Mitamtah hin ‘chonset’ hi ipi ahi ahechenpoi.
Chule, ‘Chonset’ hi mihemin achama anei ahipoi. Napea uma ahin; nachama
napaithei jong ahipoi. Chonset nabolsahpa sanga hatjo tha-hatna in bou
najopehthei ahi.
Mi konkhat in ‘chonset kaneipoi’ atiji. Bible
in “Eihon chonsetna kaneipoi, itiuva ahile, eima le eima kilhemlha a ihiu ahi,
chule thutah chu ilung sunguva umlou ahi. (1John 1:8)
Bible a ‘phondoh ding’ ati ‘Chonset’ hi
nahinkhoa thil nasuhkhel chu kisei ahipoi. Adam (Pasal) le Eve(Numei) in amani
chama ‘Pathen deilou chu abolu ahipoi. Abolsah’uva uma ahi. Abolsah’uva chu
‘satan’ ahi tia Bible’a kimu ahi. ‘Pathen deilou bol’ chu ‘chonset’ kitia ahi.
‘Chonset’ chu ‘satan tha-hatna’ ahi. ‘satan tha-hatna’ ‘chonset’ chun, Pathen
deilou chu abolsah lhon ahitai. Adam le Eve in asuhkhel lhon jeh achu Edena kona
kikaidoh ahilhontai. Eiho jouse jong hi Adam (Pasal) le Eve(Numei) akona peng,
chonsetna guiya peng ihi cheh’uve. Numei le pasal ‘chi’ kigoma peng ihi cheh’ve.
Hichu ‘tahsa lunggul a kona peng’, chonset-ga ihiuve. Hiche chonsetna chun
Pathen-to eikhen’u ahi, hichu Pathen lunghanna eiho chunga umchu ahi. Hiche
Pathen lunghanna akona ei lhatdoh thei diuva chu, ‘mihem lunggula kona peng hilouva
Pathenna kona, Lhagaova kona peng’ bou chu ahitai.
Jesu Christa chu ‘mihem luggula kona hilou,
Pathen, Lhagaothenga kona penga’ ahi. Ama bou chun eilhatdoh theiyu ahitai. Jesu
chu Cross chunga ahungthin, ‘satan tha-hatna, chonset’ akonin ei lhatdoh taove.
Hichu, nahetthei tah em?
Tua, nang jong ‘chonset, satan tha-hatna’
nanga umchun Pathen deilou ‘chonset’ chu nabolsahji ahi. Hiche, ‘satan
tha-hatna, chonset’ chu Jesu Christan ajosa ahitai. Hinla, Jesu’n ajomana nang
nachan jeng ahipoi.
Semtila Pathen in Mihem asema chu ‘Robot’ asem
ahipoi. ‘Kholbut’ (Robot, Machine) maimai banga, khat in akhoiloh loule
chattheilou banga Mihem hi asem ahipoi. Achama chatthei le lunggel neitheiya
asem ahijoi. Hiche jeh hin, mihem in ‘deilhenna’ aneiye.
Tua jong, Adam le Eve akona mihem jousea hung
kipeson ‘satan tha-hatna, chonset’ chu eiho jouse thisan-gui le hi’na ahi uma
ahi. Koima alungthengseh aumpoi. Miphapen nati jong chu alunggela miho hotna,
vetdana, kidahna dimset ahi. Achihthei jeh a atah asoloubou ahi. Pathen in vang
mijouse lunggel ahet ahi. “Lungsunga um chu kamin aphondoh jia, khut le keng in
atohdoh ji ahi”. Hijeh achun, lungsunga ‘chonset’ umjing chun phatkhat-le,
ahinntohdoh jingthei ahi jeh achu, lungsunga um ‘chonset, satan tha-hatna’ chu
Jesu Christan eijopeh tokahseuva chu ‘hingjing, natongdoh jingthei’ ahi. Mihem
in hiche chu ajothei ahipoi. Iti kitim jong lechun, photlot louva, nagellou
bangtah a mikhat in nasetna ding ahinbol jengle, nalungsunga um ‘Gulgu, satan
tha-hatna, chonset’ umchun na ahintohdoh jingthei ahi.
Hijeh achu, Bible in ‘nanga um chonset,
nalungsunga um, Jesun ajona chu nachan loulai-le phongdoh’ dia asei ahi.
Nalungsunga ‘gu’ kisel, ‘aguh a mihem in bailet a amudohtheilou dia kisel ‘gu,
satan’ chu akiselna, pon kikhukhum chu hohdoh in, vah lah ahin phongdoh in,
chutile, ajahchantin, jammang ding ahi. Namoh phondoh jong hilouva, Jesu min
nakouva, aanga naphondoh ding, na hodoh ding ahi. Pathen, Jesu,lhagao Theng
namutheilou bangin, nasunga um ‘gu, satan, atha-hatna, chonst’ chu mihem mit in
namuthei poi. Hinla, hiche thaneina chun thilse tampi nabolsahji ahi. Jesu
Christa nakisanna, Pathen Lhagao Theng nasunga achentengle, ‘gu, chonset, satan’
chu jamdoh ding ahitai. Chutengle, ‘chonset thaneina akona jalenna naneiding
ahitai’. Ajehchu, Jesu Christan ‘Gul, satan, chonset’ chu alu ajepchipsa
ahitan, Jesu nanga achentengle, nanga um jong chu najepchip pehding ahitai.
Hitia chu, ‘jalenna nei’ anhiding. Khatvei komkomle, hin dailoh inatin, nalung
ahinsuhhang ding, nalungjinsah ding, ‘Gul chun amei ahin peh loh jiding ahi’.
Hinla, ‘Gul’ chu ‘alu’ Pakai Jesu’n najepchippehsa ahitengle, ‘amei iti peh
lohloh jongle mi achuhthei ahitapon, thilse chu naboldoh sah louding ahitai.’
Lhepna jouva, satan lu jep chippa Jesu chu,
tuhin, kikouvin. Na Huhhingpu le na Pakai tahbeh din kikouvin, kisanin. Hichena
ding chun, nachonset naphonna, thupha nachoiya, A anga nakuna, ngaidam nathum
ding. Ama Huhhingpu le Pakai dia nakisan ding, chutile Aman nna huhhing ding,
huhhingna chu nachan ding ahi. Hijeh chun, Pathenthu Bible in-
“Eihon chonsetna iphon vangule ama chu eiho
chonsetna chengse ngaidam ding le
chonphat louna jouse siltheng dinga tahsan umtah chule chonphatah ahi. “(1John
1:9) tia ei hilu ahi.
Taovin, A anga phongin “Pakai, chonsea kijil,
chonsea peng, chonsea hinkhomang kahi. Nei ngaidamin, Cross kadinga nathohna, nathisan
longlha chun kachonsetna sopthengin lang, ‘Pathen cha’ in nei semin. Nanga um ‘Tonsot-hinna’
chu neipen. Chule, lungmonna-kim, hinnopna chu neipen; ka Pakai le ka Huhhingpu
nahi. Ka hinkho hi nadeilamin neipuiyin. Ka Pakai Jesu minin, Amen.”
Hitia nataole ‘Amen’ tin jih in.
Pathen in phatthei naboh jing tahen.
No comments:
Post a Comment