Nitin Bible Sim (NBS)

1.Bible hi Pathen thu ahi’n, Achaten asimuva, Asempau lungdei ahet’uva,hinkho jong lolhing le kipah amantheina diuva Pathen eipeh’u ahi. Chule, Christian khat nahija, lekha simthei nahi nah nah-le Bible hi Genesis 1:1 apat in Revelation (Thuphon) 22:21 gei hi simteiteiyin. Chutile, thu hi naseithei, nanitthei le namanchahtheina ding, chule, Ama a hinna naneina dia Pakaiyin napanpiding ahi.

NBS 2.Pathen thu hi nadeilailai keu sima hetthemding le seithei dingin kigel hih in. Chule, Pathen thu hi lhagao thu ahi. Lhagao Theng neilouvin thu aseile miten hinna amutheipouve. Hinla, nasim-le lekhadang le thepna dang hetbangin beh hennatin, hinna jong nakimudoh thei ahi. Hijeh achu, Bible hi sim mongmong jeng ding ahi. Seithei ding, seithem ding jong ahi. Abula pat ajonagei nasimchaile seitheina le seithemna Pakaiyin napeh tei ding ahi.

NBS 3.Mitamtah hi min thuseiya agot-le,seiding ahepoi. Lamkai tahtah jeng jong “Kakigo manpoi” atijiuve!

Kapa, kanu le kaji- kachate thu kaseina dia kakigot ngaiyam? Athu’u seiding iti kahetda ding ham? Eingailutdan’u le ken kangailutdan iti kaseithei dading ham? Sethei maimai hilouva, seiding kahet dandan, abua semding hile abu lenval jeng ding ahi. Kaseithem ding dandan………….

Ka Pathen, ka Pakai,ka Huhhingpu thu le eingailut dan iti kaseimoding ham? Athu kahetloule  Ama kahetlou, kiguijoppilou,kakivoppilou hijeng lou ham?

NBS 4.Jesu Christa tahsanna, Huhhingpu le Pakai dia kisan hochu ‘Pathen cha’, ‘Lhagaova Peng’ ‘a pengthah’ ‘Huhhingna chang’. ‘Huhhinga um’, ‘Huhhingna kisansa’, ‘Christian’, ‘Kouchom’, ‘Lhenchom’ kiti ahi.

Napa, Jesu Christa thu seina dia kigot nangaisah nahlai ham?Aseidan them chu thuchom ahi. Napa ahitahbah-le, athu seiding tamtah nanei ding ahi.

Ole, ahija nakikoi vanga, ahiloulai nahi jeng ham? Tuni kigel in. Chonset thaneina kituhsahsah hih in. Nang le nang kilhem hih in. Thithut jeng thei jong nahi kihet in. Moh in, jouvin nang le nang kilhem lhem hih in. Lazar le mihaopa kiseina a mihaopa damuna akisih chu gel jingin. Damun nalhuntengle iti kisih jong lechun phachom taponte. Moh kigumsah hih in. Mei kahvamlel hidin kigel hih in. Thina hin jolel aneipoi. Chonset (satan) thahatnan mihem koima ajolel aumpoi. Jesu Christa, Pathen thahatnan bou ajo ahi. Ajoupa Jesu Christa chu nanei ngaiya ahi. Chutile bou, chonset thaneina najopeh ding ahi.

NBS 5. Satan in aloiho le avantil jouse akhop khomin, kihouna ‘inpi toukhomna’ aneipitai. Satan adingdoh in, chouna thu nasatah in aneitai –

“I-atile mihemte hin Jesu Christa akisansan jengu ham? Nanghon ipi nabol’u ham? Iti miho hi nachintup joulouvu ham? Ipidia hitia hi Jesu koma jamlut lut jenguva ham? Ipi ibol diu hitam? Tunia gachea, mihemte  gajollhading, gatuhtang ding koi na-umu vem? Nache tengule, iti bolleu chun tuhtanginge tia nagel’u vem? Naboldan diu khat khat in seiyun” atitai.

Seiding helouvin, phat sottah athimchet jeng tauvin ahile, Satan in avel in akou tai. Hichun, alah’uva khat chu adding doh in “Kei gache nange” atile, adang hon jong ahin tichetchut tauve.

Hichun, Satan in, “aphai. Ahile, iti nagabol ding ham? Ipi nagasei ding ham?” tin adong tai.

Alah’uva, khat adingdoh in, “’Kei chengting, Pathen aumpoi’ gatipehinge”  atitai.

Satan in, “Tahsan pouvinte. Mihem jousen Pathen aum atahsan cheh’uve” atitai.

Adang khat adingdoh in,“’Kei chengting, damun meidil aumpoi’ gatipehinge”  atitai.

Satan in, “Tahsan pouvinte. Mihem jousen damun meidil um atahsan cheh’uve” atitai.

Achomdang khat adingdoh in,“’Kei chengting, phat asot nalaiye, kino angaipoi. Jingtengle kisanna’nate’ gatipehinge”  atitai.

Hichun, Satan akipah behseh jengin, “Tahsan um, son-um lhacha nahi! Gachen, na lolhin teitei ding ahi!” atipeh tai.

Ka insung mite ho, Satan manchah phapen chu “Oldomle, ajouteng, jingteng” ti hi ahi.

Pathen lungdei le nangma dia phapen chu “tuhin, tu-tah hin” tihi ahi.