JESU’A HINNA KISANIN:

THUMAKAI:

Pathen in na ngailui. Na kipa le lunglhai ding adeiye. Kipana le nopnakim napenome. Hinla,nasumo aumjin, napetheipoi.

Ipi ham nasumo achu? I-atile, Pathen in adei chu napeh theilou ham? Ajeh nahet em?

Nasumo, na nanga uma ahi! Hiche nasumoa panga chu hattah ahin, nangma thahatna-a najothei ahipoi. Panpi nangaichai. Panpina chu, nasumopa sanga hatjo ahiloule ajolou ding ahi! Hatchungnung thaneina ngaichat ahi.

Houina ka thuseina-a “Ka thusei hi min angainom sangin, lunghangleu katijoi” katile, hichu Hou lamkai khat hin adatmon, “ipidia hitia chu ati ahidem ti kagelgel jeng e!” ati. Kaseilona chu – mihem hohi asumo uma, hichun along jeng jong asuhmoh(ngong)jia, lungmonna phalou apeh-a, hiche lungmonna dihlou chun, a lhagao le ahinkhankho phatna dinglam gelna ding jong asuhmo ji ahi. Hiche lungmoh chu suhking, suhkhang ngai ahi. Akinle khangdoh thei ahi. Akhahdoh tengle lunggel chu hung kihonga thudih le apha chu ahin holthei ahi. Lung kinsahna phapen chu suhlunghan hi ahi. Lungahsah a, alunghanna Chula amadia ima ase hidehlou ngai ahi. Ama dia setna dola vang akisuhlunghan khahle, phamo cheh ahi. Thudih, Pathenthua chou lunghan ding aphapen ahi. Ajehchu, Bible’a kimu bangin “Pathen thu jousehi Pathen in hu alhakhumsa le kihilna, kiphona, kisuhdihna phatah ahi, chule chonphatna lama Pathenmi chu napha chengse tongthei ahitheina dia kichuhthemna dia phatah ahi.” (2Timothy 3:16-17); “Pathen thu hi hingjing le natonghatjing ahi.

Mihem koima aphamonom aumpoi Mijouse hin phat anom cheh in. Minphat, mi seiphat, mi pachat le miho dei le ngailut hiding anom cheh e. Thil umdan le ahinkhoa atole achan ho jeh a min phatmo abol ahibouve.

Judon, jukham, loune, le adang hokhu moh oimo hih in! Thanoma abolsung koiman amudoh jipoi. Mi mua aboltengle, ama deiya bol ahitapoi, ‘abola uma’ ahitai.

Abola uma ahi!

Abolsahpa chun athua anunsah a, ada achamlouva, jasan-javom dontheitalouva, abolji ahi. Phatechan helechun, nalungset a, napan hu nom ding ahi.

Pakaiyin kahinkhankhon eimusah in, eihetchetsah in; Aseitheiyin eikoitai.Hiche jeh ahi, kakilop hilouva, Pakaiyin eingailut jaluva, hitiho, Agiloupa thaneina akona eihuhdoh nom thu’u hi seidinga eideina jala sei kahi. Mohsei kahipoi.

 Mihem hohi ‘abola uma’ ahiuve!

Abola um ahi!

Abola chu ajolou ahi!

Lungset umtah ahi!

Panpi ngaicha ahi!

PATHEN MI KHOTONA

Chunga kisei, agiloupa thaneina jouse a kona hi Pathenin koitobang hijongle ahuhdoh thei ahi. Judon-loune, tolthat, mijong, phatlouna tinchenga kona jong Pakaiyin, michu ahuhdoh thei ahi. Aumlouva kona thiljouse umsahpa chun aphamo pen jong aphapen asothei ahi. Na nunchan phalou (bad habit) jouse jong napaisah thei ahi. Athikon jong ahuhdoh thei. Min thadinga nagot pet jong, nat jeh a nathi kon jong nahuhdoh thei ahi. Tulaiya nat gimneipen itiu ‘AIDS, Cancer’ le adanga kona jong ahuhdohthei ahi.

A Umlou umsahpa chun aumlou aumsahthei banga aumjouse jong abeisah thei ahi.

Natahsan em?

Na tahsanle, Pathen thangvahnan ‘Amen’ jih in. Chule, aban nitin in sim peh in. Pakaiyin phatthei naboh hen.