Jesu nei chonset jona

            Taona hi thilbolthei, thahattah a natongtheiya Pathenin phatthei aboh thei ahi. Hichu, tahsan jala umji ahi. Pathen thua TAHSAN kiti hi hinkhoa dia ngaikhoh-ten ahi. Chule, tahsan kiti hi ‘apumpia nganse le kingai, eima kisong talouva, Pakai nganse jeng, Ama bou son’a, eima hina jouse pehdoh jeng’ tina ahi. Pehtheng, pehdoh, kipehdoh hi ngaikhohten ahi. ‘Katahsan’e” tia lungdon, lungjina, panlahna neijing chu tahsan lhing ahipoi.

            Kaneva pat in Pathen le Huhhingpu Jesu Christa katahsan’e. Hinla,imabehseh kahitheipoi. Houbung lah a nasatah in kapangin, hinla, mahthah kom jong aumjitai. Ka dammoa hahsatna kaneiya kalungdon khonteh phat in, Jesu kakou gunset in, Ama thuthu din kaki pelhatai. Hichea kataona chu noiya bang hi ahi -

“Pakai, kaneova pat in nang katahsan in, nanga kahi kahei. Tun hitobangbep hi kahitai. Kaboina- kahahsatna jouse nahei. Nathuthu kahi. Hinding- thiding jong nang thu ahi. Nakoma kahung ding le damuna kache ding jong nang thu ahi. Ka kingaina nang nahi. Natiti chu himai tange, Pakai, nakhut a kahinna kapei” katitai.

Hichun, Pakaiyin, eihil panin, tunigeiyin eipuijinge. Hijehachu, ‘kipehtheng, kingap lhah’ tihi angaikhohna hi kamudoh tai. Ka lungjin kom jongle, Pakaiyin, “Lungdong hih un, Pathen natahsanui, Kei jong neitahsan’un” tia John 14:1 ati hi eihin geldohsahji’n, Ama a kakingam jitai. Hitichun, ol olin kalungjinna ahungbei domdomin kasumil jitai. Nang jong hitichun bolin. Pakaiyin eipanpi jing taohen

            I-atile, mihem hi chonset thaneina noiya umjeng ham?

            Asemsa mihemte hi Pathen in angailut a, kipahtah le lolhingtah a hinkho aman ding adei ahi. Hinla, hitia a-um ding chu Agiloupa hi nomlou ahi. Agiloupa’n ahinpohlut chonset jeh a mihemte hin hahsatna tincheng i-tolou ahibouve!

            Ipidia, Agiloupa chun hitia chu mite abol ham?

            Ama achantheilou jeh a, eiho chan ding jong nomlou, avetlel jeh a eisuhmo jiu ahi. Ajoujai vang, kahepoi. Pathen thu hi aboncha hetding mihem dia ngaidehlou ahi. Pakai Jesu’n eihuhhing nau thu het’a, Ama a hinna chu chana, akina panthei ding, hichu eiho hinkhoa jong kipana le lungmonna, tonsot geiya Amato chenkhomna dia kinepna ahijoi.Pathen le aumdan jouse nahet a ipi jong nabolthei ding ahideh poi. Aman eisem’u ahin, Ama a ihiuve.

            Ahcha’n apinu le ahidan ahet’a ipi aphatchompi deh ding ham? Apinu’n ajen banga auma, apehpeh kipah a aneh chu amadia phaset ahi. Ahcha bon apinu sem jong ahipoi. Eiho vang eisempauvin eidon’u ahinai. Ama imutheipouve. Hinla, phat khat in Ama mite mutheiyin leiset a ahungin Mihem min neiyin ‘Jesu’ akisah in Pa, Chapa le Lhagao Theng thu ana seiyin, hichu mimasaho lekhabu’n ajihlutsah in eihon isimun ihetaove. Hichekeu tailouvin jong, tukhanga mihem tamtah jong tahsa mit geiyin le janmang beh in jong akimusah in; Amel mulouvin jong thil umdan tampi mi amusah e. Hiche lah’a hin keijong, mimo lheh jongleng, ichan ham eimusah ahi. Aphotchetna khat a pangtheiyin eikoitai. Ajoujai he le seithei hihih jongleng, amulou le ajatahtah lou ho sangin aseitheiyin eikoitai. Vangpha kakisa lheh jengin ahi. Tua le masang ding jouse jong Ama, ei Huhhingpu ka Pakai Jesu Christa khut in kakingam jing’e. Anop-le hiche lekhabu sanga nasa le kicheh in jong eiseisah inte ti katahsan’e.

            Hijongle,hiche ho jousea kona jong hi Pathen in eihuhhing nom’u ahi. Hiche nadinga chun Pathen in tohgon anei ahin, hiche Pathen tohgon chu nahet a, najuile, hinkho jong kipahtah le lolhing tah a namanding; chujongle, tonsot a hinna jong naneiya kipah jing ding nahitai. Hichu nahet nomle noiya hohi,taoto hon simin. Tutah jong hin, Jesu’a hinna um chu changjeng dingin thumin, Jesu kouvin, taovin.

          “Pakai, hatmo kahi, chonset tha-neina noiya um, chonset-soh kahi. Nei huhdoh in. Kachonset neingaidamin. Cross chunga kakhela nahung thina jal chun, nami huhhingna chu neipen, Nacha din nei semin, kipah le lungmongin hinkho neimansah in, na deilam hinkho nei mansah in, ei Huhhing ka Pakai Jesu minin, Amen”.

Pathen in panpi jing tan.