HINKHOTHENG MANTHEINA JESU BOU AHI

 “Gollhang chun iti hinkhotheng amanthei ding ham?

 Nathu dungjuiya hithei ding ahi.” (Psalms 119:9).

Hichea ‘Gollhang’ kitihi ‘khangthah’ jouse ahopthai. Gollhang banga hatna nein alai, numei hihen pasal hijongle ahoptha ahi. ‘Gollhang’ ati-lonapen hi, mihem lah a jalenpen, anopnop a umthei, atha hatpetlaitah, koima e imacha ngaplel neiloulai, mihem kitithei laipettah chu ‘gollhanlai’ ahijeh a kisei. Hitobang hitheina neijouse hopthana dia kisei ahi.

Pathen thu hin aseinompen chu,mihem lah a tohkhel, bolkhel neibaipen, chule, kitimlelpen, ‘gollhang thahatlaipen’ jong ‘Pathen thu’ hin apuijanga, lamdih le chonphatna, hinkhotheng amansah jengthei ahi” atina ahi.

‘Pathen thu’ hi mijouse semphatna ahi. Mihem jouse hi Pathen mitmua ‘chonse’ ihicheh’uve. Pathen thu hin mijouse asemphatthei ahi. Pathen thu nit jalin, migiloupen jong miphapen asohtheiye. Tahsa le lhagao hinna munathei ahi. Tonsotgeiya hinna, Pathen-to chen khomna, Pathen cha hitheina eipetheiyuva ahi.

Pathen thu, Bible in “Jesu hi ‘Thu’ (Pathen’a um ‘Thu’) ahi” ati.(John 1:1-4).

 Jesu Christa tahsana kisanjouse chu ‘Pathen chate’ ahiuve.(John 1:12) Chule, themchanga ‘tonsot hinna’(huhhingna) chang diu ahi (John 3:16-17).

‘Themchang’ kitihi Pathen in, achonset angaidampeh, Jesu Christa thisanin ‘chonset asopthengpeh’ a themchang a, athenga Pathen in asana hi. Hijeh achun, Jesu Christa hi ‘tahsante themchanna, thenna, huhhing channa’ ahi.

Hinkhotheng mantheina dia ‘Jesu’ nei ngai ahi. Ama panpina jala, hinkho hi kipah le lolhinga manthei bou ahi. Jesu ‘nei’ kiti chu, ‘Leng le Huhhingpua kisan kiseina ahi. Chutengle, Pathen in Lhagao Theng eipeh’uva, hichun eipui jinguva, Pathen lungdeiya hinkho manna ‘hinkhothah’ chu eimansah’uva,  eiho dia jong phapen hinkho chu eimansah jiu ahi.

Hinkhotheng mangnoma, Jesu Christa kithopina nathum tah em?

Jesu Christa na nei tah em? Nanei tahle, aphai. Hinkhothah napeh chu Ama lungdeiyin mangin. Nitinin Bible simin, tao jingjengin.

Jesu natahsan vanga na Huhhingpu e na Pakai dia nakisan loulai, ahiloule, kisana nakihet vanga hinkhothah chu mangtheiloulai, mangjouloulai nahile, tutah hin taovinlang, kisan jengin.

Pathen in panpi jingtan.