PAKAI MINA PHATTHEI KIBOH TONA

Christa Jesu-a ka insung mite jouse ho,

 “Pakaiyin phatthei naboh henlang nahoidam jing hen,

Pakaiyin Amaivah chun nasalvah henlang alungsetnan na umpi jinghen;

Pakaiyin Amai nangat henlang lungmonna nape hen.” {Number (Minbu) 6:24 -,26}

JESU KISANIN - 2. NUNNOPNA HINKHO

Mihem hi chonsea kijil, chonset-to chengkhom ihiuve. Hichu hethemlouvin, konkhat in ‘chonset kaneipoi’ atiji. Bible in aseiye –

 “Eiho chonset neilouva ikisei vangule,eiho le eiho kilhemlha a, thutah chu isunguva umlou ahi.” (1John 1:8)

Chonset bulpi vang, Jesu Christa’n ei jopeh’u ahitai. Hinla,chonset thaneina chun eihin suhnohphah jing thouvu ahi – hichu ‘lhepna’ itiu hi ahi.

Pakaiyin, “Nei kouvun, chutile Keiman kasan ding nahiuve” ati.(Jeremiah 33:3) tia asei le

 “Koihile, Pakai mina tao chan (Amina kou chan) chu huhhinga umding ahi” (Rome 10:13)

tia kisei bang in lungdonna le hahsatna kato chun, Pakai Jesu kakouvin, kataovin ahile eisangin eisunohphah, ei sugenthei, jousea um hochu abei dom dom in, kipana hinkho eimansah jing tai. Hinla, chonset thahatna ‘lhepna’ itihou hi ahehdehpoi.Hijongle, Pakaiyin,ka lungsunga thu ahinseijin

 ‘……vannoiya hin hahsatna ho natoh uve; amavang hang-tah in pangun, keiman vannoi kajoutai” ahintiji(John 16:33) tengle,

“Najoding kalval’u lhepna natosah pouvinate’ tia kiseiho jong hi, lhepna hohi Aman eijopeh sau le eijopeh jing ding ahinai’” ti kahin-gel jitai. Hitia, kaki ngap lhah teng chule lhepna chu abeito akitoh jitai. Loupina Pakai chang tahen.

Ka thusei hohi keima hinkhoa kato le kamudoh dungjuiya kasei ahi. Bible kasimmasah ahipoi. Pakaiyin kahinkho akheldoh jouva, kana taona le Pakai kana houna ho chu Bible-to kitohnam tia kavetna lama Bible kasimsimle kagutcheh cheh in, Bible pumpi kasimchai ahitai. Internet a Gospel Mission bol ho, ‘Internet Evangilism’ hoto ei kijopmatsah a, kumthumval hi pangkhom, tongkhom kahijing taove. Adeh a U.S. gama Internet a Pathen natohna Theological le Bible College tamtah hi pangkhoma ‘Internet Evangelism’ hi semdoh anahin. Hichea ngaikhoh, Bible le thuhil lhangpi-to kitoh a chena theinadingdol chan hi eisimsah’uva, manchahthei dinga jong eipeh’uva, nitina eihin thot jing jiu ahi.

Hinla, hiti hohi, ahibanga manchah aphachompoi. Thusei minthang jousen jong aseiyuve. Min ama hinkhoa Pathen in amusah le atosah dungjuiya Pathen thu aseile bou Pathen in phatthei aboh’a, mihon phattheina akisanjiu ahi. Hijeh achu, kasei ho le kaseikit ding jouse jong hi Pakaiya kona ‘kamu le kahet’ hobou ahi. Hinla, Bible hilto kitohmo lounadia simsim kahin, chule kaseidan hohi, hiche thuhil le chena lhangpi chu juiya sei kahi.

Nang jong, nachonset naphonna, thupha nachoiya, Jesu Christa chu Leng le Huhhingpu a nakisanle bou Ama lhatdamna nachan ding ahi. Hijeh chun, Pathenthu Bible in-

“Eihon chonsetna iphon vangule ama chu eiho chonsetna chengse  ngaidam ding le chonphat louna jouse siltheng dinga tahsan umtah chule chonphatah ahi. “(1John 1:9) tia ei hilu ahi.

CHRISTIAN DIHTAH 1 NUNNOPNA HINKHO

1.HINNOPNA : Christian dihtah hinkho hi nomtah le kipah jing, phat masanga le tonsotgeiya kinepna lhingset nei, lolhingtah le lunglhaisel a um, lungmuong tah a le nunnomtah a hinkho nei hi ahi.

Hinla, Christian tamtah hin hiche nunnopna hi neijoulouvin, lunggim,lungdon, kinepna neijoulouna,lungmonlouna,kichat le hinnomloutah amang jiinge. Hichu ipi jeh ahidem? Aminmaiya Christian hon hinnopna aneitheipoi. Hitia chu nahile, imlouvin Pathen koma thumin.

 Taovin “Pakai,hinkho nomtah a kamantheina ding le nacha deitah kahinadin nei panpin. Ka Leng le Huhhingpu Pakai Jesu Christa minin, Amen.” 

CHRISTIAN DIHTAH 2 NUNNOPNA HINKHO

Christian chu Jesu Christa ‘huhhingna chang’, ‘Jesus Christ a hinna nei’ ho ahi.Christian insungmi,Houbungmi le thilpha bol manna Christian hithei hilou.

          Bible aseiye “Nangman nakama ‘Jesu chu Pakai ahi’ na phondoh a, chule, nalungthima Ama chu Pathen in mithilah akonin akaithouve, ti natahsanle na sochat ding ahi.” -Romans 10:9.

          Hitia chu, hiche hohi nabolle Christian dihtah chu nahi -     1. Pathen natahsana, chule Jesu Christa chu Leng le  huhhingpu ahi ti natahsan ding,     2. Na chonset ngaidam nathum ding, 3. Jesu Christa chu nakouva na Leng le Huhhingpu hidia na ngeh ding, 4. ‘ Jesu Christa chu Pakai ahi’ ti nakama na phondoh ding, chule, Pathenin Ama chu athilah a konin akai thouve’ ti lunggila natahsan ding ahi.

          Na chutibolle, ‘ mi penthah’ ‘ Christian dihtah’ nahi ahitai.

1.TAONA LOLHINNA DIA NGAI HO 1.JUMMO TAH A TAO

1.TAONA LOLHINNA DIA NGAI HO : 1.JUMMO TAH A TAO :

Luke 11:5-8 Hichea hin mikhatpa hin agolpa koma changlhah agathum ahi. Jan khangkim ahitan, aloipa hi luma ahitai. Hinla, maljin khat a-ina hunglhungpa chu nehsah ding aneilou jeh chun, agolpa koma agathum jeng ahi. Agolpa chu, jan khang ahiyah jeh a luma, thou nomlou ahitai. Hinla, khatpa hin, changlhah chu amu loule maljinpa anngol ding ahi jeng jeh chun, lamdang hetalouvin, jachat le kiphatlam donlouvin, athum tun tun jeng tai.

Agolpa koma chun achen, kot agakiuvin, “Golpa, neikhoton. Maljin kaneiyin, neh ding kaneipoi. Bat din changlhah neipen” ati.

Agolpa chun, “jan khanga ipi nahungbol ham, kalup ahitai, peh ding jong kaneipoi” atin alumkit tai. Hinla, khatpa chun, kot akiu kit kit in, athum tei tei jeng tai, “Ahihih e, golpa, neilungset in, neipeh loule, jachat thoh ding kai. Maljinpa nelouva kakoi ding nom hih in, lungset in” tin atao tao jeng tai.Hitia athum tun tun jeh chun, agolpa chu thouvintin, angaichat chu, apeh tei ding ahi.

Hiche banga chu, nang jong athen koma natao tengle, jachat le ningkihal donlouvin, tao tao jeng, thum tuntun jeng in. Namu lou manin danda hih in. Avel velin tao tao jeng in. Chutile, nataona chu Pakaiyin asantei ding ahi.( Hiche hi Pr. S.T.Hengna in Songpijang’a  Gospel Crusade, 25-28/7/2013 abolnamuna  asei ahi)

Hitia chu bolding nanople, Pkai kom lhutna’n ‘Amen’ jih in. Pathen in nataona sang jing tahen.

MIPHA HO DIA HETDING

Pathen a penthahna thusei hon JOB thu hi asei jingun, Job hinkho’a thugil um hi aseidoh jipo’ve. Job hinkho’a Pathen in eiseipeh nom’u chu ‘chonphatna hin mihem Pathen kom alhutjoupoi; Pathen koma chonset ngaidam thum’a, a anga kunteitei ngai ahi’ ti ahi.

Chonphatna le thilpha bol hi ngaikhohten ahi. Hinla, hichemana chu Van-gam lutding, Pathen kom lhunna, Penthah hi’na ahipoi. Bible sunga mun tamtah a akimuna chung in JOB hinkho ahin, veute.

Amaho seidan hile- Job hi mipha, Pathen ging, thilphabol ahijal a Pathen lungdei amu ahin, Christiante’n jong hin thilpha ibol’ule Pathen kom i-lhun diuvin aseiye.

Hinla,  JOB lekhabu le ahinkhoa kimu hi  –Job chu mi chonpha le Pathen ging, thilse bollou ahin, Pathen chan-geiyin jong mipha ahi ahe’n, phattheina lhingset apen; mihaotah le insung pilhingset nei ahi. Hinla, chonphatna chun Pathen kom alhuttheilou ahi. Aman, hahsatna atophat in achonphatna asongin, hamsetna ato chu Pathen in apatepnan agel’in, Pathen koma akiphin’e.

“Pathen in mi apatep ngailou lam ahepoi” ( James 1:13)

Job chu mipha le Pathen ging ahijeh chun, ahetthemlou jeh a kiphin ahibou Pakaiyin ahei. Hijeh chun, ahilding aloiho asolpeh’e. Ahildia che, aloihon ahilthem tapouve. Hijehchun, Pakai, Amatah in Job chu ahouvin, ama le ama kihuhhing din aseipeh tai.Job in achonphatna ason vanga, ama le ama kihuhhing theilou, achonphatna’n jong ahuhhing joulou akihet doh tai.Chonphatna hon ahuhhing joulou akihet phat in, Job jong akisonna jouse abeitai.

Akhonnan,  Job in chonse ahi chu ahin kihetchenin, Pathen koma ngaidam athumtai- “Hichun, Job in Pathen adonbut in, “Nanga kona imacha lungguh jong selthei ahipoi ti kahetai. Koiham kihilna helouva selmangpa chu? Hiche jeh achu kahetlou kanasei ahibouve, thil hohi keidin akidang valin, kahetthemlou ahi. Ngaiyin, ka tao ahi, chule na koma kaphon ding ahi: Nang kangeh ding chule ka phondoh ding nahi. Nangma thu hi kakhojah ahinai, hinla, tu’nvang kamittah in Nangma kamutai. Hijeh hin, kei le kei hi kakikhop in kakikidah in, kakithetai, chule kisih in leivui le vut kakinutai” ti’n Pakai anga dinsun ngaidam athumtai.(Job 42:1-6)

Chutah chun, Pathen along alhaitai. Job loi  le gol, Eliphaz teho jong chun Job ahilthemlounauva Pathen in aphoh in, kilhaina asemlouvule Alunghanna achunguva lhung dia agihsal phat in Eliphaz tehon jong kilhaina chu aboltauve.

Job vang, kisih a Pathen koma ngaidam akithumtah jeh in, Pathen in, phatthei aboh in, masanga sangin ahung haojotan. Chanu aneikit hojong, nungah hoipen ahung hitauve.(Job 42:6-17)

MIPHA HO – mipha, mihem dila setna mong neilou, koima seisettheiya chonlou, houin kaihat,houlamkai, tao jing, Pathen thu jong ngaiya –sei jing, tolom pejing, ju donlou, houlama kipe ho, chule, midinga jong pha, mijong panhu nom. Hiteho dinga hi Pathen koma ngaidam thum ding ngai behsehlouva gel atam’e. Hiche’na lama hi hitobang ho dinga hi Van-gamlut, Penthah, Jesu Christa mi Huhhingna kisan hi hahsa ahi.

Pathen in apha adeiye. Hinla, Amakom chena dinga LAMPI khat asem chu naho loule chonphatna keuvin, napuilutthei ahipoi. Hiche LAMPI chu ho-lechun nathilbolphat le nachonphatna sese chu na lallukhuh ding ahi.

PENTHAH HINKHO MANDAN KIHILNA -1na

THU-MAKAI :Christian tamtah in, kum tampi Christian ahinungin jong ‘PENTHAH’ ahiloule ‘LHAGAOVA PEN’ kiti ahechenpoi. Hiche, ‘PENTHAH HINKHO MANDAN KIHILNA -1na’ hi Christian hisaho hihen Christian hilouhon jong iti Penthah hinkho man dingham ti kihilna dia kigong ahi.
Pakaiyin, kahinkho akheldoh’a, kum phabeppi, eihinpuina sunga hinkho manna’a kamudoh le, nitina Amathu kasimna hoa kona, asimjouse phatchomna dia, tao-to thoa kahin-gontoh ahi. Nangin jong tao-to thon’ simin, chutile Pathen in phatthei naboh ding ahi.
Mi tamtah in ‘PENTHAH’ ‘LHAGAOVA PEN’  kiti hi ipiham jong ahechenpoi. Min aseimanin, miseiseichu abolin, akilhanin, apenthah le thahlou jong akihetchet dehpoi. Mihilpa’n “Na pengthah tai” atipeh-le pengthah ahi akihet nai.

NA PANPI JING DIN LHAGAO THENG THUMIN

Jesu chu ‘Leng le Huhhingpu’ a nakisantah-le kipa aume. Hiche hi het tha in. Eiho chonphatvanga hilouva,ngailutna jala themmmo chu Jesu thisan jal’a them eichan’u ahibouve.

Chule,  Jesu Christa-to hinkhomna hinkho, lhagao hinkho hi man hahsatah’a nagel thei ahi. Chule, ahi’na jong aum’e. Agiloupa soh’a kona kilhadoh nahitahvangin, agiloupa chun na it jingin, kilelah ding natup jing ding ahi. Hitia, lhepna hohi nachanga douding nati-le najo louding ahi. Lhagao Theng panpi louvin koiman ama hatnan Christian hinkho amangtheipoi.

Paul in “..Lhagao Theng dimset un” ati(Ephesus 5:18)

PATHEN A KON THA HATNA THUMIN

Hou ina lamkaihon chonphatna, thilpha bolna ding thu ahasei behseh un, mi tamtah hou in kai le thungai nomlouvin aumlouve. Crusade, Camp, kisuhhalna  i-bol’u jongle, hichelam hi ahaseiyun, houina le houbung lah a hung maimai tamtah hon, alunggel’un, “ O, hiche hi hija hi. Lamkai hohin, tolom penante tia Pathen thu eihilu ahi’ tin Pathen thu chu ngailouvin, alunggel’u achombeh asohjin, Pathen ngailutna Jesu Christa’a hung kiphongdoh tahsa le lhagao chonset thaneina noiya kona Huhhingna, tonsot-geiya Pathen-to chenkhomtheina thu hi ahedoh theiji tapouve.

Pakai Jesu athia athodohkit jouva, seijuite koma asei chu “Lhagao Theng chu nanghoa ahung um tengle THA HATNA  nanei diu ahi” (Solchah 1:8) tia asei hi gelding, hetding ahi.

KA TAONA KHAT

Pathen ngailutna thu kiseipeh’a, phatea ngailouva, ‘pha’ kisateitei hohin kato tobang tohhenlang hile Pathen hi hinho’lintin, hejeng tante katiji.

Vacha banga jalentah a hinkhomang kana hiya kona, (Eiho geldan hile ‘Ka i-louna, ka i-khohna, ka mopohna hilouhel )- kaseisei jeng ‘Pathen ngailutna Jesu Christa a kiphong’  hi noma kachan ahipoi. Hahsatna katohon Pakai mel eimusahtai. Solchah Paul in,

”Hichea hin Pathen in eingailutnau photchenna eimusah un, chonse i-hi laitah’un Christa eiho khel din ahung thitai!” (Rome 5:8)

JESU MININ TAOVIN

Hat-lou le lhasam, Pathen mitmua chonse le lhinglel hijongleu hen,

”Hiche hi Pathen koma ikisonnau ahi : AMA LUNGDEI dungjuiya ithumchanu eipeh jiu ahi. Chule ithum chanu eipeh ule, AMA LUNGDEI chu eihoa aum iheuve”.(1 John 5:14-15)

LHEPNA DOUDING

Lhepna hohin nitinin eibomun, chonset eibolsah jing’uve. Hitia lhepna kitoh-gempen hohi – lunghan, khat chunga lungnopmo, mikhat houset a pho le gihsal, tohding dol toh nomlouva phatdanga dia vohchon, thaset, jousei, mi jouva lhep (apha hile kilomtah, alunghan le lhaset diu noplou jeh a i-ngailuttah iji, icha, i-gol jong thu neocha cha lhep a lunghang lou le lhaselouva koi) – hiti hohi kitoh jing ahi.

Chunga kisei lhepna, mihem geldia neocha cha, hohin asuhset pen chu ‘eima’ akihiji – ‘eima kipana’ eilahpeh’a, i-hidingdol ki-hitheiji talou. Mi kipah-louvin tohdoh pha anei theilou iheuve. Agiloupa dei chu mi suhmo hi ahi. Suhmo’a kona nalah-mangpeh jichu – na insungmite le nagolte chunga nalunglhaina ho, natohna a nakipa le kinepna, na-gunchu’na le tomngaina, nachanchunga lunglhaina, thilpha nabolnomna, le adang ahin – hicheho jouse nasuhmo’a kona chu Pakai chunga nakipa le kinepna chu nalahpehgotji ahipen’e. Lunglhai lou le kinemlouva na-umtengle Bible simnom talou, tao nomtalou, houin kainom talou; chule, nanu-napa, na sopi, naji-nacha, naheng le kom,chule midang ho dia thilpha bolnomna umjitalou ahi. Hichu, na lhempa lungtup le kipana ahi.

Bible in, “Gotsa demin umun(lung neng le limgeh in), chingtheiyin, phat jousen kiging jinguvin; na kidoupiu, Agiloupa chu, Sakei gilkel banga, koi kaval lhum the idem tia vah-le ahi.”( 1 Peter 5:8)

CROSS HI JESU CHRISTA GALJO MELCHIHNA AHI

India gama hin Christian hi 3% (jakhat a 3) bou ahi. Hinla, khopi jousea Cross akitah cheh’e. Cross hi i-Pakaiyu Jesu Christa galjo melchihna ahi. India gama jong Jesu’n chonset-gal ajouvin, ajopeh ding, alenggam machal jing ding ahi. Loupina Pakai chang jing tahen.

India ahin, Bristish khanga pat in, michonsepen akhailihnau hi ‘Phasi’ ahi. Rome Solkal in vannnoiya vai ahop laiya chu ‘Cross’ chu ‘Indiate Phasi’ banga michonsepen kikhailihna, melse-tah, koima munomlou anahi.

NGAILUT JAT THUM HO

Mijouse’n ngailut ding anom cheh in, ‘NGAILUT’ thucheng jong ajanom cheh in, adei cheh’e.Hinla, mitamtah in ‘Ngailut’ hi ahechen joujai poi. Chule, ‘Pathen mi ngailutna le Mihem ngailutna’ hi kibanga gel jong tamtah aum’e.

Pathen hi Ngailut ahi (1John 4:8) ti hen mihem in ipi boljongle, achate hijala angaidam jing dia gelloi jing aumdapoi.Chule, ‘NGAILUT’ jeh a kithat, tha, voh le den, aleu le akileusah, adimset tai. Ahideh in, khangthahte hin, ahetthemlounau atame.

‘NGAILUT’ hi eipaova jong hi akikoina phatsot ahihihlaiye. Bible lemasahpena chu Pu Ngulhao Thomsong in’ eipaova umlou thucheng Bible aum Pathen ngailutna seina a asemthu bou ahi. Hijeh achu, ahilchetna dia Bible kijihna lui Greek paova kon veuhite.

Bible them Theologians hon ‘‘NGAILUT’ hi hopthumin ahom’uve, hicheho chu : -

1. EROS : ‘NGAILUT’ jatkhat hi ‘EROS love’ akiti. Hiche ‘‘NGAILUT’ hi ‘DEICHAT’ - mit’a mua kona ‘deichat’, ‘Hoisah’, ‘mitla’ hoa kona ngailutna umdoh hi ahi. Hitobang ngailutna hin ‘ama dingbou gelna’ aneiye.

2. PHILOS : ‘NGAILUT’ jat nina hi ‘Philos’ ahi. Hitobang ngailutna hi ‘kiloikhom, kigolchatna’ akonin aumdohji. Chule, ‘EROS’ bangin, changvalding gelnaval aumpo’n, eiman jong mi peh ding chule, lah mia jong lahding (‘peh le lah’) anom’e. Hijehchun, EROS sangin PHILOS aphajoi.

3. AGAPE : ‘NGAILUT’ jat thumna, aphapen chu “Agape” ahi. Hiche ‘NGAILUT’ hi “unconditional love” ( tepte-na beiya ngailut) akiti. ‘AGAPE hi “mukitding gellouva mi ngailut’, ‘ngailutna jala pe’a,imacha muding gellou” tina ahi. Mi thil apeh chu, ngailutna jala apeh ahijengin, hiche apeh le abolpeh jala chu imacha muding gellou’ , ‘imacha muding gellouva midang thilpeh le bolpeh’ theina ngailutna chu AGAPE kiti ‘NGAILUT’ ahi.

‘AGAPE’ ngailutna hi Pathena kona kimu, ichanu ‘PATHEN NGAILUT’ hi ahi. Pathen in eingailut jal’uva eiho khela thidia Achapa Jesu ahinpehdoh jeng hi AGAPE ngailutna - Pathen in mihemte chonset sopthengna dia ahinpeh chu AGAPE ngailutna jal ahi. Chule, Jesu Christa’n Apa Pathen gonbanga, kiphaltah a, eiho chonset ngaidamna dia, ahinkho apehdoh a, ahung thi jeng chu AGAPE ngailutna jal ahi.

Jesu Christa Huhhingna changjouse hi ‘Ama- to bang dia’ kou ihiuve. Ama bang ihitheinau chu, Pathen, Jesu Christa le midang ho dia AGAPE ngailutna neiya hinkho manding hi ahi. Hiche NGAILUTNA chu neiya eihon jong, heng le kom, gol-le-paite ding le tahsaho masotna ding le tahsanloulaihon atahsanna diuva, mukit ding gellouva panlah, peh le toh hi ahi, iboldiu chu.

Hichena ding chun, nabolthei le abailam penin, Pathen ngailutna Jesu Christa a hung kiphong thu hi hilson, pesonin – na Computer, Mobile hoa konin Bible chang ho le naseitheiho,miho seiho hi midang pesonin; eipaova kiso ho hi English, Hindi le paodangin leh in pesonin, paodanga pha hohi eipaova leh in pesonin – manthei nahina, nathepna chu Pakai loupina din mangchan. Pehthei dang nanei jongle pe’n. Ape’a chu Pakaiya konin peh’in aumjin, pehbe ahiji.

NA DAMNA DIN MIDANG NGAIDAM IN

"Pohgih kipoh hu’vinlang, khat in khat chunga asuhkhel chu kingaidam touvin. Pakaiyin,nangaidam bangun, kingaidam touvin." (Colossians 3:13).

Ngaidamna hinkho man hi Pathen phattheiboh channa dia ngaikhoh ten ahi. Mi nangaidam chu nangma dia hamphatna ahi he’n. Lungsunga miho vetdana le michunga lung-hanna nei hin, mihem ama hinkho nasatah in asusen ahi. Navetda, natuppa chun pohgih a anei sangin, nangin napoleljoi. Ngaidam lechun, nangma avangpha nahi ding chu kihet in. Hichu ahetjeh a Pakai Jesu’n, eingailut jal’uva “min nachunga suhkhel aneile ngaidamin” tia eihilu ahibouve.

Nadongma chu Pakaiya ngailun

Nungahnu/Gollhangpa, nadongmapa/nu chu Pakaiya ngailu’n.(cf. Ephesians 6).

Nangailut tahbeh a, hinkhoa chenkhompi nanople – Chingtheiyin, ‘Jesua hinna’ nei teiyin, ama jong neisah in, hinkhotheng, Pathen mitmua pha chun hinkho mang gel lhonin. Niseh in Bible, themchacha beh sim jingin; tao jingin. Nang din taovin, nadongma din taovin; na insungmi ding le nadongmapa/nu insung din taovin; naloi le golte din taovin. Pathen koma taovin, ama lungdeiya hinkho naman lhona, boina beiya na kichen lhonna din, Jesu minin taojingin.

Kipahtah le bpoina beiya nakichen lhona, insung kipah le lolhing, chule Christian dihtah insung natundoh pehna din tao jingin.

Hitia nabolle anaven, Pathenin nalolhinsah teitei ding ahi.

MARY LE MARTHA TAHSAN

Golte, Pathen in phatthei naboh jing henlang, Martha le Mary banga tahsan hat le Jesu chu Pathen Chapa ahi phongdoh a phattheina kim chang din napanpi jing tahen.

Martha le Mary in “Jesu Christa umna muna thina aumpoi. Ajehchu, Jesu chu Pathen Chapa, ‘Messiah’ (Christa) ahi” ti atahsan lhonin, ahile, atahsan lhon sanga lenjo le loupi achang lhontai – asopipau Lazarus, athisa chu kaithouvin aumlotai. Loupina Pakai changtahen.

Hichea mudoh umchu, Asopipao athijou nilinunga Jesu hung thu ajah in Martha achen, “Pakai, Nangma umlechun kasopipa thilou dinga”

Jesu’n, “Keima THOKITNA le HINNA kahi. Keima eitahsan chan chu THI JONGLE HINGDING ahi. Chule, Keima eitahsan puma hinkho mang jouse chu THI LOUHEL DING ahi. Natahsan em?” atile,

Martha’n, “Henge, katahsan’e, Pakai, Nangma Messiah (Christa), Pathen Chapa, vannoiya hungdingpa chu nahi” atitai.

Jesu hung thu ajah phat in, Mary jong achen, Jesu anga kunin, “Pakai, Nangma umlechun kasopipa thiloudinga!” atitai.

Jesu’n alungset behseh jengin, akap lotai. Hichun, “Hoiya nakoiyum?” atile Lazarus alupsahnau, songa kissing lhan chu avetsah tauve.

Hichun, Jesu’n, “Song chu tang doh un” atile Martha’n, “Pakai, tuvang hin, auitai, athina hi nili ahitai” ati.

Jesu’n, “’Natahsanle, Pathen loupina namu ding ahi’ kati hilou ham?” atile song chu atangdoh taove. Hichun, Jesu Pathen koma ataovin. Atao chai phat in, Going tah in asamin,

“Lazarus, hungdoh in” tin akoutai.

Hichun, mithipa,Lazarus chu, akitomna pon ho pumin, lam ahinjot in ahungdoh tai. Jesu’n, “apon ho chu lhap peh un, inlama puitaovin” atin apuitaove. Hichu, mijousen adatmouvin, Jesu chu Pathen Chapa ahi atahsan taove. (John 11:1-45)