THOKITNA THAHATNA THUGUH

Jesu Christa thokitna jalin Pathen in phattheina chamkim napehen lang, alhacha din napansah tahen.
Hiche ‘Christa thakitna’ hi Christa nungjuijouse dia Pathen thahat channa ahi.
Jesu thinia pat athokitni gei, hapta khat sunga melchih thei hochu:
Ninga (Thursday) jan, lheplhah a aumjan tah chun kitepna ann (Pakai Ja-ann) eipeuve. Hichu, Christa tahsa le thisana kitepna theng ahi. Hiche ne-jouse chun Christa thohna, thina le thakitna, chule tonsot a Amato vaihomkhom dia kitepna ahitai.
Nigup (Friday) nin, mihemte chonsetman sahlhahna’n ,thohgentheina le thina atoh e. Hiche, atahsante jouse chonset jeh a ithoh diu khela athohna ahi.
Nisagi (Saturday) nin mithigama kumlhan, damun kot agaphai. Hichu, ana thisa ho le athikit ding ho jouse, thina-gal jouva akaithou kitna dia abol ahitai.
Thokitni (Sunday) nin thahatna nasatah neiyin kai thouvin aum kit in, Pa lunglhaina le kipaman chu asangtai. Hichu, atahsante jouse Ama banga athokitna diu lampi asemna ahitai.
Hiche jeh ahi, Athinia hi tahsante jousen, Ama a kipana thupha jala, Pa pathen, Chapa pathen le Lhagao Theng Pathen mina kaikhomna le Athua kiloikhomna kinei jing ahitai.
Cross chunga athi hin itobang mi ahi– chonset neilou Pathen Chapa ahi, chule, Pathen Kelngoinou vannoi chonset pomangpa ahi chu aphondoh ahitai.

Jesu Christa’n cross chunga jona anei tobang hi koima dang in aneijouthei ding ahipoi. Chonset thoidamna chamkim aboljou theina hi Pathen mihema hung peng ahijal ahi. Chonset thoidamna chamkim abol hi mijouse chonset thoina ahin, munjousea le phat jousea dia khatveiya abolchai ahitai. Ama vang ama tahsanna kisan hon bou aga alodiu, chonset ngaidamna chang diu ahi.
Athi chu kichehtah a ‘khatveiya thi’,’mijousedia khatveiya thi’( Once, For all) ahitai. Avela thi ngaitalou, khatveiya achai ahitai. Chonset thoidamna jong avela bol ngaitalou, Jesu’n abolchai chu tahsanna kisan joudia lhingset ahitai.
Christian tamtah in agelbanga, chonset thoidamna dia athi keu hi lah’a, ahinkho le athuhil hohi donselouva i-koikhah’ule, anatoh hi lhatdohna kin keu bola i-koi diu; anatoh hi kimlouva ihetdiuva um ahi. Achutile, hiche tahsa thijou tenga dinga bou Huhhingna kin abola i-koi khah diu ahi. Ahinkho le Athuhil jouse hi eiho dia kihilna le Ama i-juitheinau ahijoi.
THOKITNA THUGUH chu :
Athokitni lele dinga Lhan chu ahondoh ahipoi. Ama nungjuite jouse dinga jong ahon ahitai. Tahsante jouse jong Christa banga thina tha-hat in ahenjoulou ding, Christa nungjuiya kaithouva umcheh ding ahiu photchetna ahitai.
Athodohkit chu Ama ding lelea thoukit ahipoi. Anung juite jouse dinga jong Van-gam kot chu ahon ahitai. Na tahsan-le Van-gama christa chu najuilut ding hetna ahitai.
Jesu Lhana kona ahungdoh chu, mihem thisa thoukit’a hinnathah nei ahitai. Hiche nia chu, thokitna hinna chu Jesu’a chu uma ahitai. Hichu, Ama keu hilouva, Ama tahsana anungjuite jouse jong ichuti diu ahitai ti Pathenthu’n eihilun ahi :
 “Jesu thina’akona kaithoupa Lhagao chu nanghoa achenle, Christa thina’akona kaithouPa chun natahsau thitheiya chu Ama Lhagao, nanghoa chenga kona chu, hinna napeh diu ahi.” (Roman 8:11)
Loupina Pakai chang jing tahen.
Tahsa thinunga lhagao thokitnakeu hilouva, Jesu Christa thokitna thahat chu tua eiho atahsante hinkhoa jong hi na atongjing ahitai.
Leiya alenlaiya ahinkho keu chu  i-vetkah diu hilouva, tua jong atahsante, adeh a alhachate hinna’a na atoh dan ho jeng jong hi vetkah le juithei ahi.
Athodoh kitna thahat chu Achate jouse hinkhoa hi mutheiya na atoh jing ahi. Bolthu maimai ahipoi. Atahsante jousen Vana nunchan chu leiset’a hi ajuiyu, anunuva athodoh thei cheh’u ahitai.  Chunglama kona peng jouse chun, Van mite nun le khan neicheh’u ihitauve. Hiche, eiho hatna hilouva, Ama lhagao panpina jala Aman ahidohsah joh ahi. Hijeh achu, Ama a kingaijing ngaiya ahi.
Vana kona peng masapen chu Jesu ahin. Abana, Ama tahsana anung jui jouse hi ihiuve. Lhagao Thenga kona tha-hatna, tahsante apeh hi thina’a kona thokitna dia thahatna keu ahipoi; Aleng-gam kin bolna dia jong thahatna eipehthau ahijoi.
Hiche, Pathen tha-hatna chu ichantheina diuva, Amathu hatchet ngaiya ahi. Hetchet theina dia Bible thu kihilthem le kichuhthem,simhat le them aphai. Hinla, Bible thutah hetthem theina chu kithemchuh le simhat vang ahipoi, Lhagao Theng thilpeh jal’a bou hetthem thei ahi. Hetthem le muchettheina chu  i-chantengule, Pathen cha ihinauva hin thilthah le kidang aumjitai.
Hiche, thilthah chu atahsante hinkhoa akilangjitai. Hiche chu – nundanthah, thanopna thah, thilpha bolnomna, kipa le thanopna thah, Pathen thu le kina thanopna chule, thilthahthah umdohna le mopohna thah ho ahung umjitai.  Hiche, ‘Christa a thilsemthah’ ahina kilahdohna ahijitai.
Hitia, Christa a hinkhothah chu min aneitengle, ALenggama tohjingtheina lampi eihonpeh jiuvin; Lhagao Theng panpina eipe jingji tauve.
Jesu hunglona chu chonsetna akona ei huhhing diuva hunga ahi. Chule, Ama banga Pa-lungdei hinkho imantheina diuva thahatna eipediuva hunga jong ahi. Hiche thahatna chu, Athokit jouva Seijuite apeh akona chu tahsante ahin pehpat ahitai. Hinla, Pentecost nia chu, tha-hattah a ahin peh pat anahitai. Hiche tha-hatna jala chu vannoi pumpia mite seijuiya sem dinga einganseu hi. Hichu, Thokitna thahatna tailouva chu umthei ahipoi.
Jesu seijuite’n Thokitna thahat achanuva chu iti-ipi abolu ham ti chu Solchahho Thilbol (Acts) hin  eihiluve.
Thokitni hi iti naman em? Ole, hiche Thokitna thahatna chu changlou nahi jeng em?
Ole, Jesu mithiho lah’a kona le lhana kona kaithoupa thahatna thilpeh chu changlouva, miluihon anabol’u juina’a mang nahimai jeng em?
Nachantahle kipa aume. Hiche hi, miho hilnan mangin.
Chang loulai nahile, tutah hin Jesu Christa chu taonan kouvin. Taovin –
“Pakai, hitihchan nangma Leng le Huhhingpu dia kana kouloulai le kachonset na anga kaphonloulai jeh in ngaidam kathume. Chonse kahi neingaidamin. Chonset thaneina noiya hingjing kahi jong kihetlou kahi. Nei huhhing in. Ka dinga Cross chunga nathoh a nathi jalin kakipah e. keima chonset lhatdohna dia nathia, kachonsetna ho neisopthengpeh tah jalin naming kathangvah e. Thina le chonset thahatna jouse jousoh a,  Loupitah a nathokit a Vankot neihonpeh a Pa-to chamna neisempeh tah’a Pathen cha hitheina neipeh tah jalin kakipah e. Ka Leng le Huhhingpu nahi. Tuhin, kalungsung, kahinkhoa hin hung Leng changing. Kahinna le ka lhagao nakhut a kakoiye. Na lungdei hinkho chu nei mansah in. Na cha hitheina hinkho kamantheina dia eipui, eihil, eilhamon din Lhagao Theng chu kasunga chensah in, nei lamkai jingin. Jesu minin, Amen.”
Jesu thina’a kona athodoh jouchun, numei ho le seijuiho’n agaholnauva, Jesu long ana umtapoi. Lhan chu agohkeuvin agamu’ve. Jesu ana umtapoi. Athoukit in, anungjuite jouse din ‘Van-kot’ ahongtai.
‘Lhan-gohkeu’ chun  avetsah chu – ‘tahsante lhana umden loudiu, lhan hi agohkeuva adalhah diu, thina umtalouva, tonsot a dia hingdoh kit diu ahi hetchetna ahitai. Hijeh achu, thusei tampen, hiche, “lhan gohkeu chu ‘Vankot’ ‘Van jotna lampi’, Lei le Van kah jopmat a ahitai” tia aseijiu ahi. Hichu, Jesu ding keu hilouva, mijousedia vanjotna  lampi chu ahonjing ahi ti hetna ahitai.
Nangla, hiche lampi chu najot nah em?
Najotle, ajot loulai hon ahin jotna diuvin panpin. Najot loulai jengle, tutah hin dilsun chunglama kasei bang hin taovin, Jesu kouvin. Na chonst jouse phongin lang, ngaidam thumin. Chule, na huhhinga Pathen cha nasosahna din taovin. Ama na tahsan thu phonginlang, na hinkhoa vaihom din kouvin, hichu Huhhingpu le Pakaiya na kisanna ahi. Na hinkho akhut a pen.
Pathen in panpi jing tan.
(LKHengna 1.6.2015)