Ngaidamin,lungnopna neiyin

Golte, Pathen in phatthei naboh henlang kipana lhingset, lungnopna nape henuo.

Kipa kanomin, hinla, kipalouna ding katoh jingji. ‘Mikhattouvin ei oimon, ije eitilou, pha kasha ho pha salou, neocha kasuhkhel eimugeu. Eijotho, kiletsah, ki hoisah, kihatsah, sum eithum, eisol jotjot’ hiti ho chu adimset in. Kagelin, kalung ahang chehcheh in, lethuh ding, bolchah ding, housan ding, milah a suhjum ding’ ti ho kagelin, bol jong kagoji.

Hitiho chu kagel gel le, ka lunggel asecheh cheh in, toltha chanleu ka pha deh jengtai! Christian kihija, toltha Pathen in adeilou kihe ngala! A khonnan, kakitim ham hamin “Kei ahatlou penin mitha kagot chu, kei tobang min chute gelle mihem ijat athat diuvem?” tin kageltai! Kipana chu seiphah him him ahitapoi.

Akhonna khet in, Pakai Jesu thusei kahin geldoh tai : “Min nachunga suhkhel aneile,ngaidam in, na ngaidamle, nangma chonset jong Vanna um na Pauvin angaidam ding ahi. Mi suhkhel na ngaidam louvule Vanna um na Pauvin jong na ngaidam loudiu ahi.” (Matthew 6:14-15)

Achainan, “gel gel da tange, donda mai tange. Anople, Pathen in eingaidam sah tante, Amanbon keima hibang michonse, Ama lungdei boltheilouhel eingaidamle, kei ipi kahija miho suhkhel ka ngaidammo ham?” tia kahin-gellhuh chun, he kate! Ka lung ahung ol dom domin, ni phabep jouvin koima vetdana jong kaneitapoi. Ka mujouse chu gahhou kanomin, gari chunga konin jong loi le gol, mel-het ho kamuteng kakha kagahsujin, amahon jong ahin chute bolun, mel-het, loi le gol kahin hao dom dom jeng tai! Aloupina lom lom in ahi.

O! Pakaiyin, kaconset angaidam ahitai. Iti nop tam! Pakaiya kakipana asang cheh cheh in, kipa louna chu katoh behseh tapoi. Kol khat, ijong hilou khat in, a dukana chair kagah kaile, eihin hohsaalin, pho ding katile, kalungsunga noplouna ahung um paiyin, kanuisatle, ama jong ahung nuiyin, phatechan kakihou lhon lotai!

Golte, michunga kalunghan chu, miho chunla pohnat in jong aneipouve. Keivang kakipana jouse beiya, kalung hangcheh cheh jeng, pohgih nasatah kachunga um ahitai! Ka ngaidamtah in, avangphapen chu kei kahi kamutai. Michunga kalung hanle avangse kei, mi ka ngaidamle ‘avangpha kei’ kahi Pakaiyin eimusahtai! O, Pathen ngaidamna hi Lhagao lam thu bouham kanatile ‘ahipoi’! Tahsa hinkhoa jong ahi! Tahsa a jong hi ‘Lhagao’ cheng ahi. Pathen ngaidamna, Jesu Christa a hinna hi tahsa hinkho nopna jong ahin, Lhagao nopna jong ahi! Tonsot a Pakaito chenkhomna ding jong ahi. Tonsot hi tua hi kisimpan ahi! Thinung thu keu ahipoi.

Hijehchun, Jesu’n aseibang hin ‘mi ngaidamin, avangpha nahi ding ahi. Napohnat a, mihon nabolsetnau nagela napohnat chana nang bou achunggih nahi’. Pathen in bon eingaidamuva, eihon miho suhkhel jong ingaidam theilouvule, Pathen in itiba ei ngaidam diu ham?

Pathen in mi angaidam tengle lungnopna, kipana kinei ahi. Hinla, leiset kipana mai hilouva kipanakim, van kipana chu ‘Jesu Christa tahsanlou chonset’ hi ‘itahsantenguva eingaidam tengule’ kinei ahi. Jesu Christa chu Lang le Huhhingpua ikisan tengule, Pathen in, ichonset jouseu angaidama ‘Acha’ ‘Pathen cha’ dia ei kipomuva, chutengle, Lhagao Theng chu eipeh’uva, hiche Lhagao Theng isunguva cheng chu phatthei aboh jinga, eiho phattheina lhingset chang ihijiu ahi. Hiche chu channa din, Jesu Christa chu kouvin. Na kisantahle, Lhagao Theng chu napeh din taovinlang, phattheina lhingset chu thumin, Jesu minin.

Nataole ‘Amen’ jih in. Pathen in umpi jingtan.