HAOVIN VAI JONG LEUHEN KIPA DING

Ahao le Avai Pathen mitmu in akibange. Hinla, mihem tamtah din akikheta aumtheiji. 
“Sopi lhachomin choi-at’a aum chu kithang-atpi hen. Mihaovin jong suhnem’a aum kithang-atpi hen, ajeh chu hao hi hampa banga pulloi ding ahi. Ijeh-inem itile nisa hamvevua ahung sat teng hampa agop jin, pahcha ho apul’in, apahhoi jong amoljitai; hitobanga chu mihao chu akiheina lam jousea molmangji ahitai.” (Jacob 1:9-11)
Hichea mi lhachom ahiti hi ‘tahsa a gentheu le lhagaova vaicha kisa ho’tina ahi. Pakai Jesu seisa James hin avelseidoh kit ahi. Tahsa a genthei le vai hon belding kiletsahna aneipouvin, Pathen a kingaiyin, abel jiuve. Akinepnau chu Pathen jeng ahijalin, Pathen in apanpin, alhamonji. Christian hija genthei ho dehdeh vang lhagaovin ahatjojiuve. Amaho vang lhasam akihisah un, Pathen abel jingun; hijeh tahchun, Pathen in apanpin ahat jing jouve. Tonsot a Pakai-to chengkhom diu, Van-haosatna anei jingdiu ahi.

THU SEILOU HELA CHRISTA THUPHA PHONJAL

Christa tahsana anungjui jousen Jesu Christa a Huhhingna Thupha hi aphonjal dia Jesu’n asolcheh ahi (Matthew 28:18-20). Hinla, munjousea kamchenga seithei ahipoi. Asei jong hi hahsatah ahi. Nungah-gollhang kingaina thusim banga gahsei bai le mijouse ngainom ahipoi.

Hijongle, ahahsat mana Christa thudol hettohsah a pan, seiphong hi donda thei ahipoi. Anungjui nahile naboltei ngaiya ahi.

Ijemtia, naloi-le-gol, chule midang lah a jong seina phatpha namu maithei ahi. Chule, nasei jong hithei ahi. Hinla, naseipeh hochun angainom louvu le ije jong tilouva nakoi maitheiyu ahi.

Hiche dinmuna chu iti Christa thupha na hetsah ding ham? Lampi aume.

I-Pakaiyu Jesu’n aseiye,  “Keima Vannoi Vah (salvah) kahi. Keima eijuiya chu muthima vah-le louding, Hinna-Vah chu anei joh ding ahi.” ( John 8:12)

Hichea Pakai Jesu sei hi ahitai, kamchenga thua seidoh louva jong Christa a Kipana Thupha phonjal theina chu. Solchah Peter in ahilchet-bena seidoh’ute :

“Nachenkhompi tahsan-loute lah achun chingthei tah in hinkho mangun (Christa nunchan jomuvin). Chutile, thildihlou bola nagelkhah jengu jongle, na nunchan phat’u chu muvintin, Pathen ajabol diu ahi” (1 Peter 2:12).

Adang kaseibe ngaiyin kagelpoi. Hethem tanate.

Hitia, Christa nunchanjom, Christian hinkhotheng le pha chu nun le khana ithodoh theina diuvin, Pakaiyin eiteppeh’u Lhagao Theng panpina chu thum jingute. Nitina Bible simin, tao jing jengute. Chutile, Pathen chate hindingdol tah hinkho chu Aman ei manpi tauvinte.

MIHEM GELA MIPHA HIHO DIA HETDING

1. MIPHA HO DIA HETDING : Pathen a penthahna thusei hon JOB thu hi asei jingun, Job hinkho’a thugil um hi aseidoh jipo’ve. Job hinkho’a Pathen in eiseipeh nom’u chu ‘chonphatna hin mihem Pathen kom alhutjoupoi; Pathen koma chonset ngaidam thum’a, a anga kunteitei ngai ahi’ ti ahi

2.Chonphatna le thilpha bol hi ngaikhohten ahi. Hinla, hichemana chu Van-gam lutding, Pathen kom lhunna, Penthah hi’na ahipoi. Bible sunga mun tamtah a akimuna chung in JOB hinkho ahin, veute.

Amaho seidan hile- Job hi mipha, Pathen ging, thilphabol ahijal a Pathen lungdei amu ahin, Christiante’n jong hin thilpha ibol’ule Pathen kom i-lhun diuvin aseiye.

3. Hinla, JOB lekhabu le ahinkhoa kimu hi –Job chu mi chonpha le Pathen ging, thilse bollou ahin, Pathen chan-geiyin jong mipha ahi ahe’n, phattheina lhingset apen; mihaotah le insung pilhingset nei ahi. Hinla, chonphatna chun Pathen kom alhuttheilou ahi. Aman, hahsatna atophat in achonphatna asongin, hamsetna ato chu Pathen in apatepnan agel’in, Pathen koma akiphin’e.

PATHEN KIBOTPIA MINTHA KILAMDOH

Abraham chun ama kihuhhingna in ajinu Sara chu mi jidin anapen.

Isaac in jong ama ki huhhingna din ajinu Rebecca mi jidin apei.

Jacob in Pathen amu’n akibotpi, “Phatthei neiboh in” tin akibonpin ahi.

Ngolkkaitah ahi. Pathen mua chu, phatechan hou henlang, anneh-tuidon ding aphapha pehenlang; maicham semhenlang, taotao jengle kilomtah’a, Jacob vang O, akibotpi joi!

“Phatthei neiboh tokahse kalha louding nahi” atin akibotpi.

Pakaiyin, “Neilhan” atijongle alhapoi. Akhonnan, amalpi kijopmatna asuhboh peh in, amin akhelpeh tai!

“Tua pat a naming hi Jacob hitalouva, ISRAEL hiding ahitai” ati.

Pathen in akimutopi hohi amin akhelji.

Pakaiyin, min akhelpeh hohi phatthei abohji ahi. Chule, phatthei aboh ho jouse hi amin akhelji ahi.

Nangla, naming kikhel tam?

CHRISTIAN KINEPNA HING JING

“Pakaiya kipah thanom jingun, tikit leuvinge kipah un. Nachonnemu chu mijouse het hihen. Pakai ahungnaiye, i-macha lungkhamna neihihhelun, ahin imalamjousea taona le thumna maangin thangvah tothon nathum jouseu Pathen hetsah un. Chuteng hetna jouse khokhelsoh Pathena kona hungkon chamnan Christa Jesu to nahinkhom nauva nalungthim’u le nalunggel jouseu ahonbit ding ahi.” (Philippi 4:4-7)

PATHEN PHATTHEINAKIM CHANGDIA KIKOU IHIUVE

Pathen lungsatna le thutanna change tua le tonsot geiya dia themmo chang ding hilouva, Jesu Christa jala Pathen phattheibohna kim le huhhingna chang dia kikou ihiu kihet jingin, Huhhingpu Jesu Christa be lute.
“Ajehchu, eiho hi Pathen in lungsat khum dinga ei lhen’u ahipo’n, i-Pakaiyu Jesu Christa jal’a huhhing chang ding joh’a eikouvu ahibouve. Eiho hah jing’u hen-ihmu jong leu hen Amato ihinkhom jingna diuva Ama eiho khel’a thia ahitai. Nang ho’n nabol ngai banguvin khat le khat hiti hin kiti’lkhou to’uvin.” (1Thessalonica 5:9-11)
Hijehchun, Christa lhatdamna chang ihiu kihet jingin, Ama-to hingkhom hijingna din Christa nunchan jou hitin, Pa lungdei hinkho mang jing din ha-kibol ute. Lhagao Theng panpina chan jing nadin, Bible sim jingin, tao jing jengin, huhhingpu Jesu chu kou jingute.

LHAGAO THENG PANPI HOCHU MANLUTAH AHIJIUVE:

TAHSA LAM DOMIN SEI MASAUTE:

Gideon chu milham bangbep ahi. Pathen lhagao achunga aumtah in, melmate khut a konin amite ahuhdoh tai.

Samson chu apena phat Pathen lhagao chenpi ahijalin, ahat lheh jengin ahi. Amelmaten iti thading atup vangun, athat thei pouvin, Samson joh in amaho athatgam jitai.

Hinla, Samson in Pathen deilou ahin abol phat in, Pathen lhagaovin adalhatan, ahatna jouse abeitai. Hichun, numei khat kantim theibep ahitai. Melma ho manchah adongmanu chun akhut akeng akanpeh in, melmate apedoh tai. Amelmaten, gamsa bangin akaiyin, akichep nauvin, amit akaldoh peh un; vetnom umtah bangin mipin aveuvin, anuisat un, akichepna tauve.

Akhonnan, Samson in Pathen deilou abola, Pathen Lhagaovin adalhah ahi akihetdoh tai.

CHRISTA -TO HINKHOM KIPANA AHI

Bible in, “ Vo khangdong, nakhangdon kipapin! Nakhangdon pet’in kipah jingin. Nabolnom nom bol’in, nadei deiyin chonin……………” ati ahi. (Ecclesiastes 11: 9)

Nadeideiya navale, natohthei, hinkho namanthei laiyin, kipah tah in hinkho mangin. Hinla, nabol jousea chun nasempa lungdei ahiho bou hiteidingin kihabolin, tao jingin. Aman aphal chana chun kipah in, lhingset in gelin. Nangma loupina ding hilouvin, napepa Pathen loupina din bolin.

NA THEMCHANNA JESU BELIN

Chonset helouhelpa chu, Ama hinkhoa Pathen dihna ichantheina diuvin eiho khel’in, Pathenin chonse’n asimtai. (2 Corinth 5:21)

Chonse hatmo hijonglechun, atahsante themchanna Christa ahi. Natahsanle, Ama thenna le dihna chu Pathen in napeh ding ahi.

Tun, tahsanin kisanin. Tahsana nakisankal koima mihem in themmo nachanthei ponate.