Daniel hinkhoa Pathen loupina kiphongdoh

1 Leng achan kal kum ni nan Nebuchadnezzarin mang aneiyin, alung gimpi behseh jal’in ihmu mon aumlo tai. 2 Hijeh chun amang ledoh peh din phunsan themho, mitpheldoi themho, ailhim themho chule ahsi umdol hethem ho kou din mi asoltai. Ahung phat’un amaho hi lengpa anga adingtauve. 3 Ajah-uva lengpan, “Mang khat kaneiyin, kalung gimpi lheh tai; ipi kiseina ahiding kahetdoh nom lheh jenge,” ati.

4 Amahon Aramea paovin, Lengpa hingsot’in! Namang neihil’un keihon hilchen nauvinge,” atiuve. 5 Lengpan ajah-uva, “Kasei hi thon ngailou ahi-kamang hi abang banga naseidoh-uva chule ipi kiseina ahijong naledoh tha diu ahi. Hiche hi nabol thei louvu le natel nadah a kajen’uva, na-in jouseu acheng bei in-gem a kijam ding ahi. 6 Kamang naseidoh theiyuva ipi kiseina ahijong naledoh thei vangule thepman tampi peuving ting, ginle japen a kakoi ding nahiuve. Tun kamang chu itobang hiya, ipi kiseina ham seidoh-un hilchen loiyun!” ati.
7 Amahon lengpa jah a, “Lengpan mang chu neiseipeh pou pou leu chun ipi kiseina keihon hilchen tauvinge,” ati kit’ui.
8 Hichun lengpa a-eojah jengin, “Kagel bangbep nahiuve ong! Kaseisa khel ngailou kahi nahet jeh-uva phat sot sotna ding nagel’u hiya hime! 9 Mang hi naseidoh dauva ipi kiseina ahi naledoh thei lou pou pouvu le kibang cheh a talen kapeh ding nahiuve. Phatsot sot teng kalung kakhel ding kineppia kihoutoh a jouthu jenga neikihoupiu ahi. Kamang chu ipi ahi seidoh tang um! Chutile nale thei diu jong kahet ding ahi!” ati.
10 Thumop a pang hon lengpa jah a, “Lengpan nahetnom seidoh thei ding chu leiset pumpi chunga hin koima cha umponte. Leng itobang hihen, thahat tah, leng loupipenin jong hitobang thil hi aphunsan ho hihen, mitpheldoi themho hihen, ahsi umdol hethemho hileh-koima adong ngaipoi.11 Lengpan nadoh hi ahahsa behseh jengin, mihem lah a cheng lou pathente ahi-ngal loule, koiman boldoh theiponte,” atiuve.
12 Hitah chun lengpa alung hang behseh jengtan, Babylon gamsunga leng inpi thumop them jouse thagam din aseitai. 13 Hiti hin thumop them jouse tha din thu alhutan, hiche lah a hin Daniel le aloite jong apangtauve. 14 Mithat dia nganse, lengpa vengtup sepai lamkaipa Arioch koma hin Daniel achen, sei ding thu kigel toh dim demin agalut’e. 15 Aman hitobanga lengpan thu hahsa tah alhuhsah jeng thudol chu Arioch hi agadongtai. Arioch hin thilsoh umchan abonchan Daniel aseipeh-in ahi. 16 Daniel jong achepai jengin, phat chom khat angauva aman lengpa mang chu ipi kiseina ahi ahil chet din leng inpia konin phalna agaladoh tai. 17 Hichun Daniel a-in lama achen, aloite-Hananiah, Mishael, chule Azariah chu thilsoh chengse agaseipeh tai. 18 Ajah-uva van Pathenin selguh mang chu ipi hiya ipi kiseina ahi ahilchet’uva, Babylon gamsunga mithem miching ho to akitha tha louna diuva tao jing din aseiye. 19 Hiche janle le hin mang selguh chu Daniel koma gaochanna konin akiseidoh tan, hijeh chun aman jong Pathen vahchoi nan la asan:

20 “Pathen ching le thanei tah, Tonsot tonsot’in vahchoiyin um hen! 21 Pathenin phat le nikho, kum le lha akhel’in, Leng le lal pansah le haisah Ama a ahi! Chihna le hetna jong Ama a hung kon ma ahi. 22 Giltah a kisel thilguh aphongdoh-in, Muthima kisel geiyin ahen, Ama vang khovah a um ahi. 23 Vo kapu kapate Pathen, Nang kavahchoiyin kathangvah-e! Chihna le thahat neipen, Kataona ngaiyin-lengpa kaseipeh ding neihil tai,” ati.
24 Leng inpia thumop themho that dia lengpan anganse Arioch henga chun Daniel achen, ajah a, “Thumop themho chu that hih laiyin, lengpa koma neipuijon, ken amang chu seidoh ing ting ipi kiseina ahijong hilchen inge,” agati.
25 Arioch chun Daniel hi Nebuchadnezzar lengpa angsunga apuilut pai jengin, ajah a, “Vo lengpa, Judah mi sohchang khat kagamudoh-in, hichepa hin namang chu seidoh-in tin hilchen theiyinte,” ati.
26 Hichun lengpan, Belteshazzar jong kiti ji, Daniel jah a hin, “Ipi mang kaneiya ipi kiseina ahi neiseipeh thei mong ding ham?” ati.
27 Daniel’in, “Vo lengpa, ahsi umdol hethem ho hihen mitpheldoi them ho hile, phunsan them ho jong chule ailhim themho geiyin jong hiche mang hi naseipeh thei louvu ahitai.28 Amavang Pathen khatseh van a aumin, selguh thil jouse aphongdohjie. Hiche Pathen hin lengpa hi khonung thilsoh ding navetsah ahi. Tun na-ihmut pet’a mang nanei chu seipeh inge.
29 “Vo lengpa, na-ihmut chun khonung thilsoh ding namang mat’in, selguh thil jouse phongdohji Pathenin khonung thilsoh ding navetsah tai. 30 Tun hiche selguh thil hi kei koma aphongdoh tai; midang sanga kachihjoh man vang ahipon, lengpan namang chu ipi kiseina ahi nahetdoh a, nahenga kisei lunggel chu nahet khenna dia aboljoh ahibouve.
31 “Vo lengpa, namang chun namasanga milim lentah khat ding namui, avah pempum jengin, vetngam ngam jong ahipoi. 32 Aluchang sana thengsel ahin, a-omlhangle abanjangte ni dangka ahin, akongjang le atobuh chengse sum-eng, 33 akengte ni thih, chule akengphangte ni thih le tong kihal ahi. 34 Navet pet tah chun mihem bol hilouvin songkol’a konin songtum lentah khat ahung kikal lhan, milim kengphangte ni, thih le tong kihal laitah chu aseleh, milim chu akithecheh hel jenge. 35 Chutah chun thih jong, tong jong, sum-eng jong, dangka jong, chule sana geiyin achip lhasoh hel tan, nipi lai changphol’a leivui kithe bang bep ahin, huiyin alhoh mangin, ahalsi cha jong akimudoh jou tapoi. Songtum vang chu akhang khangin molvum tejen ahin, leiset pumpi achuptai.
36 “Namang chu hiti ahin, tun ipi kiseina ahi lengpa naseipeh inge. 37 Vo lengpa, leng jouse sanga loupi pen nahin, van Pathenin kumpipaa nasem a, thahat thuneina jouse le jabolna napeh ahitai. 38 Aman vannoi leiset namtin chunga vaihoma napansah a, ju le va ganhing namkim chunga thuneiya nakoi ahi. Milim luchang sana lai chu nang nahi. 39 Nang jou teng lenggam khat hung umkit’in tin, nang lenggam te vang hiponte, aban a lenggam thum chan hintin, alenggam chu sum-eng to tekah hintin, leiset pumpi vaihoma pang ding ahi. 40 Chujou teng lenggam li lhin na hintin, thih lhouva lhou ding, thih-in asuh khah khah akejeng jung banga, hiche lenggam hin lenggam masa chengse chu keh jeng junga ahalsi sia alensah ding ahi. 41 Milim kengphangte ni thih le tong kihal jong namun, hiche hin lenggam nukhah kipun khom mohel ding aseina ahi. Thih lhouva jong lhou mai ding ahi, ajeh chu thih le tong kihal ahi. 42 Akeng jung ho thih le tong kihal hin chuche lenggam abang bang kom hat’a, abang kom lhasam ding thu aseidoh ahi. 43 Thih le tong kihal jong namui. Hiche hin avaihompan namchom chom insung chom kichensah a kipum khatsah ding agot ding dol asei ahin, hinla thih le tong kihal lhop mohel banga, amaho jong kipum khat thei deh lou diu ahi. 44 Hiche vaihomho khanga hi van Pathenin beitih neilou hel ding Lenggam khat aphudoh ding ahi. Koiman gal’a ajo jou louhel ding, amajoh hin lenggam dang jouse asuhgam hel’a atonsot’a umden jing ding ahitai. 45 Mihem bol louhel’a songkol’a kona songtum hung kitang lhaa thih le sum-eng, tong le dangka chule sana kihal milim asejal jeng chu namui. Hichea hi Pathen loupi tah chun khonung thilsoh ding lengpa naseipeh ahi. Namang bang banga kaseidoh a, ipi kiseina jong kahilchet ahitai,” ati.
46 Chutah chun lengpa abohkhup jengin, Daniel houna dia kilhaina ho le thilto tampi bol ding thu apetai. 47 Lengpan Daniel jah a, “Nang Pathen hi pathente Pathen, leng jouse Pakai, selguh thil jouse phongdoh thei ahi. Hiche selguh thil naledoh thei jal’a kahetdoh ahi,” ati.
48 Chule lengpan Daniel chu panmun lentah a apansah-in, thilpeh jong tampi apen, Babylon gam pumpi apohsah-in, leng inpia thumop chengse lamkaiyin akoitai. 49 Daniel ngehna jal’in Shadrach, Meshach chule Abednego chu lengpan Babylon gam thudol pou pouva thu neiyin apansah tai; Daniel vang leng inpia aumdentan ahi. (Daniel 2:1-49)