PATHEN LHAGAO THENG CHENNA NAHI KIHET JINGIN

Solchah Paul in aseiye “Masanga chu nasuh khel nau le nachonset nauva thisa nahiuve;hiche laiya chu hiche vannoi leiset khang umchan dungjuiya nachon'uva, vanlai jol'a thunei vaipo ho nung juiya, tulai Pathen ngaisah loute lah a natong lhagao thusah a chon'a nahiuve.

Phat khat laiya Juda mi keiho jong hitobang chu kahiuvin, katahsapheu ngaichat lam jenga chon, tahsaphe lunggul le lungtup a chon kahiuvin, midang banga keiho jong lunghanna chate kanahiuve.

Ahinla Pathen hepina bulhingset, ami-ngailut ning lhingsel'in eingailuvin,

suh khelnaa ithi laitah-un Christa to eicho hing khomtauve, lungset vanga huhhing chang nahiuve.

Amato eikaithou thauva, van gam, Jesu Christa hong sunga eitou sah-u ahitai.

Hichu ahung lhung ding khanga Jesu Christa sunggil'a eikhoto nau lungsetna letset jeng chu eivetsah theina diu ahiye.

Ijeh-inem itile tahsan jal'a lungset man'a huhhing chang nahiuvin, hiche hi nang hoa kon hilouva Pathen thilpeh ahibouve.

Natoh vanga ahiloujeh hin kisonna thei jong ahipoi.

Eiho Pathen semsa ihiuvin, Pathenin ichonna diuva anagon masah chengsea chu ichon theina diuva natoh pha chengse tong dia Jesu Christa sunggil'a kisemdoh ihiuve.

Tahsaphea chidang namdang nahilaiyu, tahsa khut'a cheptan mihon cheptan lou nahisah laiyu khang chu geldoh-uvin;hiche laiya chu Christa to kimat lou, Israel lhangpi kiloikhomnaa pang lou, thutep jal'a kimu kitepnaa pang khalou, hiche leiset'a hi kinepna bei le Pathen helouva um nahiuve.

Tua vang Jesu Christa sunga naumtah jeh-un masanga nagamlat vangun Christa thisan jal'a nailam nahitauve.

Christa chu eiho kichamna ahi. Aman kikhenna banglai chu aphe lhan, kidouna chu atahsaphen asumangin, Judate le chidang namdang te pumkhat asotai.

Aman nam nia kona Amato hingkhom ding mithah khat asemdoh a chamna asemdohna dinga Danthu chu athupeh chengse le adan jouse toh asuhmangtha ahitai.

Thingpel'a athi chun Christan kidouna chu atahsa tah-in asumangin, jat ni chu asuchamin, Pathen henga tahsa pumkhatseh asemdoh tai.

Hiti chun ahungin Pathen to kigamlat namdang nang ho heng le Pathen to kinai Judate henga hiche chamna Kipana Thupha hi ahung seiphongtai.

Hijeh a chu Christa jal'a chidang namdang le Judaten iloi niuva Lhagao khat'a Pa henga lut theina ineiyu ahiye.

Hichejeh chun nang ho maljin le khopem nahitapouvin, Pathen mithengte chan khompi le a-insung mite nahitauve.

Jesu Christa chu inning song khomdet ahin, solchahho le Themgao ho songset chunga nang ho kisadoh nahiuve.

Christa chun in kisa chengse chu aloikhomsoh keiya, Pakai Houin theng hidinga akhantousah ahi;

Ama sunga chu nang ho jong adang chengse to kisakhom Pathenin Lhagaova chenna anei theina dia kisadoh nahiuve.” (Ephesians 2:1-22)

Athu hethema, nit a le mangcha thema Lhagao Theng chenna hijing theidin  din Pathen in na panpi jing tahen.