GINMONA HI LHEPNA LENPEN KHAT AHI

Pathen thusei khat ahungin, HOUIN’ a thu asei chu lamkai ho geiyin lung lhahnan aneitauve. “ Hichepa hin thu aseijomle, Huhhingna changlou dia  eiseidoh diu ahi” atiuvin, phat apekittapouve.

Sopite, Jesu Christa hi Pakai le Huhhingpu dia kisansa nahitah-diu kakinem’e. Nahi loulaile tuhin kilhanin sang jengin.

Pathen thu Bible in aseibanga, nakilhana, nakisanjouva jong kiginmona nanei nahlai jeng em?

I-kidoupiu Satan hin, tahsante a lhepna sangpen khat hi ‘kiginmo’ hi ahi. Na kiginmo-le, nangma hatna’a kingam,nangma kisong nahin, Jesu Christa hi kingaina le kisonna’a naneilou tina ahi.

‘Pathen tahsa’ kiti hi ‘Athu Bible a kisei ho tahsan’ tina ahi. Nangma katahsanin, naseiho tahsan hih leng, nang katahsan chu ipia kiphochen ding ham? Nasei katahsan-le nang katahsan kihetna ahi.

Jesu Christa nasonle nang nakiginmo chu lhahsapna ahi he’n. Pakaiyin asei chu ‘ahi’ tia natahsan jeng ngai ahi. Hitia nakingapjou ding chu ‘PATHEN TAHSAN’ kiti chu ahi, Achom jep a seidin ‘Pathen tahsan’ kiti hi ‘Pathen tahsanjou’ ‘Pathen sonjou’, ‘Pathen in asei chu abolteitei ahi’ tia kingap jenga, hijeng hi ahi.

Mikhat in, ‘Huhhingna changlou nahi’ atimana van-gam lutlou dia kigingmo theibep nahinah laile Jesu Christa natahsan chu kicheh lou ahi. Alutlou ding mong nahi. Hui themcha nunna mut lonle theibep chu tahsanna lhing ahipoi. Christa Songpi dettah chunga kisadohloulai nahi. Kilhanpha’n, Lhagao Theng thumin, Lhagao Theng in eipanpi tengule chuti maimai ahithei poi. Jesu Christa nakisan joutengle Pathen in Lhagao Theng thahatna eipeh diuva kitep ahi. Hichu ineitengule, thahatna, tahsandet mong mong chu ineijiu ahi.( Simin Acts 1:8).

Nangma kiginmo le kitahsan chun ‘huhhing nahi le nahilou’ ding ahipoi. Keiman nangma kaseidanin jong thu apopoi; Jesu Christa natahsanna bou chun ‘huhhinga’ na umsah ding ahi.

Tahsanna dettah neiya Christa Songpi det a in nasahpeh din, Pakai koma taojingin, Nitinin Bible simin, Lhagao Theng kithopina thum jingin.

 Pathen in panpi jingtan.