Pathen phatthei bohna chandan

Golte, Pathen in phattheina lhingset in nabohhenlang, nangaichatpen, KITHOPI HATPEN Ama LHAGAOTHENG chu napetahen. Phattheibohna chandan Jesu’n asei chu – 
“Hinla, Ama lenggam le Ama chonphatna hol masa’vin, chutengle, hiche thil ho chengsejong hi kipe ding nahiuve.” (Matthew 6:33)
Masang chun “Ama lenggam” “Pathen Lenggam” chu hoilai monga muding ham kanati. Chule, hiche chu thinunga Van-gam’ thu kisei kana hisah e. Tunvang, “Ama Lenggam’ ati chu ‘Ama, Jesu Christa’ ahi kahetai. Jesu Christa achu Pathen uma ahin, Jesu Christa achu Pathen in vai ahop, Pathen lungdei umna le kitohdohna chu Jesu Christa ahi. Leiset a, vahmangsa miho holdoh in ahinsolin, Jesu chu ahungin, amangsate holdohna din Cross chunga ahung thitai. Pathen, alunglhaibehseh in, tonsot a vaihomdin akaithouvin, Ama tahsan jouse thoukit din Lampi ahonsah in (Jesu chu tonsot hinna, Pa heng jotna LAMPI ahitai), Leiya le Vanna thuneina jouse apetai. Jesu chu Ama tahsan jouse sunga Lhagao Theng in achengin, Jesu chenna jouse chu ‘Pathen chenna - Pathen Lenggam’ ahitai. Hitia chu, Jesu Christa chu tahsana belding, Jesu Christa Lhagao Thenga achenna hiding chu aseina ahi.
Chule, “Ama chonphatna” kiti chu “Pathen chonphatna” tina ahin. Hiche hi mihem in ‘chonphatna’ iti hou ‘thilpha bol, ahoi hoiya le apha pha a um’ hohi ahipoi. Pathen in ‘chonphatna’ a agel chu ‘Ahinsol Jesu Christa tahsana, Leng le Huhhingpua kisan’ bou hi ahi. Mihem in iti ‘phatna neihen, thilpha bol jongle’ Jesu Christa aneiloule ‘Pathen chonphatna’ hilou ahi. Ahimongin jong, Mose Dan , Thusompeh jong chu mihem koima anitsohthei aumpoi. Jesu Christa bou chun Pathen thupeh anitsoh’a, ahinna ato ahi. Hijeh achu, ‘Pathen chonphatna’ chu ‘Jesu Christa abou uma ahi. Jesu Christa neijousen, Jesu Christa Lhagao Theng aneiya, hiche Lhagao Theng bouchun ‘Pathen chonphatna’ chu ei musah’u ahi. Chutengle, Lhagao Thenga phatthei bohna tincheng ;e ‘Pathen chonphatna’ le ‘mihem mudinga chonphatna, thilpha bol theina jong chu, Lhagao Theng chun eipanpiuva, eimusah’u, eijosah’ jiu bou ahi.
Pathen phattheibohna lhingset nachanna din, tuhin, Jesu chu kouvin, na Leng le Huhhingpu hung hidin kouvin, nachonsetna phongin lang ngaidam thumin, chule Ama ‘Leng le Huhhingpu dia nakisan thu lhut in lang, chule, Lhagao Theng chu ahinsola, napanpi,lamhil le Pathen lungdei hinkho namansah din ngeh in.
Jesu Christa a hinna chu nanei ahitahle, eiteppeh’u Lhagao Theng chu thumin, na panpi jinga, Pathen Cha hi’na a phattheina lhingset na neitheina din thumin.
Nataole ‘Amen’ jih in. Pathen in Lhagao Theng in na umpi jing tahen.