CHONSET IN PATHEN LE MIHEM AKHEN

Pathen in mihem hi achenkhompi, akivoppi dia anasem ahin, angailut dehst ahi. Thiljouse asemjou phat in, akhuttah in mihem, ama limlo in asemtai. Hitia, mihem asemteni- Adam le Eve – chu honsung khat, Eden hon kiti sunga chun akoiyin, phatthei aboh in “hingpan, pungun “ ati. Chule, athilsem jouse chunga thuneina le vaihomna jong apen, honsunga thingga jouse, chujongle, ganhing jouse, sa le nga, ju le va jouse jong anna aneh lhon din aseipeh tai. A ngailut jeh in, mihem chu chamlhatna le deilhentheina jong apehthai - Anop le Pathen thua chonthei, anoploule Pathen deihilouva amadeijoh’a jong chonthei ahi. Hiche chamlhatna chun dankhat aumin, hichu - honsunga thingga le louhing namkim, juleva jouse,sa le nga jouse chu anehthei lhondinga peh ahi lhone. Hinla, ‘se le pha hetna’ thingga vang chu anehthei lhon loudinga Pathen in anateppeh ahi. Hiche ‘se le pha hetna’ thingga vang chu aneh lhonle thijeng din Pathen in aseipeh tai(Genesis 2:16-17).

Adam le Eve chun ‘chamlhatna’ kipe chu ana mangkhel lhontai. Pathenin “Neh louding” atichu anelhontai. Hitia, Pathen thupeh apalkeh lhonna chu ‘chonset’ kiti ahin, hichu Pathento kikhenna ahitai. Chonset abol lhon jeh in Pathen in anodoh in, tonsot’a din Pathento akikhen lhontai(Genesis 3:22-24). Hichea kona chu, mihem khat Adam chonset jeh achu mi jouse hi michonse ahichehtai tia Bible in Romans 5:12 na achu asei ahi. Pathen thu’n aseibe kit in ”Mijouse hi chonse ahitan,Pathen loupina chu changlel ahitauve” ati ahi (Romans 3:23). Chujongle, hiche chonset chun tonsot adia Pathen to kikhenna, thina asodoh ahitai(Romans 6:23).