Tuesday, 23 July 2013

PATHEN A KON THA HATNA THUMIN

Hou ina lamkaihon chonphatna, thilpha bolna ding thu ahasei behseh un, mi tamtah hou in kai le thungai nomlouvin aumlouve. Crusade, Camp, kisuhhalna  i-bol’u jongle, hichelam hi ahaseiyun, houina le houbung lah a hung maimai tamtah hon, alunggel’un, “ O, hiche hi hija hi. Lamkai hohin, tolom penante tia Pathen thu eihilu ahi’ tin Pathen thu chu ngailouvin, alunggel’u achombeh asohjin, Pathen ngailutna Jesu Christa’a hung kiphongdoh tahsa le lhagao chonset thaneina noiya kona Huhhingna, tonsot-geiya Pathen-to chenkhomtheina thu hi ahedoh theiji tapouve.
Pakai Jesu athia athodohkit jouva, seijuite koma asei chu “Lhagao Theng chu nanghoa ahung um tengle THA HATNA  nanei diu ahi” (Solchah 1:8) tia asei hi gelding, hetding ahi.
Lhagao Theng in eiumpi tengule THA HATNA  chu ineidiu, mipha ihidiu, thilpha boltheina le chonphatna chu ineidiu ahi. Hiche teng chule, tahsanmi chu achamlouva kikhelding, hinkhotheng aman ding, tohphat anei jeng ding ahi. Ama hitalouva, abolsahpa vanga chu aboldoh ding ahi. Tolom chu apeh jeng ding. Pethei dia phatthei abohding ahitai. Loupina Pakai changtahen.
Ahile, koi tobang ham LHAGAO THENG  kipe chu? Jesu Christa chu tahsan’a Leng le Huhhingpu’a kisan jouse Pathen in Lhagao Theng apeh ahi.
Christian jouse, baptize chang jouse hi Leng le Huhhingpu’a  Jesu kisan hijeng lou ham? Ken kaseichen theipoi! Pathen in ahenai. Amavang, Jesu Christa kisan jousen anei ding Lhagao Theng chu aneitah-le THA HATNA chu aneicheh diu dol ahi. Achuti loule, phatea ha-kibol kit ipi se am? THA HATNA chu anei le aneilou mi chun akihet jeng ding dol ahi. Kanunchan phatlou hon eithunun jing laisea THA HATNA kanei loulai ahi. Thilpha kabol theilou, tolom kapehtheilou laisea THA HATNA chu kaneiloulai ahi. Ajehchu, Thilpha boldia Jesu Christa hin chonset thaneina, thilpha boltheilouna akona eilhatdoh’u ahi (Ephesians 2:10). Nangma thagum a na um sungse chu, langkhat in naloiteitei ding ahi. Chomkhat phat choichoi,hahsatn dom nikhoa lhalhop kit kiti aumlaisea THA HATNA chu umloulai ahi kihet in,nachunga chu chonset in tha-hatna aneinahlai ahi.
Hichu nakihetchet ngai ahi, Nakihetchet tengle, Jesu kou loiyin, bohkhup in taovin,
“Pakai Jesu, michonse kahi. Na mi huhhingna chu kachan hitam katile chonset in kachunga vai ahom nalaiye. Chonset hin damuna eipui teiding ahitai. Nei huhhing loiyin. Ka dinga cross chunga nathohna chu keidingin moh hisah hih in. Ka Leng le Huhhingpu nahi. Nacha kahi. Nei huhhingna chu nei musah in. Lhagao Theng in ka sunga chengin. Chonset keiya umjouse hi nei suhthengpeh in, nathu’n nei nunsah in. Hinkhothah chu neimansah in. Lhagao Theng neiteppeh’u chu neipen. THA HATNA chu neipen, na lungdei hinkho neimansah in, tia ka Pkai Jesu namina katao ahi, Amen.”
Hitia chu nataole, ‘Amen’ jih in. Pathen in panpi jingtan.

No comments:

Post a Comment