(Isa.
61:1-4; Lk. 4:16-21)
Napha toh lunggot (Goodwill) hi
mihemte lungsunga achen ding hi Pathen dei ahi. Jesu hi vannoi chonset jeh-a
thi ding keoseh-a Pan ahin sol ahipon, leiset’a mihem khat banga hinkho aman
sunga napha toh lunggot neiya mite lah’a na
atohding chu ahung kisollona ahi.
Tulai vannoi leiset’a mihemte
kisahlelna pen hi “Napha toh lunggot” (Goodwill Mission) hi
ahi. April 2015 a Nepal gam’a Ling nasatah kiho jeh-in mihem sang tamtah hinkho
alem’in, athi amang hetdoh theilou khop in aum’e. Nei le gou In le Lou tampi
amangthah atam’e. Agam agam’in panpina aneiyui. Gam khat in genthei hahsat ato
teng panna thei lam cheh-a kithopina neiding hi tulaiya thilpha, napha tohna
lam’a vannoi kitetna khat ahitai. Hiche tobang lunggel neiya natohna jouse hi “Goodwill
Mission” ahi. Hitobang dinmun’a hin tahsa lam’a kiloikhomna hihen,
Houthu lam hijongle chule mimal hijongle koima pan lanom lou aumpoi. Hitobang
natohna-a kon hin thilpha tamtah asohdoh-e.
Tulaiyin damtheina lam’a natong Health
Department in jong masang lai bang hitalouvin nasatah in mihemte damtheina din
pan ala jing’uve. Medical staff ho cheji louna thinglhang kho ho-a jong natong
tamtah akisol lut’in, lou le ai mantam tah tah manbeiyin akihom’in chule
angaina chan’a manbeiya tahsa damna vetkolna (free medical camp) jong gon’in
aum jinge. Tahsa themjilna lam’a jong nasatah in private hihen Government lam
hijongle napha tamtah akitong jinge. Hiche ho jouse hi Goodwill Mission natoh
ahicheh-e.
Isa. 61:1-4 sunga kisei hi ivet leh
aseiya chu Themgao Isaiah hijongle ama chungchang thu aseina hilouvin Jesu Christa (Messiah)
chungchang joh aseina ahi ti hi Luke 4:21 isim leh akimuchen theiye. “Hiche
najah-u Pathen lekhabu-a thu hi tunia guilhung ahitai,” tin
Jesun aseiye. Kum jatam tah masanga pat Themgao Isaiah hin Jesu hung kisol lona
thu hi ana phondoh ahitai. Jesu natoh pipen ding chu- Sohchangte lhadoh ding, mitchoho kho musah ding, gotchep’a umho lha-ong
dingthu hi ahi.
Ahung kisol lona bangin Jesun thi
akaithouvin, dammona jatchom chom neiho aboldam’in, genthei vaichat chule pao
joulou jeh-a noise tah-a kibol tampi akithopin, gilkel dangchah ho avah in, hiti
hin napha tohna jal’in hinkho chan gei jong achan’e. Eiho jong tahsa lam hihen,
Houthu lam hijongle lamkaiya pannom jengna lungput neisanga napha tohnomna
lunggot ineiyu hinam kingaito masah ding hi dih inte. Paul’in Timothy lekha
athotna-a chun, “Koihile Houbung lamkai nom chun natoh pha adeichat (lunggot
anei) ahi,” ti hi tahsan theidol chu ahi ati (I Tim. 3:1). Natoh pha
adeichat ti hi English Bible ho-a “desires a good work” tin akile-e. Koihile lamkai ding chun napha
tohnomna lunggot aneitei ngaiya ahi ti akimui. Jesu tobang lamkaipha aumpoi.
Lamkaipha ahitheina hi napha tohnomna lunggot aneiye.
Hindute hin pathen tamtah atahsan
nauva Lord Shiva pathen hi suhsetna lam’a thilbol thei tah khat’in aheuve.
Ahung kisol lona pen jong leiset le mihemte sumang ding le thatgam dinga sol
ahi tin atahsan’uve. Hijehchun, mithatgam thei ahi ti atahsan jeh-un ama
suhlungdamna din lamchom chom’in ahou jiuve. Eiho Pathenin ahin sol i-Pakaiyu
Jesu vang napha tong dinga hung kisol
ahi. “... Pathenin hibanga hi vannoi angailut ahin, koi hijongle atahsan
chan chu mangthah louva tonsot hinna aneithei nadin a Chapa changkhat chu
apetai. Ijeh inem itile vannoi themmosah ding hilouvin, Ama jeh-a vannoi
huhhinga aum theina dia Pathen Chapa chu vannoiya ahin sol ahibouve,” (John
3:16-17).
Pathen hephalou jeng hon bon napha
tohnomna lunggot aneiyu le, Pakaiya kingaite eiho Houbung mite hin iha gelkhoh
dehset diu hilou ham ? Ichennau gamsung cheh-a napha itoh-u hinam ? Ole napha
toh sanga gamsung, Houbung sung, Insung chule Nam sunga dinga thetdohmo hel
ling le khao, nangtom loilha-a ipan jengu vem ngaitou hite. Chohchi, baotam
chule boina sem dinga hinga ihipouvin, hoitilam hijongle natoh pha sodoh dinga
hing joh ihiuve.
Napha tohnomna lunggot hi nei leuhen
tahsa le lhagao hinkho-a khantouna le masotna hi ilah-uva umdoh theiyinte.
Bible’a Jesun seijui somleni/ somsagi le ni asolna thusim imuve (Matt. 10:5-15;
Lk. 10:1-12). Hiche seijui asol hohi napha tong dinga asol ahi. Amaho banga
eiho jong napha tong dinga ngansena lhingset eipeh-u ahi. Hijehchun, koihile
napha tohnomna lunggot nei jousen atoh ding ahi.
~~~
No comments:
Post a Comment