Hinna bulpi Pathen belin

Pathen chu hinna bulpi ahi, mihem ‘hinna’ pea chu Pathen ahi. Amato kikhen chu ‘hinna’to kikhen ahin. Hinnato kikhen chu ‘hinna umtalou’ tina ahin, ‘hinna umlou’ chu ‘thina’ ahi. Pathen chu tonsot Pathen ahin, Amto kikhen chu tonsot’a thina ahitai. Hichehi koima mihem sei ahipoi, Pathenthu’n asei ahi, Romans 6:23 simlechun, “Chonsetman (chonset bol) chu thina ahitai” tia asei ahi.

Avel in seikit’ute. Pathen deilou bolna chu ‘chonset’ ahin, ‘chonset’ chun, tonsot a Pathento eikhenu ahitai. Pathento kikhen, Pathenna kona gamlatah a um ihitaove. Pathen chu ‘hinna bulpi’ ahin; Amato kikhen chu ‘hinnato kikhen’, ‘thina’ ahitai.

Hitia chu,mijouse hi chonse, athi ihigamtauvin, huhhingna ngaicha  ihigamtaove.  Athi chun hinna aneikitna dinga chu, hinna pethei thahatna angaichat ahi. Hiche hinna, Lhagaova hinna pehna dinga chu, chonset thaneina le vaihomna noiya kona loidoh, huhdoh, kaidoh ngai masa ahi, hichu ‘huhhingna’ kiti chu ahi. Hitia chu, mijouse chonset thahatna noiya,sohbanga kihenna, huhhingna ngaicha ihigamtaove.

Chonset ngaidamna changlouva koima Pathen kom jonthei umlou ahitai. Jesu’n, “Pengkit louvin koiman Pathen lenggam amutheipoi” ati ahi(John 3:3)

Hitia, Pathennakona gamlatah a umna, Pathen umlouna muna umjehchun, tuni geiyin, chonset vaihomna jeh in, genthei le hahsatna, thina le manna adim joutai. Mihem koima akipahtah thei aumtapoi. Akipah hojong, akipanau achuljitan, kana le lhisona adim joutai.

Huhhingna,panpina ngaicha jinga mijouse uma ahitai. Ahatpen jong, hatjomlou, panpi ngaichatni umteitei; joa umteitei jeng. Koiman ajoloupa jong chu joa uma thi thou thou ahi. Chonset in mihem jouse ajou gamtai. Nat le hahsatna, lungjin boina jouse hi Pathen thu nitlouna akona umdoh ahi. Adam le Eve in Pathen thu ana palkeh lhon hihle Pathen angsunga umjing ding ihiuvin, Pathen angsunga chu iti nat le hahsatna um ding ham? Pathenna kona gamla tah a ium jeh’uva hitia hi genthei-hahsatna a dim ihiuve!

Hiche hahsatna hohi iti ipeldoh diu ham?

Pathen kom ijot diu ngai ahi. Pathen koma hahsatna le gentheina umlou ahi.

Itiba Pathen kom ijot kit thei diu ham? Pathen in adeldohsa chu iti akoma aumsah kit nom ding ham?

Pathen chu NGAILUT ahi ( 1 John 4:8) Ngailutna a dim ahi jeh in Pathen in akoma ikilekit theina diu eigonpeh’uve.

Pathen chu NGAILUT ahile ipidia mihem chu ana deldoh ham?

Pathen chu ATHENG ahi. AThen jeh in athenglouto aching khom theipoi.Mihem chu achonsettah jehchun Pathento umkhomthei ahitapoi. Paidoh ngai ahitai. Achutiloule Pathen thenna chu iti umthei ding ham?

Pathen chu KIDIHNA A DIM ahi. Akidih jeh achu, akidihlou, thu ngailou chuto ukhom theilou ahi. Thu ngailou chu paidoh a um ngai ahitai.

Ahi mongin, Pathen thusei chu thaneitah ahi. “Um hen” atile thiljouse chu hung um jeng ahi Genesis bung khat sunga imutaove. Adam koma “Na neh nini athi ding”anati ahin. Adam le Eve in nehlou ding aneh lhona chu Pathen in anaseisa akamchengsoh chun achamchama na ahintohdoh jeng ahi. Anehjou lhona chu Pathen in “thi lhontang” ati hidehtalou. Anaseisa chun na atohdoh a aneh jou jou lhona chu “Amit lamlhon kilehlha jeng” ahitai. Hichu, Pathen hiina (lhagaova) chu thi lhon ahitai.

Pathen in, chonset jeh a mihem hitia chonset noiya uma, athia aum hi, ei khoto behseh jeh un Ama kom ijot’uva Ama hinna, tonsot hinna chu ineikit theina diu agongtai. (Pathen chu tonsot mi ahin, Ama hinna chu ‘tonsot hinna’ ahi)