MIHEM NGAICHAT JOUSE MU LE CHANTHEINA JESU CHRISTA BOU AHI

            Hichea Jesu thusei hi gelpha mong mong temin. Thilkhat-lele aseina in gel hih in. Ijakai, Pathen phattheibohna bukim mutheina thu asei ahi.

Pathen chu thiljouse sempa le aneipa ahi. Thilsem lah a khat chu nang le kei jong ihi ahi. Nang le kei jong aneipa chu Pathen ahi. Pathen semsa le Ama a ihi.

Hinna eipeuva le eilahpeh kit theiyuva Ama bou ahi.

Hijeh chun, ‘hinna bulpi’, hinna hungkonna Ama koma chu ingaichat jouse kimkeiya uma ahin, anop-le anopnop chu anopnop apeh thei ahi.

‘Ama (Pathen) kom jot le akom lhun’ kiti chu ‘hinna, damna le ijakai umna mun jot le muna, channa’ tina ahi. Tahsa ngaichat jouse le lhagaova ingaichat jouse Ama (Pathen) koma chu um sohkeiya ahi. Akom nalhunle, ijakai namuthei, nachanthei’ tina ahi.

Jesu’n,‘Keima LAMPI, chule  ATAH, chule HINNA Kahi, Keiya kon tailouvin koima Pa koma ahung theipoi’” (John 14:6).

Tahsa le lhagaova dia kipana tahbeh, lolhinna tahbeh, Damna tahbeh, hinna tahbeh neitheina hi Jesu Christa tahsanna, Leng le Huhhingpua neina hinkho bou hi ahi.

Jesu Christa’a kimu jouse hi tua hinkhoa pat’a, tonsot gei ding ahi. Mitamtah in, tahsa thinunga ding bou ham atiu hi ahipoi. Leiset a hinkho eipeuva jong Ama  ahin, hiche hinkho jong hi Amato mankhoma kipah le lunglhaiya i-um diu adei ahi.

Hinkhoa kipah theilou chu thinunga kipana, van-gam amuding iti kikinem deh ding ham?

Jesu Christa’a ‘Huhhingna’ chang kiti chu ‘kipatheilouna, chonset thahat suhmona’a kona ‘Huhhinga uma, kipana hinkho chang’ tina jong ahi. Hitia, Huhhingna chang hohi atahsa hinkho iti um jongle Pakaiya kipah jingjeng theina chang ho ahiuve.

Nang jong tahsa le lhagaova nangaichat jouse, Pathen in nadeipeh jouse bukima nachan theina din, na Huhhingpu Jesu Christa chu taona in kou jingin. Ama nakihousahna in Bible nitinin simin. Chule, nang ding le na insung, loi le gol, le adang ho din jong tao jingin. Kei jong nei hin taokop jingin.

Pathen in panpi jingtan.