BIBLE THUTAH IN SATAN THANEINA AKON IN EI LHADOH UVE

“Nang hon kasei najom jingule ka seijui tahbeh nahiuvin, chuteng Atah chu nahet uva, Atah chun na jalensah diu ahi”. (John 8: 31b-32)

“Pakai soh naatong chun doubol angai ahipon, chusanga mi jouse khoto them, mi hilthem, lung dehat hiya, lung nemtah a adouho chu apui jang joh ding ahi. Ijem itile Pathen in amaho chu thutah ahin hetdohna dinga lungheina phat apeh theiya, Diabol in amat’a alungdei lamtah a ahinga ahennau thangkola kona hung toldoh thei diu ahi”. ( 2 Thimothy 2:24-26)

KIGINMONA HI LHEPNA LENPEN KHAT AHI

Pathen thusei khat ahungin, HOUIN’ a thu asei chu lamkai ho geiyin lung lhahnan aneitauve. “ Hichepa hin thu aseijomle, Huhhingna changlou dia  eiseidoh diu ahi” atiuvin, phat apekittapouve.

Sopite, Jesu Christa hi Pakai le Huhhingpu dia kisansa nahitah-diu kakinem’e. Nahi loulaile tuhin kilhanin sang jengin.

Pathen thu Bible in aseibanga, nakilhana, nakisanjouva jong kiginmona nanei nahlai jeng em?

PATHEN LHAGAO THENG CHENNA NAHI KIHET JINGIN

Solchah Paul in aseiye “Masanga chu nasuh khel nau le nachonset nauva thisa nahiuve;hiche laiya chu hiche vannoi leiset khang umchan dungjuiya nachon'uva, vanlai jol'a thunei vaipo ho nung juiya, tulai Pathen ngaisah loute lah a natong lhagao thusah a chon'a nahiuve.

Phat khat laiya Juda mi keiho jong hitobang chu kahiuvin, katahsapheu ngaichat lam jenga chon, tahsaphe lunggul le lungtup a chon kahiuvin, midang banga keiho jong lunghanna chate kanahiuve.

Ahinla Pathen hepina bulhingset, ami-ngailut ning lhingsel'in eingailuvin,

THOHHAT LE TAONA

Sopite, Pakai hungkit kahsen thoh hat’uvin. Ven, loubol min ga pha manlu tah asodohna dingin leiset chun twilha masa le lha nukhah chu thoh hattah-in angah ngah jeng jie. Nangho jong thoh hat jingun; Pakai hungkitna ding anai tah jeh hin, nalungthimu phutdet’uvin. (Jacob 5:7-8) 9Sopite, nathuu kitan louna din khat le khat kiphun hih-un, ven Thutanpa chu kotphunga adingtai. (Jacob 5:9)

Pakai Anjon

(Lk. 22:14-20; I Cor. 10:16-17)

          Pakai ngah jing mite dinga lhagao anpha pen chu Pakai Anjon hi ahi. Ajehchu akineh chan’in Ama hung kit ding inga nauva ilhahsamna hou a kon hatthah kitna eipeuve. Pakai Anjon hi ineh-uva idon tengu Ama hetjingna dia kibol ahi ti gelkhoh pen ding ahi. Ajehchu Pakaiyin, “... keima neihet jingna diuvin ...,” (Lk. 22:20) ati. Het jing ding chu thildang ahipon ‘Cross’ kiseina ahi tin Robin Boyd chun anaseiye. Ibol’a Cross chu het jing ngaiya ham ? Cross het jing angaina chu Pakai thohna le athina melchihna ahijeh ahi. Isaac Watts in ala bol’a chun - “Cross kidang tah chu kavet leh Loupi Leng Chapa thi kamui” (When I survey the wondrous Cross, on which the Prince of Glory died) tin aseiye.

PAKAIYA KINGAITEN NAPHA TOHNOMNA ANEIJUVE

(Isa. 61:1-4; Lk. 4:16-21)

          Napha toh lunggot (Goodwill) hi mihemte lungsunga achen ding hi Pathen dei ahi. Jesu hi vannoi chonset jeh-a thi ding keoseh-a Pan ahin sol ahipon, leiset’a mihem khat banga hinkho aman sunga napha toh lunggot neiya mite lah’a na atohding chu ahung kisollona ahi.

          Tulai vannoi leiset’a mihemte kisahlelna pen hi “Napha toh lunggot” (Goodwill Mission) hi ahi. April 2015 a Nepal gam’a Ling nasatah kiho jeh-in mihem sang tamtah hinkho alem’in, athi amang hetdoh theilou khop in aum’e. Nei le gou In le Lou tampi amangthah atam’e. Agam agam’in panpina aneiyui. Gam khat in genthei hahsat ato teng panna thei lam cheh-a kithopina neiding hi tulaiya thilpha, napha tohna lam’a vannoi kitetna khat ahitai. Hiche tobang lunggel neiya natohna jouse hi “Goodwill Mission” ahi. Hitobang dinmun’a hin tahsa lam’a kiloikhomna hihen, Houthu lam hijongle chule mimal hijongle koima pan lanom lou aumpoi. Hitobang natohna-a kon hin thilpha tamtah asohdoh-e.

PAKAIYA KINGAITEN HINDOL KHOH TAH INEIYUI

(Rom. 8:12; Gen. 1:28; 2:15)

          Mimasa Adam le Eve thusim hi ivet leh hindan khoh tah anei lhon’e ti imuve. Pathenin Ama lim le melpu-a asem keo hilouvin, itobanga hinkho aman lhon ding ham phatah in aseipeh-e. Chule atoh diu le Athilsem dang ho jouse chunga mopo ahina lhon jong aseipeh-e. Pathen thupeh apalkeh masangse lhonin hindan khoh tah anei lhon bangin hinkho amang lhon’e.

Pakaiya kingaite san ding kipaman

(2 Tim. 4:6-8; I Cor. 9:24-25) Hb. La No. 112

          Hiche Bible chang’a ‘kipaman’ sanding thu kisei hi Bible chang muntam tah-a imuve. Hichea hetding chu, Jesu Christa tahsan jousen tahsan jala lungset man’a huhhingna (tonsot hinna) akisan diu thu hi ahipoi. Hiche ‘tonsot-hinna’ chang ho lah a Pathen lungdeiya natohpha tong hon ‘Huhhingna’ achan chunga jong tohphatman a kipaman asanbe diu kiseeina joh ahi.

‘Huhhingna’ hi koiman akilamdohthei hilou, tahsan jaluva Pathen lungsetna changa Pathen in manbeiya, natoh vang hilouva, eipeh’u (gift) ahibouve. Hichu, Jesu’n lhatdamna kin atohga chu, Ama tahsante Pathen in achan/apeh ahibouve.

Pakaiya kingaite chu thi jongle hing diu ahi

(Jn. 11:25; Rev. 20:4-6)

          Leiset chunga houdan dang dangin jong thinung hinkho (life after death) thu sei jongleu Jesu seibanga kicheh le lhamon um’a seidoh aumpoi. Mihem tamtah-in leiset hinkho-a thina hi ima jouse kichaina in agel’ui. Abangin damlai hinkho-a thilpha bol jeh-a thinung hinkho-a dinmun pha chanthei din aseiyun ngaidan tampi aum’e. Jesun vang koihile Ama tahsan chan chu ‘thi ding’ ahi atipon ‘hing ding’ ahi ati. Ajehchu Jesu hi ‘Hinna’ (life) ahi.

          Kum 280 A.D. phat laiya Rome leng vaipo Decius kitipan Houbung suhmangna dia nasatah-a Christian ho asuh gentheiya, pan alah laiya Kipana Thupha lhangsam Pionius jong hi martyr’a thiho lah-a pang anahi. Pionius hi akitha masanga atahsan seilep dingin gihna ana kipei. Hinla aman thina aging poi. Ajehchu ama tha-a aum’a athi leh hing ding ahi ti akihetchet’e. Atahsan thu seilep louva det tah-a adinna ngaiya adin jing jeh-in achunga suh gentheina chu aval behseh jeng tai. Hiche phat chun akoma ding ho khat chun “Ipijeh-a hibanga thinom nahim ?” (Why are you so determined upon death ?) tia adoh leh Pionius in “Thina thu hilou, hinna thu joh” (Not upon death, upon life) tin adonbut’e. Aman Jesu Christa atahsan jeh-a thi jongle ahin ding akihet’e.