CROSS HI JESU CHRISTA GALJO MELCHIHNA AHI

India gama hin Christian hi 3% (jakhat a 3) bou ahi. Hinla, khopi jousea Cross akitah cheh’e. Cross hi i-Pakaiyu Jesu Christa galjo melchihna ahi. India gama jong Jesu’n chonset-gal ajouvin, ajopeh ding, alenggam machal jing ding ahi. Loupina Pakai chang jing tahen.

India ahin, Bristish khanga pat in, michonsepen akhailihnau hi ‘Phasi’ ahi. Rome Solkal in vannnoiya vai ahop laiya chu ‘Cross’ chu ‘Indiate Phasi’ banga michonsepen kikhailihna, melse-tah, koima munomlou anahi.

Michonse kithana jouse tah thang ding hile, India sunga hi ‘Phasi’ kitah thang ding ahi. Hinla, Cross joh tah dimset ahi – dammlou kijendamna mun Hospital le lou kijohna jousea Cross lim tah ahi.

Ajehchu, Vannoi huhhingpu Jesu Christa chu Cross a khetbeh ahija, atahsan jouse chonset akona Pathen ngaidamna achan phat’a, Cross chu ‘Damna, tahsa le lhagaova damlouho damna’ melchihna umdoh a, tahsa damlou kijenna mun Hospital le damtheina-damdoi(Lou) kikoina jousea jong hiche ‘Damna’ melchihna ‘Cross’ hi hung kimanga vannoi pumpin ahinmanlo ahitai. Loupina Pakai chang jing tahen.

Hijehchun, ‘Cross’ hi namuteng geldoh ji’n ‘Jesu Christa thohna le Chonset najopeh thu hi’ –

Jesu thohna jal in ngaidamin i-umtauve (Isaiah 53:4-5).

Jesu kijepna maha hon eidamsah tauve (Isaiah 53:4-5).

Jesu thi-jal’in Ama a Pathen hinna (Lhagao hinna) i-changtauve (Hebrews 2:9).

Jesu’n lungnengtah in, i-gentheinau athoh tu’ntu’n’e, hichu eihon Ama’a Pathen chamkimna  um chu i-chankhompi theina diu ahi (2 Corinthians 8:9).

Jesu’n paidoh a i-umnau athoh tu’n tu’n’e, hichu Pa’n ei pomtheina diu ahi. (Ephesians 1:5-6).

Jesu chu sapset in ana um’e, hichu eihon Pathen phattheibohna i-chantheina diu ahi (Galatians 3:13).

{ HETDING ::::: ‘CROSS’ hi Mol ni (2) kikoikal, khat in chung le noi (Van le lei) akoh in; Mol nina hin Solam le Lhumlam akoh e – hiteni avetsah chu -  “Jesu Christ lhatdamna natoh hin Vana um Pathen le mihem kikah a chamna asemin, Eden’a insung kikhen tahsa chu ajopmat kit’e ; chule, vannoi jouse – Sah le Lhang, Solam le Lhumlama um mihem jouse chonset thaneina’a kona ahuhhing’a Pathen chate ahisah cheh thei ahi” ti hetna ahi.}

Hiche, tonsot’adia Lhagao-hinna, chonset jeh a tonsot’a thidinga umna’a kona huhdohna/huhhingna chu nachantah-le Pathen thangvah in, Jesu Christa chonset galjona chu nitina nachan jingna din, Lhagao Theng thahatna chu nitinin thumin.

Nachanloulai-le, tutah jong hin taovin, thum lechun nachan jengthei ding ahi.

Hichu, change nakipah-le Pathen vahchoina’n ‘Amen’ jihin. Nachan loulaiya natao jongle ‘Amen’ jih in. Pathen in phatthei napanpi jing tahen.