MARY PATHEN VAHCHOINA

“Hichelai hin Mary akipat pai-yin Judea thinglhang gam khopi khat’ah thanom tah-in achei.

Zechariah in’a alut’in Elizabeth salam agabol’e. Mary salam chu Elizabeth-in ajah pet tah-in a-oisunga naocha akichomin, Elizabeth chu Lhagao Theng adimtai. Chuin Elizabeth chun othongin asamin, “Numei jouse lah a nun nom nu, nanaobu sunga um jong anun nome! I-atileh ka-Pakai hingnu lom lom kahenga hung jeng hitam! Ajeh chu salam thu nasei kajah jah chun ka-oisunga naocha kipah-in akichom jenge. Ahenga Pakai thusei guilhung ding tahsan nu anun nome,” ati. Hichun Maryn aseiyin: “Kahinkhon Pakai kachoi, an’in, Eihuhhing Pakai Pathen chunga Kalhagao akipah-e.

Thanom tah in Christmas Mangute

‘’ Thu chu tahsaphe ahungdsoh-in, i-lah-uva ahung chengin, keihon aloupina, Paa kon Chapa chang khatseh loupina chu lungset le thutah lhingset’in kamutauve.’’ (John 1 :14).

Christmas hi Jesu Christa penni dihtah ahi le ahilou gellouvin, Jesu Christa, Pathen Chapa chu vannoi Huhhing din, leiset a ahungpeng monge ti miten ahetdohna diu, Kipana Thupha hi vannoi mite hetna dia lamkai masa ho lungthima Pathen in ana seipeh’a vannoi pumpia kimanga ahi ti tahsan in Pathen thupha phonjalna khat ahi tia gelin mangcheh’ute.

Mitheng Ho Sunga Huhhingpu Apengji

Huhhingpu Jesu hung penna Pakaiyin Mary alhenge. Ajehchu, Mary chu Nungah Theng ahijeh ahi.

Tunia Huhhingpu penna dia Pakaiyin adei chu 'Mi lungtheng ho' ahi.

 “Milung theng ho anun nom’ui, Amahon Pathen amu diu ahi.” (Matthew 5:8)

Mitheng Ho Sunga Huhhingpu Apengji

Huhhingpu Jesu hung penna Pakaiyin Mary alhenge. Ajehchu, Mary chu Nungah Theng ahijeh ahi.

Tunia Huhhingpu penna dia Pakaiyin adei chu 'Mi lungtheng ho' ahi.

 “Milung theng ho anun nom’ui, Amahon Pathen amu diu ahi.” (Matthew 5:8)

NUNGAH THENG MIJOUSE LE PATHEN IN ADEIYE

Gollhang jousen nungah adeicheh e. Adeh in nungah hoi akidei cheh e.

Minu-mipaten jong anou diuvin, nungah pha le hoi adeiyin, adeh in Nungah theng adeicheh un ahi.

Nungah hoi akideicheh e. Hinla, jiding mong akiti tengle Atheng, nungah theng akilheng teiye.

Pathen in jong nungah theng adeiye.

Mary Koma Vantil Kisol bangin Nakoma Pakai Vantil Ahunge:

( Bible chang kilheng  Luke 1:26- 38 :  JESU PENDING KISEI MASAHNA:

Elizabeth gai kal lhagup lhin nan Vantil Gabriel chu Pathena konin Galilee gam Nazareth khoa David chilhah Joseph toh kicheng dia kitepsa nu-ngah Mary henga akisol’e.
Vantil chu alut’in ajah a, “Nun nomin sah chungnung nu, Pakaiyin naumpi jinge!” ati.
Mary chu alung kichi-ah lah jengin, ipi thudol’a kilemna ahiding giltah-in agel’e.Hichun Vantil’in ajah a, “Mary kicha hih-in, Pathen lungdei namui.Nagaiya chapa khat nahin ding, amin Jesu nasah ding ahi.Ama thupi tah hiya Chungnungpen Chapa kitia, Pakai Pathenin apu David laltounaa atou-sah ding ahi.Jacob chilhah te chunga lengvai pontin, alenggam chun beitih neita lou ding ahi,” ati.

Pathen in Anatoh Loupi Amusah Hohin Van Kipana Aneiji :

Kahinkhoa Pathen in anatoh loupi eimusah bang hin nang jong namusah tei ding kanom lheh jenge. Ajehchu, kipana tahbeh, Van kipana eineisahji.

Pakai Lhacha ho jui hi Ama kijui jing ahibouve.

Christmas 2012 le Christmas 2013 chu Christa tahsanlou ho lah, Sibergool le Bodrogool khoa Pastor H.Haolai-to kaman ahi. Christa tahsan khatcha umlou ahin; kacheu chun, amuna um Missionary Pastor L.Chorei-to kavah leuvin, in kachonun, chule, a Pathen hounau in lhan tobanga inneocha kisong jong kagaveuve. Hiche in sunga chu koima lut phallou ahi. Pathen jalin kei din lampi khat aume. Thuso bolmi kahi aheuvin, Lim kalah lele jalchun kaluttheiye. Koima kaseipeh poi. Camera choiyin asunga kalut in Lim kalan, chule, chomcha taona kaneiye.

Jesu Pending Kisei Masa Ahi

Jesu leiset  mihem a ahungpen ding chu semtila mihem chonset a alhuh akona kisei masa ahitai. Chule, Abraham koma jong pathen in anaseiye. Jesu min akiseilou vangin, Pathen in Abraham jah a ‘Mijouse phatthei channa nahiding’ ati chu Abraham guiya kona Huhhingpu Jesu hungpen ding le mihon Jesu Christa jala Pathen phattheibohna achan diu thu kiseina ahi. Chubanin, akhang akhangin Pathen in Themgao ho kama konin anasei jinge.

Achaina penin, Pakai Vantil Gabriel in nu-ngah Mary aga seipeh in, chujouvin, Mary jidingpa Joseph koma agasei kit e.  akisol’e (Luke 26-38 sung hi simin)

Jesu Christa Penthu

Jesu Christa pen um chan chu hiti ahi. Anu Mary chu Joseph to kicheng dinga kitepsa ahin, ahinla akigop masang lhonin Lhagao Thenga kona agai chu Mary hin akihet doh tai.Ahin ajipa Joseph hi midih tah ahijeh-in Mary hi lhangphonga mipi seithanga umsah ding a nompon, guh thim cha akitepna lhon suh keh a kikhenpi din agoi.

Tonsot-Hinna Naneina din Jesu Kouvin

Pathen in vannoi angailut behseh jeh in Achapa changkhat chu ahinpetai. Koihile Ama tahsan chan chu mangthah louva Tonsot-Hinna anei johding ahi.” (John 3:16)  Hichea ‘Vannoi’ hi ‘vannoiya mijouse’ tina ahin, ‘Achapa’ hi ‘Jesu Christa’ tina ahi. ‘Hinna’ hi ‘Pathen hinna’, mihemin aneile Pathen-to tua le tonsot a hingkhomding ahi.
Bible in ‘Hinna’ ati hi nanei mong mong tah em?
Ole, lhagao dihlou ho, nunchan phalou ho, du le ngai dihlou ho suhboi theibep nahi jeng nahlai em?

Christmas Card in Christa Kipana Thupha Homjalnan,

Thusei le thilpeh ajoujaiyin ibolthei pouve. Ibonchauva iboltheiyu aume. Christmas ahin, Pathen Chapa Jesu Christa hi eiho chonset akona eilhatdoh diuvin mihem in ahungpenge ti hetna in, na loi ho, adeh in Christa helou le sanglou ho Christmas Greeting Card pen.

TAHSANNA KICHEH NEIYA THUPEH NIT HI PHATTHEI CHANNA AHI

Nasimsa hijongle, hiche Bible chang hi velsimin, tao jing pumin.

Gollhang nahin, Pathen tahsan le gingtah nahi. Jidia nadei nungah jong chu, atheng le ahoi nadeiye. Natup bangin, nungah kitup le seiphat chang namutai. Kichenpi din nagongin, thiljouse suhtup ahitai.

Nakichen diu mong phat in, najidingnu chu phatecha navetchet phat in, naovop jing ahi namutai. Nangmanla natohkhah louhel ahi. Koito anao ham nahepoi. Iti na um dem?

Nungah nahi. Pathen tahsan le gingtah nahi. Dongma naneiyin, nadongmapa chu Pathen ging le chonphatah ahi. Kicheng din nakitep lhontan, nanu le napaten jong nakichenna diu phat atep un, thil agongtup taove.

Hichekah lahtah chun, lhagaotheng ha, lhagaoboh ham nahetchetlou khat in nao navopsah din ahung kitep tai. Iti na um dem?

Pathen Hi Ngailutna a Dim ahi

Pathen Hi Ngailutna a Dim ahi. Chule, kichat umtah jong ahi het ding ahi.

“Pathenin vantil chonse ho jeng jong khen louhel’in Damun’a aleh lut jengin, hikoma chun Thupi tan ngah din muthim lah a thih khaovin ahen’e.(.2 Peter 2:4)

Vantilte bon, asuhkhel jeh’uva damuna akoi theile mihem in alung atoloule hinghoiyinte natim?

Alung tohlou jouse damuna akoiding ahi.

Pathen lungto ding, alungdei bolna dinpen chu Achapa Jesu Christa hi Huhhingpu le Pakaiya nei ding hi ahipene.

NGAILUT BOU AHI NGAICHAT PIPEN

NGAILUT hi mijouse ngaichat khohpen ahi. NGAILUT aumloule thil jouse hi apanna tahtah aumtheipoi. Aphapena kihe jouse jong hi NGAILUT apanloule, kichat umpen le deimo umpen asohtheiye. Sum hi ngaichat khohpen khat ahi. Hinla, NGAILUT apanloule sum jong hi kinahna, kithana gei asohtheye.

Nei le gou loupitahtah jong min aneinom cheh e. Hinla, NGAILUT apan loule nei le gou jouse jong hi manthahna sodohsah ahijing theiye.

JESU PENNA MIHO PATHEN IN APANPIJI

Themgao Isaiah in, Jesu Christa penna miho Pathen in apanpi dan hi Pathen kom’a aseiye,

 “Nangin anamkoljonu navoh boh peh-in, Ajepnau tenggol jong naheh bongtai.

 Midian sepaite nasuhgam bangin, Namite bolgima kichepna nei nam mite najoutai.” (Isaiah 9:4)

‘Jesu penna mi’ tihi ‘Jesu Christa Huhhingpu le Pakaiya kisan ho’ ahiuve.

‘Midian sepaite’ chun Israelte ana bolgenteiyu ahi’n. Hinla, Jesu Christa ahintahsan jouse vang Pathen in Abolgenthei ho jouse khut’a kona ahuhdohji ahi.

Nangla, ipin nabolgenthei em? Ipi ham nalunggimpi? Ipi ham na dammosah a? Na tahsa, na lunggel le na lhagao bolgentheiya, hinkho kipah’a namansah theilouva chu ipi, ipipi ham?

Hicheho jousea kona na huhdoh din, Jesu Christa hi kouvin. Taovin. Ngeh in.

Mary Bangin Kiphalin

Mary bangin kiphal in. Mary chu Israel mi ahi. Israelte dana chu aji kihelouva naovop le neiya chu songa selih ding ahi.

Mary chu nungah theng ahin, Joseph to kicheng dia kitep ahi. Akichen masang lhona nao avop ding chu, Joujeph in akichenpi louding, chule, songa selih ding bou ahi. Hinla, Mary chun Pakai thusei anit in, “Ven, Pakai nalhachanu kei, nasei bangin kachunga guilhung hen,” ati. Hichun Vantil’in Mary adalhatai. “ atitai(Luke 1:38)

Mary akiphalin, Pathen thusei ngaiya thiding chan hijongle angap in Pathen khut a  aakipei.

Pathen hi thiljouse sema le ijakaiya thunei ahi. Mihem hinkho jong ama khut a uma ahi. Ama thupeh nit hi ‘thina ahipoi. Hinna ‘ ahijoi.

Mary akiphalin, athipoi. Songa selih in aumpoi. Ajidingpan jong khatveidia donda ding ati vangin, Pakaiyin akichensah thouthouve. Gai hamset ahivangin, Joseph in akichenpi e. Hichu, Pathen panpi vang ahi.

Thiljouse Hi Jatni Ahi

1.    Ase,chule  Apha;

2.    Pasal (Achal), chule, Numei (Anu);

3.    Positive (Atah), chule, Negative(Akaleh);

4.    Hinna, chule, Thina;

5.    Lhagao, chule, Tahsa aume;

6.    Thiljouse sempa Pathen aumin; chule, thilsem jouse susepa  Satan aume

7.    Pathen chenna mun (Van-gam) aumin, chule, Satan chenna mun (Damun) aume;

Pathen Thu Hi Hethemin Apanpina Kisanin

Masang chun Bible hi kana sim nompoi. Nikhat chu kakoma Pathen in, “Michonse, thidia lom nahi chu kahai nahisah ham? Bible sunga kasei namu chula em. Hinla, ka ngailut jeh a, michavai nahi kahet sasa nahinna dia kakom nahin belna ding kagonpeh nahi kihet in” tia asei kahetnia pat in Bible hi kasimnom nom jengtai.
Adeh in, keima chonset, mihemte chonset nunchan aseina, hatmo, themmo ihina hou thu hi ngei kasan, kasimnom nom jengtai.