Pathen thu nittheina

Golte, Pathen in phatthei nabo henlang, Ama ngailua, Angailut chang jing din napanpi jing jeng henuo. I-Pakaiyu Jesu Christa chun,

“Koihile Ka thupeh chinga, nit chan chu, ama chu ei ngailua ahi. Eingailua chu ka Pan angailut ahin, chule, keiman jong ama ka ngailut a, akoma kaki lah ding ahi.”(John 14:21) tin aseiye.

Keima hetdolin vang, Aman eiteppeh’u Ama Lhagao Theng panpina louvin, Jesu Christa thupeh hi koiman anit joupoi. Hijechun, “Thumun, kipeding nahiuve,holun, namu dingu ahi, keuvun, kihonpeh ding nahiuve. Nang ho miphalouvinbon nachateu thilpha pehje nahet’ule, Vanna um napauvin, athumte chu iti apha chu apeh louding ham?”(Matthew 7:7-11)ati ahi.

Mihem jouse hi hatmo ihicheh’uve. Ahatpen, achingpen, athempen in jong akithopi ding angaichai. Pathen thudol deh in vang, Pathen Lhagao Theng kithopi louvin koiman Pathen aneitheipon, Athu jong nitthei ahipoi. Hijeh achu, Pathen koma thumdia, i-Pakaiyu Jesu Christan asei, ‘thilpha’ ati chu, eiteppeh’u Lhagao Theng chu ahi. Hichu, kithopi phapen ahin, Lhagao Theng kithopina i-chan tengule, thiljouse sempa  Pathen kithopina chu i-chan diu ahi. Chuteng i-ngaichat jouseu eipeh diu ahitai. Loupina Pakai chang jing tahen.

Hiche, kithopi phapen , Lhagao Theng chu na thumna in ‘Amen’ jih in. Pathen in Jesu Christa minin, Lhagao Theng dimset in nakoi jing tahen.