NUNGAHNU, NA NAOBU SUNGA NAMPI-NI KIDEL CHU NAHET EM?

<http://jesuahinna.blogspot.com/2012/11/nungahnu-na-naobu-sunga-nampi-ni-kidel.html>

Masangin Genesis 25:21-34 simin, Rebekah (Isaac jinu) bou hi anaobu sunga naocha-ni akina kana hisah’e.

Ahipoi ! Golte, eiho jouse sunga hi, naocha ni kidelji ahi! –Ase le Apha!

Rebekah chun, asunga mini kinah ahetdoh phat in, Pakai koma ataotai. Ataona Pakaiyin asangin, “Na naobu sunga chu nampi-ni kedel ahi, chule, nasunga kona mihonpi nia kikhen ding ahi; mihonpi khat chu hon chomdang sanga chu hatjo ding, a luijopa(upa) chun aneo jopa kin abolding ahi” (Genesis 25:23)

Golte, nangsunga jong ase le apha chu kidel ahi nahet em? Nahetle, napanhu dia Pakai nakouvem? Ole, nachanga na um jeng ham? Donlou le kihetmosah a na um jeng em?

Leiset hinkho imannauva hi ase le apha kihaljet ahi. Na lunga jong chu ase le apha nagel. Na neh-nadon jong ase le apha kihal. Nasei le na bol jong ase le apha um. Nangma chihna le hanta a nakingaikhahle, ase chun najoding ahi.

Rebekah banga hi Pathen koma taova, panpina thum ngaiya ahi.Chutile, Pakaiyin pan ahinlah a, ase chu eijo peh’uva, apha chu eipeh diu ahi. Chonsetgal jouva chu Jesu Christa bou ahi.

Tuhin, Jesu Christa koma taovinlang, chonsetgal (Satan) chu najopeh din thumin. Chutile, Ama a hinna (huhhingna) chu napeh a, nanga um alenjo(setna-Satan) chu najopeh ding, Ama (aneojopa) chu Vaihoma panga Pathen cha naso ding ahi. Kipah jing ding nahitai.

Taovin, “Pakai Jesu, keiya chonset hi neijopeh inlang, keiya hin nangma hung vaihomtai. Ka Leng le Huhhingpu nahi. Nalungdei hinkho mang din, Lhagao Theng in nei umpi jingin, Amen.”

Hitia chu nataole “Amen” jih in. Pakaiyin na umpi jing tahen.

[(Gelkhel poute- alhuohhat itamjiuvin, ajole neihin dohna sem in “Hepa, Esau chu ‘Satan’ hija, Jacob chu ‘Jesu’ ahi nati ham?” hinti get’unate. Bible thusei hin vetsahna thu kisei ahi – Eden’a Setna lut, Mihem lheplha ahiya, sapsetna change, Edena kona nodoh ahiya kona leiset chunga mihemte chung’a hi CHONSET (Setna) hin vai ahoma, mihemte hi Pathen-to akhen ahi. Hiche, CHONSET(SATAN) chu mihem in, ama thaneina-a ajolou jeh a, ajoudinga Jesu Christa vannoiya hung isol ahi.

Jesu chun, anatoh akipat in, Satan in gamthip gama ana patep in, Jesun, Pathen thuhing mangchan, Satan chu ajoutai. Satan in, phat khat a din adalhatai.

Gethesmani hona ahung patep kit in, Jesu’n, “Pa, ahitheile, hich ekadonding khon hi keiya konin chon mangin” ati. Hinla, Lhagao Theng panpina jalin, Satan lhep ahi ahepaiyin, “Hinla, Nangma thu thu hihen” tia kipehdoh phat in, Satan ajoutai. Thinagal jouvin, loupe tah in, athijou nithumnin, Pathen in akaithouvin, lei le van le asunga thuneina jouse (Satan chunga jong) neiyin Pa jetlama atoutai. Ama hin tonsot a vai ahom ding ahitai.

Eden’a Satan in mihem ana lhep lhah achu, Pathen in, mihemte, Satan thuneina akona huhhing kitna ding tohgon ana neipat ahitai. Hiche Pathen in atohgon chu, alhensa miho – Noah, Abraham, Isaac, Jacob le adang hoa hi thil ahin gonpeh ahi. Ol ol’in seinaute.]