunchanpha vetsah ding’ tia thu nasei jingu,  ‘Thu hi sei louva, apha joh bolding, nunchanpha neiding’ tia nasei jingu hi adih poi. Ngatau’vin. Min Pathen’a kipana anei chu aseitei ding ngaiya ahi. Kipana thupha hi imding ahipoi, seiphong teitei ding ahi. Philip in Jesu amu chun, akipah behseh in Nathanael aseipeh in, Nathanael in Jesu ajui-lotai.

Samaria numeinu hi, Jesu seidan hi ivet-le, noti tobang ahi. Hinla, Jesu amua, Christa (Messiah) ahi ahet phat in akipah behseh jengin, Samaria mipite aseipeh in ahile, amahon Jesu atahsan-lotauve.

Peter le John chu Jesu thu aseidiu ajahda peh vangun “Kamu’ule kajah’u (kahet’u) hi seilouthei kahipouve” atilhonin, aseitei tei jeng lhone. Seijuite jouse chu aumthim beiyin, Jesu Christa huhhingna thupha asei sei jengun, athichanun aseiyuve.

Jesu’n asuhdam jouse chun aseiphonguve. Sei hihleu iti Bible jih hon ahetdoh diu ham?

Chule, Jesu athia athodoh kit jouva le vana lahtouva aummasanga asei nukhahpen jong chu Kipana thupha hi “Seiphong leuvin” ati ahi.

Tua eiho lah a mi seisahlouva, thilpha bolsah ding, mipha hi johding’ kiti hi ahithei behseh poi. Min akama miho jah a thilpha aseile, aseichun akantima, mihon jong avetchep’uva, aseto avetkah jinau sanga aseidoh tobang mi hidia agel’uva, hitia chu avetbeh tengule, ama chun nunchanpha, hinkhopha, thilphabol ahin het domdoma, chule hiti chu hung hidohji ahibouve.

Michu iti penthah-tajongle min amilui chuto avetbeh a, chute jing dia chu aboljing sungun michu akisempha theipoi. Ajeh chu, mihem hi thilsem dang ho jouse hito achenkhomna le achenkhompi (environment) hin ipi ahi hi asodoh ji ahi.

Lamkai tamtah hin, aman aseithemlou manin “Pathen thu hi seithem le seingei vang ahipoi. Nun le khan in apohjoh ahi. Asei hi ahithei chanin boldau hitin, atoh le nun le khanin vetsah joute” atiu hi adihnai. Hinla, seiding hi najahda banguva mitampi hin agel ahitai. Hijeh ahi, eiho lah ahi thuseithei jong um behseh lou ahi. Min seiding jong kiphalam cheh ahitauve.

Gospel hi seiphong ding ahi, im ding ahipoi. Mi seiding nakham-le (discourage nabolle), Gospel machal ding nakham ahi. Nati jalou ham?”

Bible in, “Aseiphonga aumloule kon ajah a, ahet ding ham? Min ajah loule iti atahsan ding ham? Thusei kijah akona tahsanna uma ahi” ati ahi.

Pathen thu hi seithem ding angaina tamtah uma ahi. Tahsanna a khangtousa ho lah a seithem angai hih nai. Hinla, mitamtah hi Pathen thu helou le ngaisah lou ahi. Chihna le themna ngaisang jong tamtah iumuve. Hitobang ho lah ahi, naseithem loule ngaijong ngai pouvinte” kati.

Houina ibolu le iseiyu tamtah hi khangthahte hin School, College hoa hiche ho sanga nasasa hi ajah jingu, amujingu, abol jingu ahi. Pathen thu hi adih bang le agilbanga nasei loule, leiset chihna le themna nahinsei houhi, lekhasim hodia nuijat umbep ahi.

Ipidia leiset chihna le themna thu hohi hou-ina hi, aseimo sasauva aseiyu ham? Nupi-upa kikhopna a seileu akhoh poi. Khangthahte umna ahi Bible thu bou seiyute. Vetsahnan, Pathen mingailutna le huhhinga thu -  Iti hetding ham, iti kisan ding ham, iti tahsanna lama khantou ding ham, iti seiphong ding ham; chule, khangluilaiya Pathen natoh, miho koma atoh le asei, Jesu khankho le atoh, seijui hole tuni geiya Pathen thu kilhangsap dan le bolding dan; School, College, University a loi-le-gol, chule, natohna muna tohkhompi le adang dang ho koma iti seiphong ding ham tiho hil’ding ahi.

Pathen thu naseiya, Science thu, Socialogy, Logic, History, Philosophy, le adang nasei houhi, akidangjep seijongleu chun abul nahinseihou chu ajah tengule, alunggel’uva “akijasasa asei hikhu’ tiuvintin, ngaita hihvehtau.

Chusangin. “Abraham chu lekha simlou, ahivanga Pathen-ging, Pathen tahsan ahijalin chihna nasatah Pathen in apen, ateh nungin cha pasal apen, leiset chunga mijouse het le gin, Pathen tahsan jouse dia ‘Pa’ khat ahitai. Abraham min kisumil louding ahitai. Nang jong, lekha simin, sim hih jong lechun Pathen tahsanin, Jesu Christa hi Leng le Huhhingpu din kisanin. Chutile, Pathen in Abraham phatthei aboh banga nang jong phatthei naboh ding ahi” tilechun, khangthah hon, alunguva “akidange, Adih e. Lekha simsan sanga Pathen het hi chihna le khantouna ahi. Hitobang thu hi School,College, University le themjilna mun dang hoa akija poi. Hou-ina hitobang thupha hi jah jing ding ahile, cheche jeng aphai” ati diu, hung jing diu ahi.

Tua kasei sim hohi, houbung lamkai hilouva, khangthah joh nahiuve. Hijongle, nang jong Pathen thu simnom le Jesu Christa huhhingna chang nahitah ding katahsan ahi. Solchah Paul in Timonthy ahilbanga, nang jong nakumlhom gellouvin, Pathen thu simjing nahi jalin, Pathen thu Bible’a um bou hi, Jesu Christa songin le Lhagao Theng panpi kinem in, hakattah in seiyin. Leiset chihna le themna lam sei hi mithem hon angaisah pouve. Kei jong kasei nompoi. Keisanga ‘Degree’ sangjo hon ngainom pouvinte. Iti san le kidanin sei jongleng ngaisah pouvinte. Hinla, Pathen thu hi ‘hingjing, hemto chemjam sanga hemjo” ahi. Adih bangtah le Pathen in eipeh banga gumtah a iseile Athuneipan phatthei abohji ahi.

Keima hinkhoa kamudoh jong ahi. Pathen thu kaseiphong masang chun, katahsanna ahatpoi. Kasei chanin, Pathen phattheibohna kachang jingin, tahsanna lama kakhangtou jinge. Jesu Christa huhhingna thu seiphong hi Pathen phattheiboh channa pipen ahi. Hichu, Lhagao Theng panpina channa ahi. Pathen phattheibohna hi Lhagao Theng  neilouvin akichang tahtah theipoi. Pathen in Jesu Christa mina Lhagao Theng khut a kona eipeh jiu ahi.

Kasei hohi, Computer (Hardware) ahi MS word (Software) manga Keyboard (Hardware) a ka ta’a Internet a kahin thot ahi. Computer(Hardware), MS word(Software)  le Keyboard(Hardware)  hi agoma Computer ahi. Pathen (Pa), Chapa chule Lhagao Theng chu khat (Pathen) ahi. Chule, Internet kiman banga hi Huhhingna changsa tahsan miho hi Pathen in amanchah a Thupha hi aseiphongsah ahi.

Satan in miho nakhang asuhbeipeh ji ahin, Jesu’n vang miho hi nakhang apehji ahi. Chule, Satan in asuhsetpeh hojong asemphat pehthei ahi. Hiche vetsahna chu Getsmani hona imutauve. Peter chun Houlamkaipu chapa nakhang( akol) chu ahinsatlhai. Jesu’n, anakhang(akol) lhasa chu alan, abehpeh kitin, adamsah tai. Hijehachu, Jesu’n, Peter chu Satan manchah ahung hikhah, asunga Satan lutman chu amupaiya “Satan, kamoma konin chen” tia apho ahi. Mihem hochun, alah’uva le Peter sunga alutjap chu amupouve. Jesu vang lhagao mitnei ahijeh in amui. Peter chu “Satan” ati ahipoi. Peter sunga um satan chu “chedoh in” atina ahi.

Pakaiyin, Athu hi nahetthema, naseiphong theina din, phattheina tincheng napeta hen.