JESU NAKISANLE CHONSET A KON ONGTHOL DING NAHI

Bible in ‘Chonset’ ati hi nitina suhkhel, thilphaloubol le akigelji hokeuhi ahipoi. ‘Chonset’ in ahopthanai. Hicheho keu hi ‘chonset’ ahile Jesu hungthi ngailou ahi. Mose Dan peh ho nit jousen ‘chonset’ apeldohthei ahi. ‘Bolkhel’ homai ahilou jeh a Jesu panlouva ‘chonset’ peldohthei hilou ahi.

Bible in ‘chonset’ atihi ‘Pathen Deilou bol’ chule, ‘Pathen Dei bollou’ jong chonset ahikit’e.

Mihem masa Adam le Eve chun ‘Pathen Deilou’ anabol lhon chu ‘chonset’ ahitai. ‘Chonset’ chun mijouse ‘thina’ aso ahitai.

Pathen in asemsa mihemte angailut behseh jeh in, ‘chonset’ akona huhhing din Achapa Jesu Christa chu leiset a ahinsolin; Jesu chun ‘chonset’ thaneina chu mihem tahsa aneina achun apon, cross chunga chun athipitai. Athi chun ‘chonset’ thaneina chu athat in, lhana avuiyin, pontom hoto chun ‘chonset’ chu lhana adalhan, Amavang ‘vou loupi’ kivonin, thithei-taloudin athoukittai. Ama athokit banga, Ama tahsanna kisante jouse, ‘vou loupe’ avonpeh a, tonsot a thikittalou dia akaithou ding ahi. Loupina Pakai changing tahen, Amen.

Mihemte hin tahsa thihi akichaina ahisah un, Pathen thusei hohi agelthemthei pouve. ‘Chonset’ tia Pakaiyin asei hojong ahethempouve. ‘Thokitna’ , ‘Pathen Lenggam’ ‘Tonsot Lenggam’ ‘Van-gam’ tihojong ahethem thei pouve. Itobanga Themgao ho kama asei vangun, tahsanna lhingset nei mihem akikhat’e. Hijeh achu, Pakai Amatah hunga, mihem lim ahungput’a, mihem min ahungneiya ‘Jesu’ kisah a kihe ahi. Ama chu, ‘Tonsot Pakai’ leiya mihem’a hunga ahi.

Mihem jouse jong Asempa banga tonsot geiya ‘hing dinga’ Ama Limloa Pathen in asem ahi. Leiset ahi ‘tohding’ khat neiya kisol, ‘Mission’ khat neiya Pathen in eihinsol’u bou ahi. Ole, natonga, mission field, natohna muna namahthah jeng ding ham? Na hungkona, Pathen koma kilekit louva, na ‘Lou-konna’, ‘Na natohna’ muna namahthah jeng ding ham?

Amangthai din Pakaiyin eidei pouve. Chule, i-hung konnau Pathen koma i-kilekit theina diuva, lamhila le ei mahthahsah nomuva ‘chonset’ tha-hatna akona ei ‘huhhing’ diuva le i-hung konnau Pathen kom eipuilhung diuva Jesu Christa hunga ahi. Akeng beh natuh a nakipuisah louding ham? (Facebook keuva thusei hi akimjoupoi. Ka ‘Blog’ hohi ana simjin. Taoto thon anasimjin, Pathen in napanpi ding kataona ahi)

Jesu Christa chun ‘thoukit ding’ ihiu eimusahnomuva, eiho lima hung put a, mihem tahsa le hinna neiya hunga, thia thoukit a, seijuite alim amel dihtah amusah a, akihoupia, thupehanei phat a seijuite le eiho geiyin thokitna itahsan theiyu ahi. Tua, tahsa’a nato ho keu hi gel hih in, thokitnile thikit loudia natho kit ding ahi. Pathen kom jonlouva, Damun najot-le tonsot a, leiset chung hahsatna hoto tekahtheilou ‘gimna’ ‘gotna’ natoding ahi.

Jesu Christa tahsan jouse vang ahung konna Pa-kom apuilhung ding, leiset hahsatna ho hephalouva tonsot a nomsa jing ding ahitauve. Ajehchu, ‘chonset thaneina’ joupa Jesu Christan Ama tahsante jouse ‘chonset tha hatna’ chu ajopeh a, ‘chonset’ in suboitheitalouva, ‘chonset’ akona jalena, Asempa, angailupenpa Pa Pathen in Lhagao Theng achinsah a, Jesu Christa-to hinkhomna, hiche leiset a hinlainia pat, tahsa thinunga tonsot geiya kipana le nopna chu apeh ding ahitai.

Jesu Christa tahsan jala, ‘chonset’ akona ongthol’ i-hitah jalun, Pathen chu thangvah in umjing tahen.

“Soh (chonset soh) ihi louna diuva Christan eilhatdoh’u ahitai; dingdet jing’un, soh namkola chun kihen ohkit tahih un” (Galatians 5:1)

Nang jong, ‘chonset’ akona ongthola nahitah-le, ‘chonset’ soh a ohkit taloudin Jesu chu kou jingin, Bible nitinin simin, Pathen koma taojing jengin.

Pathen in panpi jing tan.