Friday, 26 July 2013

PENTHAH HINKHO MANDAN KIHILNA -1na

THU-MAKAI :Christian tamtah in, kum tampi Christian ahinungin jong ‘PENTHAH’ ahiloule ‘LHAGAOVA PEN’ kiti ahechenpoi. Hiche, ‘PENTHAH HINKHO MANDAN KIHILNA -1na’ hi Christian hisaho hihen Christian hilouhon jong iti Penthah hinkho man dingham ti kihilna dia kigong ahi.
Pakaiyin, kahinkho akheldoh’a, kum phabeppi, eihinpuina sunga hinkho manna’a kamudoh le, nitina Amathu kasimna hoa kona, asimjouse phatchomna dia, tao-to thoa kahin-gontoh ahi. Nangin jong tao-to thon’ simin, chutile Pathen in phatthei naboh ding ahi.
Mi tamtah in ‘PENTHAH’ ‘LHAGAOVA PEN’  kiti hi ipiham jong ahechenpoi. Min aseimanin, miseiseichu abolin, akilhanin, apenthah le thahlou jong akihetchet dehpoi. Mihilpa’n “Na pengthah tai” atipeh-le pengthah ahi akihet nai.

Apengthah hinkho chu nichomkhat amangji’n, akipah in, houin akaiyin, atao jong atuiyin, Bible asimin, apha chu ahunghi jinai. Hinla, phat ahung che-chen, hahsatni, lhepna le insung hahsatna le natohna munchomchoma lhat jalin akipana amang cheh cheh in ahile ama akigingmojitai. Hitia, ahung hatmo teng chule,  akigingmo’n, “Ole, keihi kakilhan vanga adih loulai kahi jong ham O? Thuseipa hin ‘na pengthah tai’ eiti vanga hi atahtah kachanlou ahijeng dem? Miho kabang joupoi, keichan hi alhinglou ham O? Ole, keihi hitidinga hi gonmong jong kahiham?” tin lungnommotah in hinkho amangji.
Hiche hohi ‘Penthah’ hi ipi ahi hetchet-loujeh ahi. Hiche hetthemna ding le penthah jouva kipuihoina dinga hiche lekhabu hi kigong ahi. Taopuma kigong ahi’n, nangin jong tao-tothon simin. Pathen in phatthei naboh ding ka-taona ahi. Pathen in panpi jingtan.

( aban um ding)

No comments:

Post a Comment