Pakai Anjon

(Lk. 22:14-20; I Cor. 10:16-17)

          Pakai ngah jing mite dinga lhagao anpha pen chu Pakai Anjon hi ahi. Ajehchu akineh chan’in Ama hung kit ding inga nauva ilhahsamna hou a kon hatthah kitna eipeuve. Pakai Anjon hi ineh-uva idon tengu Ama hetjingna dia kibol ahi ti gelkhoh pen ding ahi. Ajehchu Pakaiyin, “... keima neihet jingna diuvin ...,” (Lk. 22:20) ati. Het jing ding chu thildang ahipon ‘Cross’ kiseina ahi tin Robin Boyd chun anaseiye. Ibol’a Cross chu het jing ngaiya ham ? Cross het jing angaina chu Pakai thohna le athina melchihna ahijeh ahi. Isaac Watts in ala bol’a chun - “Cross kidang tah chu kavet leh Loupi Leng Chapa thi kamui” (When I survey the wondrous Cross, on which the Prince of Glory died) tin aseiye.

          Pakai Anjon hi ibol tengu le Jerusalem Indan chungnunga seijuite toh Pakaiyin kalchuh kut an aneh khom’u chu geldohna hilouvin, Cross-a athohna le athina geldohna ahijoi. Houbung mi khat hina-a gel jing ding pen chu Pakai thina Cross hi ahi. Hinla koiman phat tinin akigeldoh jing thei poi. Hijongle Pakai Anjon neh khomna-a konin athah-a geldoh kitna le het jingna chu lung sunga ahung umkit theiye. Chuban’in nehkhom dinga Dokhang kimvel’a itou tengu le Calvary lhanga Cross bul (beneath the Cross) kimvel’a toukhom ihiu eigeldoh sah-ui. Chule Cross chunga athina ichan khompi nau le ithoh khompi nau jong athah in eigeldoh sah kit’un ahi.

          Pakai Anjon ineh tengu Christa-a kivah ihiuve. Pakaiyin hitin aseiye, “... kasa hi neh ding mong ahin, kathi hi don ding mong ahi,” (Jn. 6:55). Pakaiyin asei banga hi Ama ngah jing mite chun thahat anei theina dia Ama tahsa-a chu kivah ngaiya ahi. Aman muthei Changlhah alah-a ahebal chu tahsa dinga An chu ahi. Hiche Changlhah chu Ama tahsa vetsahna ahi (Jn. 6:48). Ajehchu Pakai Ama tah-in Hinna Changlhah ahi chu aphondoh ahitai. Koihile Ama tahsa-a kivah lou chun Ama-a hinna aneipoi ti akimui (Jn. 6:53). Christian hinkho tahsan lam’a kivah khangna chu Christa tahsa Changlhah neh chu ahi.

          Pakai Anjon hi ijon tengu le eima cheh kipeh dohna jong avetsah-e. Kipedoh thengsel’a neh le kipedoh theng louva neh chu kibang ponte. Eija um chonsetna ho, hatmona le lhahsamna, then louna, kiletsahna, kilungdou tona, kibungkhen chule dou lungputna ho jouse pailhah-a Pakai, Ankong neipa koma kipehdoh ngaiya ahi. Israelte chun Kalchuh Kut aman ding tengu le a-insung cheh-uva konin chol lui jouse apaidoh soh keiyui. Cholso louvin Changlhah asem’un, cholso lou Changlhah Kut (feast of unleaven bread) amang jiuve.

          Pakai chu setna neilou, nolna bei ahijeh-a Ama anga eiho jong nolna bei ihitheina diuva chonset thupha choiya A-angsunga chu kipeh lut ngaiya ahi. Cross-a athina hi idiuva thempu natoh loupipen eitoh pehnau ahi. Pakai ki-it lou hel’a idiuva akipehdoh banga eiho jong gan kihinglha theng le lahthei dol’a Pathen’a kipelut dingin Paul’in eingeh-ui (Rom. 12:1).

          Pakai Anjon hi Pakai Ama toh Kitepna Thah ahi ti eigeldoh sah-un ahi. “... hiche hi nangho dinga kilhoh lha, kathisan’a kisem doh Kitepna Thah ahi,” tin Pakaiyin aseiye (Lk. 22:20). Pathenin vel tampi Israelte kitepna ananeipi-e. Hinla kitepna chu ananit jou pouvin, phat khat seh le anasukeh jiuvin anotthap jitauve. Ajehchu kitepna det tah chu ana umdoh thei poi. Mose mangchan Danthu kijihna Songpheng anapei. Hinla hiche ho jouse jong chu ananit deh pouvin asukeh kit tauve.

          Achaina kheh-in Pathenin Jeremiah kama aphondoh sah bangin Achapa Jesu thisan’a hiche amite toh Kitepna Thah chu asudet tai. Jeremiah Themgao chun hitin anaseiye, “Apu apateu khut’a man’a Egypt’a kona kahin kaidoh pet’a kasempi Kitepna Lui chutoh bang lou ahi ...” (Jer. 31:32). Hiche-a pat hin kitepna chu alui chuto bang louva athah beh hiding ahi ti akimudoh theiye. Thisan’a kitepna kisem hi Israelte thusim’a ana umkhalou ahi.

          Paul’in Pakai Anjon nehkhom hin ahung kit kahsea Pakai thina iphondoh nau ahi tin aseiye (I Cor. 11:26). Pakaiya kingai jingte dinga Athina phondoh jing hi toh ding kinkhoh pen ahi. Pakai thina hi tahsan kingapna bulpi khat ahi. Ama thilou hileh thokit thu kisei ponte. Athi jeh-a thokitna um’a ahi. Atho jeh-in Van’a akaltouvin, akaltou jeh-a nikhat hung kit teiding ahi akichen’e. Ahung kit kah hi phatsot tah jong hithei ahijeh-a lunglha louva det tah-a pan jou jing theina dia Pakai Anjon hi tahsan suhhat jingna ding le athi phondohna-a bol jing dia thupeh ihiuve. Pakaiyin, “... keima nei geldoh jingna diuvin bol’un,” ati                                 (I Cor. 11:25).

~~~