PHALBI TUI LE KHOL NUNGAH

(From : PUPA THUSEI by LKHengna)

“Phalbi tui le khol nungah hi gep gep ding ahipoi, botho jengding ahi” tia kisei hi ihiuve.

Nungah chu nadei nahnah-le, gemgem hih in. Jachat pailhanlan, hou jengin. Nadei le nangailut thu chu sepeh jengin. Nagel sanga, namitmona donlouva, nasan jengthei jong ahi.

Pathen hi gep gep ding ahipoi. Nailut jengding ahi. Angailutna thu Bible’a kisun ho nahet ahitah nahnah-le, kichat-tijat, jachat le kipatlam bolda jengin.

Vannoiya chonset vaihop jeh’a setna dimset, nang le kei jong Pathen phattheibohna adindola chang joulouva eikoiyu hi nahenai.

Chule, hiche chonset thaneina chu Jesu Christa’n thingpela athasa ahitai. Jona chu change chonset thaneina khonteh ‘thina’ jengin jong henjou louva, lhana kona thoukit a pa jetlama touva, Pa’n lei le vana thuneina jouse apeh ahitai (Matthew 28:18-19) tijong nahetai. Ama tahsan jouse chu tonsot hinna apeh ahi (John 3:16-17), chule, atahsante jouse chu ‘Pathen cha’ ahisah ahi (John 1;12).

Nangjong natahsan ahitah-le, kiginmo le kineplelna nei hih in. Napa koma nakiphatlama chu akiphalamlou nasopiten napa nei-le-gou aneh’uva adon’u chu namu chula em. Nang jong napa koma hin kiphalam hih in, thumin, thum tuntun jengin.

“Hepa, von thah neipen. Vonthah ( Lhagao hinna) beiya iti ka um ding ham? Ka jah achai.  Sangkhol (Huhhingna) le toka ( chonset ngaidamna), chule, Kengchot ( Christa thupha) beiya itimong milah a kalhat ding ham? Neipen, Hepa” tin ngampelin thumin. (Ephesians 6:13-18 simin)

Hitia, nampela thumte chu Pakaiyi, ataonau asangji.

‘MIHEM HI ANGOL LHEH VANGIN PATHENIN ANGAILUT JING AHI

(From PNJCKP-6. by lkh)

Bible in, “Mijouse chonse-ahitahjeh un,Pathen loulpina chu changlel ahitaove”  (Rome 3;23);

chule, “….chonset man chu thina ahitai….” ( Rome 6:23) ati jeng vangin,

Bible maman,

 “Pathen in vannoi angailut behseh jeh in Achapa changkhat chu ahinpetai. Koihile Ama tahsan chan chu mangthah louva Tonsot-Hinna anei johding ahi.” (John 3:16)

Chuphat in,

 “……Pathen in manbeiya apeh vang hi Jesu Christa’a tonsot hinna ahi…”(Rome 6:23b) ati kit’e.

Halleluiyah, Amen!

Loupina Pakai chang jingjeng tahen, Amen.

Pathen mi-ngailut jedan hi O, aloupi e. Ahechen le amuchena kisan jouse kipana hi seijouthei ahipoi,

Pathen ngailutna hiti, koiham, ipiham eikhenthei ding?

Chemjam in  eikhen ding ham? AK 47 in eikhen ding ham?

Neuclear bomb in eikhen thei ding ham?

Natna le thinan eikhen ding ham?

Eikhen ponte! Pathen ngailutna, Huhhingpu Jesu Christa’a hung kiphonga eichansah’uva hito imachan eikhen thei ding ahipoi!

Halleluiyah, Amen.

SATAN IN MIHEM HOHI AKICHEPNA

(From PNJCKP-SL.No. 5. by lkh)

Satan gitlou dan hi, mihem hohi athuthun anunsah in, alungdei abolsah in, hinla, akipah deh poi. Anungjui, alhacha ho chu lungset hen, ngailu-le kilomtah ahi. Hinla, angailu him him poi. Amangcha khopset in, abolgim kit in, natna le gentheina jatchom chom athohsah in ahi.

Chubanin, kipalouna, lunghanna, lungjinna, lungchomna, kiphinnomna le adang ho aneisah in, ahinkho a kipa le nopna tahbeh aneidiu anom him him poi.

Satan in, anungjui jouse dia abolpeh chu – apet-tah a kipana, nopna, lunglhaina; chomkhatjoule kisihna, lunghanna,lungnatna, gimna, thahna, kana le thina ahiji.

Satan in, anungjui hohi nehthei-donthei phalou ‘Ju le khamnathei dang’ hohi aduchatsah in, aneh-adon tengule, nopna le kipana aneiyun, ajonalamle natna,hahsatna, thina gei asohji.

Sum le gouthil hohi adeichatsah in, athua anunsah tahtah ho dehdeh chu, kitimlelna apen, alam le alamlou hijongle chanjengna din lunggul apei. Kitimlel jehchun, athunun miho chun, guhtho, hunama lah, lamdihlouva lah abol’un; chomkhat vang akipah un, nom as among mong jiuve. Hinla, ajonalam chu gentheina, vangsetna, natna, kana le thina asoh jitai.

Pasal le numei jong kideichatna, kiduchatna-tona apen. Athunun miho vang chu kitimlelna gei apen, nidan kekkhat jong lhinglouvin ahinkho lamjot asuhchatvai pehji. Konkhat in jachatna, natna, gentheina, thohna le thinagei atoloji. Avangpha dom konkhat jeng jong, adinga phatah ji aneiding pet chu, kisuhmo jeh in, adeibehsehlou-to hinkho amanlojitai. Pasal tamtah avaichatlon, konkhat aphatmolon, nehlouding –donlouding bolin, aphatlouvin natna le thina atolo jitai. Numei tamtah in hinkho genthei atolon, soh tobang hinkho amanlo jiuve.

Leiset a ahinlaiya hi kipana le nopna themcha cha neisah ding, hiche nopna ho chu ngaichatsah jing ding. Hinla, sottah nopsah, damsah louding; ahinkho akichai tengle, tonsot geiya thohna-gimnamun, Damun meidil’a chenkhompi ding ati ahi.

“….chonset man chu thina ahitai….” ( Rome 6:23)

Lungdong poute, phat nanei nahlaile, akilepoi, abana kisei hi nachana, hahsatna le gentheina, tonsot geiya thina chu napelthei ahinai.( anasim teiyin)

“……Pathen in manbeiya apeh vang hi Jesu Christa’a tonsot hinna ahi…”(Rome 6:23b)

JESU BOU AHI PATHEN KOM EILHUT THEIYUVA

Jesu Christa bou ahi Pathen-to ki jopmatna, LAMPI, THUTAH le HINNA chu( John 14:6). 
Mihem in iti Pathen dei bolding tijongle aboltheipoi, Satan in achonsetsahji ahitai. Hijeh’achu, Satan joupa Jesu Christa hi nei teitei ngaiya ahi.
Hitia chu, tohphat le chonphat vanga Jesu Christa’a Pathen mi Huhhingna’ hi mihem chantheiya ahipoi. Pathen in, ngailutna le khotona jala, ei moh peh u bou ahi. 
‘Ngailutna’ hi um hih-le natoh le chonphatna jong pannabei bou ahi. Iti thilpha bol jongleng Pathen ‘Ngailutna’ hi aumloule, kathilphabol le ka chonphat bol jong apannabei ahi.
Pathen chu ‘Ngailut’ ahi.

GA NEIYA LE KIPAMAN SANNADIN GUNCHU TAH IN PANGIN

             Christian hinkho hi Christa-to hinkhomna, Pathen-to kijopmatna, Jesu Christa hinkho mandan juiding ahi.(1 Corinthians 9:24). ‘Jesu Christa-to-hinkho man’ hi Pathen loupina ahi. Hichu Pathen deipen le eiho dia phapen ahi. Hichu pilhinsahna dia ponthotah le chondanthem tah a hinkho manding ngaiya ahi.

            Nitina hinkho manna’a hi lhagaova khantou jing ngaiya ahi. Hinla, eiho hatna maiyin joupoute. Pathen panpina thum jing ngaiya ahi. Chutile bou, Pathen Cha, Christian hinkho hi imanthem jing diu ahi.

I-Pakaiyu Jesu Christa hin, ga neiding, tohdoh neijing dia eikouvu ahi. Thingbah hon aphungpia kona hinnatui achoplut banguva, Pathen tha-hatna chu i-kilah jing louvule, ga ineiloudiu ahi. Hijeh achu, “keiya um jingun” ati ahi. Jesu Christa-a i-um jingnau chu Athu Bible sim jinga taojing ding, Ama lungdei chu hola, Bible’a kimu athupeh hohi nitding ahi.(John 15:5). Hitia chu Pathen lungdeiya hinkho imanthei diu bou ahi.(1 Corinthians 10:31 simin).

Nitinin Bible sim in, tao jing jengin. Hichu, chonset-gal jona ahin, na hinkho kipah jing ding ahi.

GINMONA HI LHEPNA LENPEN KHAT AHI

Pathen thusei khat ahungin, HOUIN’ a thu asei chu lamkai ho geiyin lung lhahnan aneitauve. “ Hichepa hin thu aseijomle, Huhhingna changlou dia  eiseidoh diu ahi” atiuvin, phat apekittapouve.

Sopite, Jesu Christa hi Pakai le Huhhingpu dia kisansa nahitah-diu kakinem’e. Nahi loulaile tuhin kilhanin sang jengin.

Pathen thu Bible in aseibanga, nakilhana, nakisanjouva jong kiginmona nanei nahlai jeng em?

I-kidoupiu Satan hin, tahsante a lhepna sangpen khat hi ‘kiginmo’ hi ahi. Na kiginmo-le, nangma hatna’a kingam,nangma kisong nahin, Jesu Christa hi kingaina le kisonna’a naneilou tina ahi.

‘Pathen tahsa’ kiti hi ‘Athu Bible a kisei ho tahsan’ tina ahi. Nangma katahsanin, naseiho tahsan hih leng, nang katahsan chu ipia kiphochen ding ham? Nasei katahsan-le nang katahsan kihetna ahi.

CHRISTA TO HINKHO MAN HI KIPANA AHI

Jesu Christa tahsana kisanjou hinkho hi ‘Christa-to hinkhom’ akiti. Hiche ‘Christian hinkho’ hi Athupeh Bible’a kisun ho nit’a, Ama kipuisah jing ding ngaiya ahi. Ipithil bolin, itobang dinmunin dingjongle chun, Ama vaihopna ngajing ding, Ama’a kingai jing ding ngaiya ahi.
            Pathen’a nakingai jingle, lhagaova na khantou jing ding ahi. Lungdon -lungjin bollou ding ahi. I-Pakaiyu Jesu Christa’n, “Na lung’u donsah hih-un. Pathen tahsan’un, Kei jong neitahsan’un” (John 14:1) ati hi bolin. Aman na-umchan jouse ahen, nakhohsah jing’e ti hejingin. Lungdon-lungjin, kichat le olmona neilouvin, Ama’a kingaiyin, khantouna lam mano jingin. Nitinin Bible simin, Tao jing jengin. Chutile, tahsanna in khangtou jingin natin, kipanana, nopna le lolhinna nahin nei cheh cheh ding ahi.

JESUN LHATNA KIN ACHAISA AHITAI, HINLA NAKISAN ANGAIYE

Chonset in mihem jouse hi khat cheh a hi ‘soh banga’ ahena, athua anunsah ahi. Jesu Christa hin, hiche chonset-soh a kona hi eilhatdohnau kin chu achaisa ahitai. Hinla, mimal tin hin eima ding cheh’a kisan ngaiya ahi.  Chule, hiche Jesu tohga chu santheina dia ‘achang thei dingdol chu hithei (lhin) ngaiya ahi’.

Vetsahnan, Solkal in natohna ding mun (post) chu akoitai. Adeh a tribal dinga koitum ahi. Hinla, achang dia lhing nahi ngaiya ahi. Tribal jouse chanthei ahipoi. Busom najoa, najona lekha dihtah nanei ding, tribal nahiding tribal hina hetpina napedingdol hon phatecha lekha asemu chu nanei ngaiya ahi, agamsungmi hi’na lekha naneiding ngaiya ahi. Chubana, hitobangmi tamtah lah a chu lhendoh nahiya, tohmun chu nachannadia themvetna khat ngai kit’a ahi. Hichu, jihthoa le kama kidohna ho ham dihtah a nadonbut thei ngai nalai. Aban kit a, napeding ho deichomthei mi, ama mel-het, party mi, insungmi, ahiloule, seiphat chang nahi ngai nalaiya ahi.

Kaden! Moh mumaimai thei ahipoi. Lhai kitet jong ngai maithei nalaiya ahi.

MIJOUSE HUHHINGNA NGAICHA IHIUVE

1.      Bible’a kisun thuhohi Pathen in asei, ageldan, ahi-sah thu ho ahi. Bible in “Mijouse chonse-a Pathen loupina changlel ahitauve” (Romans 3:23) ati.

Nangin “kachonsepoi” natile ‘mi’ (Mihem) nahilou hinte. Ahiloule, Pathen thusei hin nang nahoptha lou hinte.

Pathen h thiljouse sempa, nang le kei jong eisempau ahi. Natahsa, nahinna, na hinkho, nahinding, nadamding, nathi ding, navom ding nakanding, aboncha Pathen thu thu ahi.

Pathen in mijouse hi achonse-a akoiya, Ama loupina chu achansah tahlou, apehsa alahpeh ahitai.

2.      ‘Pathen loupina’ ati hi ipi ham?

‘Pathen loupina’ chu ‘Hingjing, thitheilou, kikhel ngailou, abang hijingjeng’ hi ahi.

Pathen in mihem asema chu, Ama banga ‘tonsot hinna’ apeh ahi. Hichu, mihem nah homa alhalut ‘hu’ chu ahi. Hinla, mihem in athupeh nit-louva satan thua anun phat a Pathen in, Aloupina chu alahpeh ahitai. Hijeh achu, natna, hahsatna, gentheina, thina gei umdoh kha ahitai.

Mitamtah in, ‘chonse’ ahilam akihetpoi. Adeh in, aneova pat a mipha, ima suselou hohin, “Ipi chonset kabol em? Ipi kachonset kaphon ding, ngaidam kathum ding ham?” tin agelji.

3.      Pathen natahsan em? ‘Mi’ angollou jousen Pathen aum atahsan cheh e. Achutiloule, Pathen lekhabu Bible in “Mingollin alunggela Pathen aumpoi ati” tia asei ahi.

‘Mi’ nahin, ‘Mingol’ nahipoi. Pathen natahsane, Athusei jong tahsan in.

“Mijouse chonse ahitai” atihin, “mijouse huhhingna ngaicha ahi” atina ahin. Hitia atichu, “Mijouse Ka huhhing ding ahi” atina ahikit e. Pathen thusei ngaijouse ‘Huhhingna’ chang ding ahi.

4.      Nang jong Pathen ‘huhhingna’ hi nachan ding ahi, asei hi ngaiyin.

Pakai Ngah Jingin

 “Pakai ngah jingte vang chu athau semthah-in umintin; Muvanlai bangin leng touvun tin, lhai jongleur athau chollou ding; kalsongin vahle jongleu, chollouhel diu ahi.” (Isaiah 40:31)

‘Pakai ngah’ kiti hi, Ama tahsanna, apanpina chanding tahsan le kinema nga tina ahi. Tahsanna beiyin kinepna aumtheipoi. Kinepna beiyin thah-hatna, lungnenna le gunchuna aumtheipoi.

Pathen natahsan-le Aman napanpi ding, phatthei naboh ding kinemin ngah in. Alungdeiyin umin. Bible hi nitinin siminlang, asei hoa chun chonin. Tanglouvin taojing in; Ama a kingai jingjengin.

Ama ngah jingte chu Pakaiyin tha-hatna ape’n, tahsan hatna, lhagaova hatna, tahsa le lunggel hatna jong apejinge.  Alhahsamnauva apanpin, khangtou jing diu ahi.

HINKHOTHENG MANTHEINA JESU BOU AHI

 “Gollhang chun iti hinkhotheng amanthei ding ham?

 Nathu dungjuiya hithei ding ahi.” (Psalms 119:9).

Hichea ‘Gollhang’ kitihi ‘khangthah’ jouse ahopthai. Gollhang banga hatna nein alai, numei hihen pasal hijongle ahoptha ahi. ‘Gollhang’ ati-lonapen hi, mihem lah a jalenpen, anopnop a umthei, atha hatpetlaitah, koima e imacha ngaplel neiloulai, mihem kitithei laipettah chu ‘gollhanlai’ ahijeh a kisei. Hitobang hitheina neijouse hopthana dia kisei ahi.

Pathen thu hin aseinompen chu,mihem lah a tohkhel, bolkhel neibaipen, chule, kitimlelpen, ‘gollhang thahatlaipen’ jong ‘Pathen thu’ hin apuijanga, lamdih le chonphatna, hinkhotheng amansah jengthei ahi” atina ahi.

‘Pathen thu’ hi mijouse semphatna ahi. Mihem jouse hi Pathen mitmua ‘chonse’ ihicheh’uve. Pathen thu hin mijouse asemphatthei ahi. Pathen thu nit jalin, migiloupen jong miphapen asohtheiye. Tahsa le lhagao hinna munathei ahi. Tonsotgeiya hinna, Pathen-to chen khomna, Pathen cha hitheina eipetheiyuva ahi.

Pathen thu, Bible in “Jesu hi ‘Thu’ (Pathen’a um ‘Thu’) ahi” ati.(John 1:1-4).

 Jesu Christa tahsana kisanjouse chu ‘Pathen chate’ ahiuve.(John 1:12) Chule, themchanga ‘tonsot hinna’(huhhingna) chang diu ahi (John 3:16-17).

‘Themchang’ kitihi Pathen in, achonset angaidampeh, Jesu Christa thisanin ‘chonset asopthengpeh’ a themchang a, athenga Pathen in asana hi. Hijeh achun, Jesu Christa hi ‘tahsante themchanna, thenna, huhhing channa’ ahi.

Hinkhotheng mantheina dia ‘Jesu’ nei ngai ahi. Ama panpina jala, hinkho hi kipah le lolhinga manthei bou ahi. Jesu ‘nei’ kiti chu, ‘Leng le Huhhingpua kisan kiseina ahi. Chutengle, Pathen in Lhagao Theng eipeh’uva, hichun eipui jinguva, Pathen lungdeiya hinkho manna ‘hinkhothah’ chu eimansah’uva,  eiho dia jong phapen hinkho chu eimansah jiu ahi.

Pathen Lungdeiyin Taovin, Nasan Teiding ahi

”Hiche hi Pathen koma ikisonnau ahi : Ama lungdei dungjuiya ithumchanu eipeh jiu ahi. Chule ithum chanu eipeh ule, Ama lungdei chu eihoa aum iheuve”.(1 John 5:14-15)

Pa lungdei chu Ama tahsanna, ahinsol Achapa Jesu christa hi Huhhingpu le Pakaiya kisan hi ahi. Hijehchun, nataona jouse asantheina din, nachonset phonginlang, na Huhhing din Jesu kouvin. Hichu, ‘Huhhingpu dia nakisanna ahi. Chule, na hinkho pumpi chu ama khut’a lhandoh in, aman pha asah banga napui jing din kipe doh in; athu nit dingin nanopna phongdoh in. Na chama Pathen thu nanit joulou ding ahinai. Ama khut a na kipehdoh tengle, aman napanpi ding ahi. Hitia kipehdoh chu ‘Pakai dia nakisanna ahi’.

Chutengle, Pathen in Jesu mina Lhagao Theng chu napeh ding, Ama lungdei, Acha tobanga hinkho kipah le lolhinna namansah ding, nataona ho asan ding ahitai.

JESU NAKISANLE CHONSET A KON ONGTHOL DING NAHI

Bible in ‘Chonset’ ati hi nitina suhkhel, thilphaloubol le akigelji hokeuhi ahipoi. ‘Chonset’ in ahopthanai. Hicheho keu hi ‘chonset’ ahile Jesu hungthi ngailou ahi. Mose Dan peh ho nit jousen ‘chonset’ apeldohthei ahi. ‘Bolkhel’ homai ahilou jeh a Jesu panlouva ‘chonset’ peldohthei hilou ahi.

Bible in ‘chonset’ atihi ‘Pathen Deilou bol’ chule, ‘Pathen Dei bollou’ jong chonset ahikit’e.

Mihem masa Adam le Eve chun ‘Pathen Deilou’ anabol lhon chu ‘chonset’ ahitai. ‘Chonset’ chun mijouse ‘thina’ aso ahitai.

Pathen in asemsa mihemte angailut behseh jeh in, ‘chonset’ akona huhhing din Achapa Jesu Christa chu leiset a ahinsolin; Jesu chun ‘chonset’ thaneina chu mihem tahsa aneina achun apon, cross chunga chun athipitai. Athi chun ‘chonset’ thaneina chu athat in, lhana avuiyin, pontom hoto chun ‘chonset’ chu lhana adalhan, Amavang ‘vou loupi’ kivonin, thithei-taloudin athoukittai. Ama athokit banga, Ama tahsanna kisante jouse, ‘vou loupe’ avonpeh a, tonsot a thikittalou dia akaithou ding ahi. Loupina Pakai changing tahen, Amen.

PATHEN CHA NAHI CHU KIHETCHET IN

Bible in aseibanga, taona’a nachonset naphona, ngaidam nakithum nung le Jesu Christa hi na Huhhingpu le Pakai dia nakisan nunga jong lungmonna le linepna lhing naneida jeng em?

 ‘Ole keihi pengthahlou jong kahi ham o?’ tia nakiginmo kom um jeng am?  Aumji. Nang lele nahipoi. Mitamtah chutia umji ahi. Hichu, satan natoh ahi.

Chonset phondoh le ngaidam kithum ding hi, keima le pathen thusei dangho seivanga bol nahipoi. Pathen kamcheng Bible’a kisun dungjuiya kiseiya kibol ahijoi. Bible in

 “Eihon chonsetna kaneipoi, itiuva ahile, eima le eima kilhemlha a ihiu ahi, chule thutah chu ilung sunguva umlou ahi. (1John 1:8)

“Eihon chonsetna iphon vangule ama chu eiho chonsetna chengse  ngaidam ding le chonphat louna jouse siltheng dinga tahsan umtah chule chonphatah ahi. “(1John 1:9) tia ei hilu ahi.

CHONSET HI NACHAMA NANEI AHIPOI NAPEA UMA AHI

Mitamtah hin ‘chonset’ hi ipi ahi ahechenpoi. Chule, ‘Chonset’ hi mihemin achama anei ahipoi. Napea uma ahin; nachama napaithei jong ahipoi. Chonset nabolsahpa sanga hatjo tha-hatna in bou najopehthei ahi.

Mi konkhat in ‘chonset kaneipoi’ atiji. Bible in “Eihon chonsetna kaneipoi, itiuva ahile, eima le eima kilhemlha a ihiu ahi, chule thutah chu ilung sunguva umlou ahi. (1John 1:8)

Bible a ‘phondoh ding’ ati ‘Chonset’ hi nahinkhoa thil nasuhkhel chu kisei ahipoi. Adam (Pasal) le Eve(Numei) in amani chama ‘Pathen deilou chu abolu ahipoi. Abolsah’uva uma ahi. Abolsah’uva chu ‘satan’ ahi tia Bible’a kimu ahi. ‘Pathen deilou bol’ chu ‘chonset’ kitia ahi. ‘Chonset’ chu ‘satan tha-hatna’ ahi. ‘satan tha-hatna’ ‘chonset’ chun, Pathen deilou chu abolsah lhon ahitai. Adam le Eve in asuhkhel lhon jeh achu Edena kona kikaidoh ahilhontai. Eiho jouse jong hi Adam (Pasal) le Eve(Numei) akona peng, chonsetna guiya peng ihi cheh’uve. Numei le pasal ‘chi’ kigoma peng ihi cheh’ve. Hichu ‘tahsa lunggul a kona peng’, chonset-ga ihiuve. Hiche chonsetna chun Pathen-to eikhen’u ahi, hichu Pathen lunghanna eiho chunga umchu ahi. Hiche Pathen lunghanna akona ei lhatdoh thei diuva chu, ‘mihem lunggula kona peng hilouva Pathenna kona, Lhagaova kona peng’ bou chu ahitai.

Jesu Christa chu ‘mihem luggula kona hilou, Pathen, Lhagaothenga kona penga’ ahi. Ama bou chun eilhatdoh theiyu ahitai. Jesu chu Cross chunga ahungthin, ‘satan tha-hatna, chonset’ akonin ei lhatdoh taove. Hichu, nahetthei tah em?

Tua, nang jong ‘chonset, satan tha-hatna’ nanga umchun Pathen deilou ‘chonset’ chu nabolsahji ahi. Hiche, ‘satan tha-hatna, chonset’ chu Jesu Christan ajosa ahitai. Hinla, Jesu’n ajomana nang nachan jeng ahipoi.

Semtila Pathen in Mihem asema chu ‘Robot’ asem ahipoi. ‘Kholbut’ (Robot, Machine) maimai banga, khat in akhoiloh loule chattheilou banga Mihem hi asem ahipoi. Achama chatthei le lunggel neitheiya asem ahijoi. Hiche jeh hin, mihem in ‘deilhenna’ aneiye.

Tua jong, Adam le Eve akona mihem jousea hung kipeson ‘satan tha-hatna, chonset’ chu eiho jouse thisan-gui le hi’na ahi uma ahi. Koima alungthengseh aumpoi. Miphapen nati jong chu alunggela miho hotna, vetdana, kidahna dimset ahi. Achihthei jeh a atah asoloubou ahi. Pathen in vang mijouse lunggel ahet ahi. “Lungsunga um chu kamin aphondoh jia, khut le keng in atohdoh ji ahi”. Hijeh achun, lungsunga ‘chonset’ umjing chun phatkhat-le, ahinntohdoh jingthei ahi jeh achu, lungsunga um ‘chonset, satan tha-hatna’ chu Jesu Christan eijopeh tokahseuva chu ‘hingjing, natongdoh jingthei’ ahi. Mihem in hiche chu ajothei ahipoi. Iti kitim jong lechun, photlot louva, nagellou bangtah a mikhat in nasetna ding ahinbol jengle, nalungsunga um ‘Gulgu, satan tha-hatna, chonset’ umchun na ahintohdoh jingthei ahi.

HINNOPNA DIHTAH

Hinnopna dihtah neiho chu ipi-iti umjongle kipah jing thei ahiuve. Thi le hin chu Pakaiya ahi aheuvin, lungmong tah in aumjiuve. Chule, hitobang miho chu Pathen in angailun, adiuva phapen apejingji. Hiche ‘Hinnopna dihtah’ hi  ‘Christian dihtah’ ho chandia Pathen gon ahi. Christian dihtah chu Jesu Christa ‘huhhingna chang’, ‘Jesus Christ a hinna nei’ ho ahi.

Christian insungmi,Houbungmi le thilpha bol manna Christian dihtah hithei ahopoi. Jesu Christa hi Huhhingpu le Pakai dia kisanna, nei ho chule hinkhompi hobou chu Christa a hinnanei, Lhagaova Pengthah, Huhhingna chang, Christian dihtah ahi.

        Bible aseiye “Nangman nakama ‘Jesu chu Pakai ahi’ tia na phondoh a, chule, nalungthima Ama chu Pathen in mithilah akonin akaithouve, ti natahsanle na sochat ding ahi.” Ati ahi.(Romans 10:9).

        Hiche hohi nabolle Christian dihtah chu nahi -  

1. Pathen natahsana, chule Jesu Christa chu Leng le  huhhingpu ahi ti natahsan ding,   

2. Na chonset ngaidam nathum ding,

 3. Jesu Christa chu nakouva na Leng le Huhhingpu hidia na ngeh ding,

 4. ‘ Jesu Christa chu Pakai ahi’ ti nakama na phondoh ding, chule, Pathenin Ama chu athilah a konin akai thouve’ ti lunggila natahsan ding ahi.

        Nachutibolle, ‘ mi pengthah’ ‘ Christian dihtah’ nahi ahitai. Nabolloulai ahile, tuhin bolin.

        Taovin : “Pakai, chonsea kijil, chonsea peng, chonsea hinkho mang ka hi. Nei huhhing loule, namel mulouva, tonsot a mangthah ding kahitai. Nei huhhing loiyin. Cross chunga kadinga nathohna chu ‘aga’ neipen. Ka chonset sopthengin, ‘Pathen cha’ nei hisah in. ka Huhhingpu le ka Pakai nahi. Ka hinkho apumin nang kapei. Ka sunga chenginlang, ka hinkho hi nadeilamin neipiyin, ka Pakai Jesu naminin,Amen.”

CHRISTA TO HINKHOM HI HINNOPNA AHI

Jesu Christa-to hinkhom hi nomtah ahin, kipa jingna, lungmonna le nunnopna ahi. Hinla, Christian tamtah hin kipahna tah le lunglhaina tahbeh aneitheipoi. Thusei tampi jong hin, “kithi tahbah-le, i-mong akiti akiseitheipoi” tiloi, Houbung lamkai konkhat guhthim houlimna kajah jong aumin, “akiseiji vangin, van-gam chu kilut mongmong inte’ tiding vang, koi hetpeh louvin, akilunggim thouji” tia kajatame. Hitia hi, kicheh-lou hinkho manga atame. Lunggim, kinepjoulouna, monlouna, kichat le hinnomloutah a hinkho mang atam lheh jeng nalaiye.

Ajeh ipiham?

Aminmaiya Christian hon hinnopna aneitheipoi. Bible in aseibanga bollou chun hinkho hi kicheh in amangnom tahtah thei poi.

Abol ahahsapoi. Pathen thu hi natong-hattah ahi. Asei hi boljengin. Kisih ponate. Nabollou-le nakisih ding ahijoi. Nang jong chuti nahile, tuhin, guhthimin Pathen koma taovin. Chonset in nahennahlai ahi chu kihet in. Pathen koma phongdoh in. Koima jahdia phon angaipoi. Guhthima namujing le nalunggel jouse hesoh Pathen koma chun guhthimin phong in. Chule, ngaidam thuminlang, Jesu Christan nadinga athohna –ga chu thumin.

Taovin :

“Pakai, nangin nei musoh in neihechen’e. Ka hinkho hi nahei. Lungmonna tahbeh kanei theipoi. Hitibep hin kahinkho beitale, nakom hunglhung louva umding, damuna tonsot a mahthah bep ding kahi. Ka chonset jeh a ka Pakai Jesu’n cross chunga athohna ga chu neipen. Kachonset neingaidamin.

Tuhin, ka Pakai Jesu chu ka Huhhingpu le ka Pakai din kakouve. Ka lungsunga chenga, kahinkho eichinpeh ding le nalungdeilama eipui din kateme. Pathen cha hitheina chu neipen, nacha kahi, Pakai. Hinkho nomtah a kamantheina ding le nacha deitah kahinadin nei panpin,. Ka Pakai Jesu minin, Amen.”

PATHEN KIMUNA DIN NGOLPUT DOM ANGAIYE

Mitamtah in chingtah le themtah’a, Pathen hola muding atijiuve. Kei jong phat khat achu chute kana hi.

Hinla, Pathen hi chihna le themna, chingtheitah, umchan themtah le hoitah, Coat suit kibola, muding ahipoi. Bible thep le hettam jala muthei ahipoi!

Ngol-kaitah’a, “chonse kahi” ti kihet’a, angola banga, tao tao jeng ding. Bible sima, tao jing jeng ding. Kap pumle mitlhi puma jong, angaile tao tao jeng ding.

Min ngol eisa jongle, amun le amunlou tilouva tao jeng ding, Pathen thu sei jeng ding ahi.

Chule, Jesu Christa hi leng le huhhingpua kisan jouse chu, amin kikhel’a “Pathen Cha”, “Pathen lhenchom” (Christa jala ‘Israel’ that) ahijitai.

Nang jong, loi le gol hihen, koitobang in ngol sajongle chun, amun le amunlou, aphat le aphatlou, akilom le akilomlou lai tilouvin tao jing jengin.

Taovin, Jesu Christa hi kouvin, Leng el Huhhingpu din kitemin, kisan jengin. Chutengle, minthah napeh’a “Pathen cha” nasah ding, nasoding ahi. Hichu, Pathen phattheibohna chamkim nachan patna hiding ahitai. tahsa le lhagaova Pathen phattheina simjoulou nasan ding ahi.

JESU CHRISTA ISANTENGULE HINKHOTHAH CHU ICHAN DIU AHI

 John 3:1-8 sim’ute :

“Tu’n, Pharisee khat amin Nicodemus kiti Judate vaipo ho lah a khat aumin. Jesu koma Janin ahungin ajah a, “Rabbi, Nangma Pathena hungkon Houhil nahi kaheuve, ajeh chu Pathen-to kivoplou hilechun hitobang melchihna hohi bol theiponate,” ati.

Jesun adonbut’in ajah a, “Tahbeh a kaseipeh nahi, koiman Pathen Lenggam amu theipoi,  ‘pengkit’ louvin,” ati.

 “Mi atehsa iti peng thei ding ham?” tia dongin Nicodemus chun, “Anu naobu-sunga avela lut’a peng theila ahilou akichenin !” tin aseiye.

Jesun adonbut’in, “Tahbeh a kaseipeh nahi, koima Pathen Lenggam alut-theipoi, ‘Tui’ le ‘Lhagao’-a apen lou’ule.”

Tahsaphe hin Tahsaphe apensah ahi in, Lhagao vang hin lhagao apensah ahi. “Na penkit teiding ahi’ kati hi datmo hih-in. Hui hi anopnop na lam’a nung ahi. Agin naja-in,hinla, hoiya kona hung, hoilama che ahi  nahepoi.  Lhagao’a peng tapou chuti chu ahiuve,” ati. (John 3:1-8.NIV)

Daniel Pathen in Sakei hoa kona Ahuhdoh thu

Daniel chu atohkhompi hon, dihloutah in ahehseuvin Sakeiho kulsunga lelut ahitai. Hinla, kidihtah a Pathen houjing ahijalin, Pathen in ahuhdoh tai. Hichu, Lengpan Pathen ahetdoh lona le gamsung pumpia Daniel Pathen jacheh dia Lengpan thupeh aneina ahung hitai.

Loupina Pakai changing tahen.

Sopite,

Daniel Pathen chu tua jong Pathen hijing, abanga hijing, thanei le thilbol hijing ahi. Atahsan chan chu apanpi jing ahi. Tahsannin, kisanin. Tuhin Ama lungdeu chu bolin : Achapa Jesu Christa hi na Pakai le na Huhhingpu din kisanin. Chutile, na lungdon-kichatna, hahsatna le boina jousea kona nahuhdoh ding; nachonsey angaidama acha deium naso ding ahi. Kisan jengin, tuhin.

Simin, Daniel thu :

SAMARIANU JESU TO KIMUA HINNA CHANGTA

1.     Jesu chu alamjot thachol’in Jacob twikul koma atouve. Samaria mi numei khat twithal din ahunge. Jesun ahenga, “Twi don ding neipen,” ati; numeinun, “Iti Juda mi nangin Samaria mi kei koma don ding twi nathum ham?” ati. (Ijeh-inem itile Juda mi le Samaria mi ima kimangto lou ahiuve). –(John 4:3-9)

Judaten Samaria mi chu amunemuva, athet’uva, imacha akikoppiji louvu ahi. Ajehchu, amaho Judate bou Pathen deilhan le namtheng hiuva, nam dang chu ama ho le Pathen dia thet um ahisah’u ahi.

Jesu chu Juda insunga hungpeng ahi. Hinla, Aman namdang jong Pathen ngailut ahiu ahetsahnoma, ‘donding tui’ athum ahi. Na kidah koma ‘donding tui’ nathum ding ham?

Donding tui nathumna thei mi chu thetna, kidahna naneilou, athenga nagel mi ahi.

Jesu’n donding tui athum keu jong chun Samaria numeinu chu along akidansah ahitai. Chule, alungsunga agelding chu “akidang na e, eithetlou, mikidang ahi. Mi koima thetlou, ngailutna nei,Juda mi ho bang hilou khat, mikidang khat hinte” tia agelpai ahitai. Jesu lim le mel, ahi’na, angailutna chun amanu chu atohkhah pai ahitai.

Sopi, nang jong itobang mi hijongle chun Pakai Jesu’n nangailu’e.

Itobangin chonse jongle chun nathet poi. Na ngailut a, semphat’a, phatthei naboh nom ahi.

Mihem dola mipha nahija, huhhingna chang nakihisah a, Jesu koma ‘chonset phonga ngaidam thumloulai le Huhhingpua kisanloulai nahile; hiche nabollou jong chu nasuhkhel ahi kihet in. Hitia uma, monna dihlou neiya hinkho kipah joulou, kiginmo kom neijing amina Christian tamtah uma ahi.

Ahahsa poi. Jesu koma hung hi ahahsa poi. Na tuhdinga chu ‘Jachat, kiletsah, monna dihlou’ ho ahiji.

Lungmong tah theilou, ipiham khat ahile ‘Ole O, thileng Van-gam kalutda jeng dem?” tia kiginlelna nanei jengle, nahiloulai hinte. Nang kihisah jonglechun, nasunga um Pathen in napeh lhagao chun nahiloulai chu ahet’a lungmonna nachansahlou ahi. Ahahsa poi.

Nasumo hochu donda jengin.Hitin gelin “Chonset phon le Jesu kou chu chonset bolna, thilse bol hilouva, kana bolsa ahijongle bolkit jong ase hilouva; lungmonnakim neilouva ka umsangin, bol jeng tange” tinlang; tutah hin, dilsunlang, taovin, Jesu kouvin

“Pakai Jesu, chonse kahi, nangma koulouva kaumna jeng jong hi, michonse, ngaidam changda lomlou kahi ahitai. Kachonsetna nahei. Nei ngaidamin, O ka Pakai. Kadinga cross chunga nahung thina chum oh hisah hih in. Chonsetgal najona chu neipen, ka Pakai. Pathen cha nei hisah in. Ka lungsunga hin hung chengin. Ka Leng le Huhhingpu, ka Pakai le ka Pathen nahi . Ijakaiya ka ijakai hunghinlang, ka hinkho hi nadeilamin neipuiyin. Ka Pakai Jesu naminin,Amen.”

 Hitia chu nataole ‘Amen’ jih in.

Pathen in nataona jouse sangjing tahen.

JESU TO KIMU JOUSE HINNA CHANG AHIUVE

Koihile, itobangin chonse jongle, Jesu-to akimuto khah-le, ‘Pathen Hinna’to kimutoa chang jengji ahitai. ‘Jesu’ kiti amin jengjong hi ‘Huhhingpu’ tina ahin, Amato kimujouse chu achonset le suhkhelna jousea kona Pathen ngaidam changjia ‘tonsot’ hinna chu changji ahitai. 
Samaria numeinu jong hi numei kijoh bangbep ahi. Chubana, Juda-te dia thet umtah Samaria mi ahi. Hinla, Jesu’n akimupi phat in ‘tonsot hinna’ chu achangtai. Ama achan phat in, midangho jong agaseipeh in, midang hon jong ‘Jesu Christa’ chu tahsanin akisan taove. Simin, John 4: 3- 42 sung:-

Pathen Lenggam chu Nalah uva aume

Jesu’n, “Pathen lenggam chu (mihem mit’a) mutheiyin ahungpoi, Koiman, ‘Ven, hikom-’ah aume,’ ahiloule, ‘Khukoma aume,’ atilou ding ahi. Ijeh-inem itile ven, Pathen lenggam chu nalah-uva aumtai,” ati. (Luke 17:20-21)
‘PATHEN LENGGAM’ chu mihem mit-muthei ‘thil’ le ‘mun’ ahipoi. 
‘PATHEN LENGGAM’ hi ‘Pathen vai-hopna’ ahijoi. 
‘Vai-hop’ hi namuthei em? Vai-hopna’a kona thil umdoh hovang akimu theiye. Chunga kisei, mihem-ho gel le hisah ho jouse jong hi ‘PATHEN LENGGAM’ chun ahopthai. ‘Houbung’ jong hi Pathen vaihopna ahin, ‘PATHEN LENGGAM’ ahi. Chule, Vanmun hihenlang, tua hihen ahungkit phat le ajouva atundoh ding ahijongle ahopthai. Pathen vaihopna chu ‘PATHEN LENGGAM’ ahi. 
“PATHEN LENGGAM chu nalah’uva aum’e” ati hi Ama aseina jong ahi. Chule, “nanghoa aum’e” atina jong ahi.
‘PATHEN LENGGAM’ chu mihem lungsung ahi. Mihem, athua nung jouse, athu nitjouse lungsung chu Pathen vaihopna, ‘PATHEN LENGGAM’ ahi.
Thupeh nanitna chu mihem mit in amuthei ahipoi. Thupeh nanit’a kona nanunchan, nachonna, natohdoh vang chu muthei ahi. 
Nataona, PAKAI TAONA naseina’a “Na Lenggam hunglhunghen, Na lungdei kibol hen” nati hi nati tahbah hinam?
Nalungsunga chu Jesu Christa Lengchang ding, vai homding, nahinkho athuthua abol dinga napehdoh mong hinam? Athu nanit ding mong hinam? Leng le Huhhingpu dia nakou mong hinam? 
Nakoutah-le, kipa aume. Nakou loulai-le, tuhin taovin kou jengin. Chule, kisan jengin.

NA LENG GAM HUNG LHUNG HEN

{By: L.K.Hengna,Feb. 2,2014 nilhah (Sunday)a SCC a kathusei.}

                 I-Pakaiyu Jesu Christa chu leiya alenlai chun,aseijuite’n ama taojing chu amu’u hinte. Seijuite jong chu tao ding noma ahiuve. Hinla, a Pakai pau chun itobangtah a ataodiu adei ham, chule ipipen athum diu adeipeh em? ti chu ahetnom jal’un, Jesu koma chun, “Kei ho jong taodan neihil’un” tin angeh-taove.
              Thil ngeh’uchu thilpha ahijal chun, Jesu’n “hitihin taovun” ati : “Vana um ka-Pau, Namin kijahen, Na Leng gam hunglhung hen; Vana nalungdei akibol bangin, leiya jong nalungdei kibol-hen” ti ahi.
Mat 6:9 Hijeh chun hiti hin taovun:
“‘Van’a um ka-Pau, namintheng kijabol jing hen,10 Nalenggam hung lhung hen, Van’a bangin leiset’a nalungdei kim soh hen;11 Tunia kaneh khop diu an neh neipeuvin,12 Eibolseteu ka-ngaidam bangun, Kasuh khelnau ngaidamin;13 Chonset lona thei patepna neilhut dauvin, Agiloupaa konin neihuhdoh jo’uvin,’ tin.” (Matthew 6:9-13)

             I-Pakaiyu Jesu Christa chun, anungjuite jouse hitia chu atao cheh diu adei ahi. Tua, ama tahsana anungjui Christian jouse hitia chu i-taodiu eideipeh’u ahi.
              Taona hi ‘ngaichat thumna sangpen’ ahi. Chule, Hou-lamkai khat in anungjuite ‘taodan’ ahil chu, thupitah, dinpi (stand point) pen khat ahi. Hijeh hin, hiche ‘taona’ hi Christiante dia ‘Model Prayer’ahitai. Jesu Christa tahsan jouse hi Aseijui ihiuvin, Aseijuite ahilna, taona hi eiho jouse eihilnau ahi. Chule, hiche hi tahsate jouse juiding le nit ding ahi. Hijeh hin, Houbung-miten ‘PAKAI TAONA’ akititan, manchah phapen khat ahitai. Taona imang jing taove.
               Hitia chu,  hiche ‘Pakai Taona’ hi Christian jouse taona ahitan, nangma tah taona ahin, Pathen koma nataova, “Pakai, NA LENG GAM HUNG LHUNG HEN” tia nathum jing ahitai. Chule,
              “NA LENG GAM HUNG LHUNG HEN” tihi Christa tahsan jousen thumding pen jong ahi. Hichu, Pathen lungdei ahi. Hijeh achu, ‘NA LENG GAM HUNG LHUNG HEN’ ti-bana, nathumbe ding chu,“Vana nalungdei akibol bangin, leiya nalungdei kibol-hen” ti ding ahi.
            Pakai Jesu’n, “Pa lungdeilam bol hi kakinpipen ahi” ati. Hichu eiho kinpen jong ahi.
       Pa-lungdei chu ipipen ham?
      “Pa Lungdei” chu “ALenggam hunglhun ding” ding hi ahi.
      ‘ALenggam’ chu iti hunglhun ding ham?
        Lenggam chu ipi hija, itobang ham?
       Ningkuma September kisuhhalna’a chun ‘Pathen Lenggam’ umdol kaseitai. Abu neocha’a semin tamtah kahomin, asima tamtah naum diu katahsan’e.
               Tu'n ' NA LENG GAM HUNG LHUNG HEN' tihi vecilute :
         Pathen thu Bible hi simtahtah ding, abula pat a ajona gei sima kholchilding ahi. Hinna thu ahin, hetding ahi.
              Internet khang ahitan, min 'Read your Bible' atitapoi. "Navigate your Bible' ati ahitai. 'Navi' hokhun 'tuilutna ding, mitmkam,nah,kolsung hoa tui luttheilouna von lhingset kivona, tuipi sunga kikholut'uva, tuipi sunga thil agakhol'u ahi. Hiche banga chu 'Internet' a thil umhohi kholchil ahiji. Bible jong hi, Lhagao Theng von kivona kholchil, simsoh jengding, hetchil gotding ahi. 'Hinna thu' ahin, hetteiding ahi.

        ' NA LENG GAM HUNG LHUNG HEN' kitina'a

LHEPNA HI JESU MININ DOUVIN

Bible in, “Gotsa dem le lung limgeh in umun, chingtheiyin, phat jousen kiging jing’uvin; na kidoupiu, Agiloupa chu, Sakei gilkel banga, koi kaval lhum thei dem tia vah-le ahi. Tahsanna’n dingdet un, lenouvin,”( 1 Peter 5:8-9a)

Bible in aseibe kit’e, “ajehchu, leiset pumpia tahsante jousen itobang thohgimna hi athoh cheh’u ahi naheuve..”( 1 Peter 5:9b)

Thu-hil lhem apung jinge. Agiloupa, milhempa, Satan hin limchom chom ahin puji. Hoi tobang hijongle kichat bol hih in. Akicha chu ajoji ahi. Nangma vang kisong hih in, Jesu Christa, gal (Satan) joupa songin, Ama nasonchana najopeh ding ahi.

Aseibe kit’e, “Chule, khotona’a dim Pathen, Christa’a loupina chang dia nakoupauvin, phatchomkhat sung nathohgim jouteng’ule, natundoh kit diu, na-hatsah kit diu, dettah le suhlinghoi-hilou naso diu ahi. Ama achun tha-hatna jouse umjingjeng tahen, Amen.”( 1 Peter 5:10-11)

Lhepna kitoh-gempen hohi – chan chunga lunglhai louna, lhepna limchomjep a um ho kichat, lunghan, kitim joulouna, khat chunga lungnopmo, mikhat houset, mipho le houset, gihsal, toh nomlouna, thasetna, tao nomlou, Bible sim nomlou, jousei, mi jouva lhep le adang ho ahi. Hiche hohi neocha cha nagelthei ahi. Hitia gelna jong chu lhepna khat ahi. Hiche hohin asuhset pen chu ‘kipana-joulouna’ eisojepji.Mi kipah-louvin tohdoh pha anei theilou iheuve.

Agiloupa dei chu mi suhmo hi ahi. Suhmo’a kona nalah-mangpeh jichu – na insungmite le nagolte chunga nalunglhaina ho, natohna a nakipa le kinepna, na-gunchu’na le tomngaina, nachanchunga lunglhaina, thilpha nabolnomna, le adang ahin – hicheho jouse nasuhmo’a kona chu Pakai chunga nakipa le kinepna chu nalahpehgotji ahipen’e. Lunglhai lou le kinemlouva na-umtengle Bible simnom talou, tao nomtalou, houin kainom talou; chule, nanu-napa, na sopi, naji-nacha, naheng le kom,chule midang ho dia thilpha bolnomna umjitalou ahi. Hichu, na lhempa lungtup le kipana ahi.

Chujongle,“Soh (chonset soh) ihi louna diuva Christa’n eilhatdoh’u ahitai; dingdet jing’un, soh namkola chun kihen ohkit tahih un” (Galatians 5:1)

Bible in “Lhepna natoloudiu ahi” atipoi. Lhepna itodiu ahi. Limchomchoma hung kilang ding ahi. Athah aumdeh poi. Ana um jingsa ahi. Eden hona chun ‘gul’ limin akilangin, Aman dinga Roman sepaite hunga chun ‘Aseijui – Juda Iscariot’ in ahungin, amansah tai.

Itobangin, hungjongle kichalouvin; lhagao chemjam ( Pathen thu, Gospel thupha) panin, Satan gal-joupa, Jesu Christa songin, taotothon pangjinute. Chutengle, Aman eijopeh diu ahi.

Pakai Jesu’n “Vannoiya hin hahsatna natoh’ui, hinla, lungmong’un, Keiman vannoi kajoutai” (John 16:33) ati hi hejing’ute.

Tao’vute : “Pakai, hatlou le lhinglou kahi; nei umpi jingin, lhepna kato jouse hohi Lhagao Theng thahat in neijopeh jingin, nanga kakipana hi nei-honbitpeh jing jeng’in, chule, nadeilam hinkho chu nei mansah in tin ka Pakai Jesu Christa naminin kataove, Amen.”

Hiche taona hi taona naneile ‘Amen’ jih in.

Songpijanga KCU Day kimanna a nute le pate lakichuhpet < KCU Day Feb 1,2014 a nu pate lasah 3gp4